1E settong are e bakto meyos ka Timna, Simson ngoladi paraban Filistin e jadhiya.
2Simson pas gubar, laju mator ka oreng towana, "Kaula tapanggi sareng babine’ Filistin e Timna. Kaula lebur ka babine’ ganeka. Tore eppa’ sareng ebu meyos, penta’agi."
3Dhabuna oreng towana, "Arapa me’ abineya oreng Filistin? Oreng Filistin reya banne ommadda Pangeran. Apa e antarana kaomma ba’na, otabana e antara sakabbinna oreng bangsana ba’na, tadha’ babine’ se cocok ka ba’na?" Tape Simson nyaot, "Tape babine’ Filistin ganeka se ekaleburi kaula. Tore, pona, penta’agi."
4Oreng towana Simson ta’ ngagali ja’ PANGERAN dibi’ se maguli pekkeranna Simson se kantha jareya. Sabab, PANGERAN apareng jalan kaangguy merrange oreng Filistin. E bakto jareya oreng Filistin ngobasane bangsa Isra’il.
5Daddi Simson ban oreng towana mangkat ka Timna. Teppa’na lebat e settong kebbun anggur, pas badha macan se gi’ ngodha. Macan jareya agaung,
6Simson daksakala pas daddi kowat dhari kobasana PANGERAN. Macan jareya ebit-sebbit, pera’ ban astana, akantha oreng se bit-nyebbit embi’. Kadaddiyan jareya ta’ ecareta’agi ka oreng towana.
7Saellana jareya Simson manggi’i babine’ gella’, pas abu-dhabu ban babine’ jareya, ban Simson arassa lebur ka babine’ buru.
8Saellana olle sabatara bakto, Simson abali ka bengkona babine’ jareya, akabina. E dhalem parjalanan jareya, Simson abiluk ka kennengnganna macan se epate’e rowa ngoladana babathangnga. Sanapa’na ka jadhiya e dhalemmanna babathangnga macan jareya etemmo ekaromo’ nyarowan, ban bannya’ madduna.
9Maddu jareya ekoro’ ban astana, pas nerrossagi parjalanna sambi adha’ar madduna. Simson pas manggi’i oreng towana, se pas eatore sabagiyan dhari madduna; bi’ oreng towana maddu jareya edha’ar. Tape Simson ta’ atotoran ja’ maddu jareya ollena mondhut dhari dhalem babathangnga macan.
10Saellana eppa’na napa’ ka bengkona paraban gella’, Simson mabadha pesta, sabab kantha jareya adadda ngangodhadan e jadhiya.
11E bakto oreng Filistin nangale’e Simson, reng-oreng jareya mele ngangodhadan tello polo oreng, epabarengnge Simson.
12Dhabuna Simson ka reng-oreng jareya, "Kaula andhi’ bak-tebbagan. Mon sampeyan bisa nebbak, bi’ kaula eparengngana kaen linen se alos sapotong ebang sareng kalambi se bagus sasettel ebang. Bi’ kaula sampeyan eparengngana bakto pettong are saabidda jang-onjangan paneka.
13Tape mon sampeyan ta’ bisa nebbak, sampeyan se kodu padha aberri’ ka kaula kaen linen alos sareng kalambi se bagus sasettel ebang." Reng-oreng Filistin jareya nyaot, "Enggi, tore! Ponapa bak-tebbaganna?"
14Dhabuna Simson, "Dhari se ngakan, kalowar kakanan; dhari se kowat, kalowar se manes." Saellana lebbi dhari tello are reng-oreng Filistin gella’ gi’ ta’ tao nebbak artena bak-tebbagan jareya.
15Daddi, e are se kapeng empa’ reng-oreng jareya ngoca’ ka rajina Simson, "Cacae lakena ba’na rowa sopaja gellem malae ba’na apa artena bak-tebbaganna jareya. Mon enja’, ba’na ban saessena bengkona eppa’na bi’ sengko’ eobbara. Ropa-ropana ba’na ngonjang sengko’ sakanca reya polana epatadha’a dhi’-andhi’na."
16Daddi, rajina Simson entar ka Simson sambi molar, atorra, "Sateya sengko’ tao ba’na reya ta’ taresna ka sengko’! Ba’na aberri’ bak-tebbagan ka tang ca-kanca, tape sengko’ ta’ ebalai artena! Tantona ba’na baji’ ka sengko’!" Dhabuna Simson, "Nante’ gallu. Tang reng towa dibi’ bi’ sengko’ ta’ ebalai. Me’ daddi ba’na se kodu ebalai?"
17Saabidda jang-onjangan se pettong are jareya rajina Simson molar terros. Sarrena terros nge’-ngare’nge’, daddi e are se kapeng petto’ bi’ Simson laju ebalai artena bak-tebbagan jareya. Bi’ rajina Simson pas ekabala ka reng-oreng Filistin.
18Daddi, e are se kapeng petto’ sabellunna compet are, reng-oreng kottha jareya ngoca’ ka Simson, "Ponapa se amanesan dhari maddu? Ban ponapa se akowadan dhari macan?" Dhabuna Simson, "Mon sampeyan ta’ ngangguy bine kaula, sampeyan ta’ kera oneng nebbak artena bak-tebbaganna kaula!"
19Simson daksakala pas daddi kowat dhari kobasana PANGERAN, pas meyos ka Askelon. E jadhiya Simson mate’e lalake’an se akalambi gus-bagus tello polo oreng. Kalambina epondhut, eparengngagi ka oreng Filistin se tello polo oreng se nebbak bak-tebbaganna rowa. Saellana jareya laju gubar, panggaliyanna duka.
20Bi’ mattowa lake’na rajina ebagi ka lalake’ se daddi pangerengnga Simson e bakto apangantan.
<< Hakim-hakim 14 >>
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel