1E bakto Isra’il gi’ ta’ andhi’ rato, badha oreng Lewi abengko e disa ru’-juru’na e dhaera pagunonganna Efraim. Oreng Lewi jareya aseller babine’ dhari Betlehem e Yehuda.
2Tape saellana jareya babine’ jareya peggel ka oreng Lewi jareya, sampe’ abali ka bengkona eppa’na e Betlehem, ban neng e jadhiya sampe’ pa’ bulan abidda.
3Oreng Lewi jareya nyosol, sellerra buru ecacae eajak abali. Se mangkat ngeba barengnga kasorang ban hemar dhadhuwa’. Sanapa’na ka jadhiya, bi’ babine’ jareya lakena egiba ka eppa’na. E bakto eppa’na babine’ jareya nangale’e oreng Lewi buru, laju etemmone, atena ce’ peragga.
4Sarrena bi’ eppa’na babine’ jareya epaksa ta’ ebagi mole, daddi oreng Lewi jareya neng e jadhiya sampe’ tello are, ngakan sarta ngenom e jadhiya ban sellerra.
5E are se kapeng empa’, oreng Lewi jareya ban sellerra jaga gi’ petteng laju aya-sadhiya se mangkada. Tape eppa’na babine’ gella’ ngoca’ ka oreng Lewi jareya, "Mara ngakan gallu ma’ olle kowat. Mon la mare pas mangkat."
6Daddi oreng Lewi jareya pas toju’ ngakan ban ngenom abareng ban eppa’na babine’ jareya. Tape e bakto jaga mangkada, bi’ eppa’na babine’ gella’ oreng Lewi jareya ecacae esoro ja’ mole. "Mara la neng-pasenneng gallu," oca’na, "ngenep e dhinna’." Daddi oreng Lewi jareya laju ngenep samalem aggi’.
7(19:6)
8E are se kapeng lema’, gi’ teng-petteng, e bakto oreng Lewi jareya mangkada, eppa’na sellerra ngoca’ pole, "Mara, ngakan gallu. Sakejja’ aggi’ abak yang-seyangan la mangkat." Daddi se kadhuwa jareya ngakan abareng epare-lere sampe’ para’ compet are.
9Saellana jareya, e bakto oreng Lewi ban sellerra sarta ban barengnga rowa mangkada, eppa’na ngoca’, "La para’ malemma, sakejja’ aggi’ la petteng. Lebbi becce’ ngenep e dhinna’ bai sambi neng-sennengngan. Lagguna jaga gu-laggu, pas mole."
10Tape oreng Lewi jareya ta’ endha’ ngenep e jadhiya pole. Daddi laju mangkat ban sellerra, abareng ban barengnga sarta hemarra se dhadhuwa’ se epobuwi pa-kapa. E bakto la para’ malemma, reng-oreng jareya napa’ ka seddi’na Yebus (iya areya Yerusalim). Barengnga jareya ngoca’ ka lorana, "Towan, ngereng nyepper ka kotthana oreng Yebus paneka, kelem e ka’issa’."
11(19:10)
12Tape lorana nyaot, "Enja’! Sengko’ ta’ ambuwa e kennengngan se orengnga banne oreng Isra’il. Mara terros bai sakejja’ aggi’, dhaggi’ ngenep e Gibeya otabana Rama."
13(19:12)
14Daddi reng-oreng jareya ajalan terros ban ta’ ambu e Yebus. Sanapa’na ka Gibeya e baba kakobasa’anna suku Benyamin are la compet.
15Se ambu e jadhiya maksodda ngenebba. Reng-oreng jareya maso’ ka kotthana, laju toju’ e lon-alon, tape tadha’ oreng settonga se ngajak ngenep e bengkona.
16Teppa’na toju’ e lon-alon kottha jareya, laju badha oreng towa se gi’ buru abali dhari lalakonna e teggal. Oreng jareya sabendherra asalla dhari dhaera pagunongan Efraim tape sateya neng e Gibeya. (Oreng Gibeya laenna tamaso’ oreng suku Benyamin.)
17E naleka oreng towa jareya nangale’e oreng Lewi e lon-alon, laju atanya, "Sampeyan dhari ka’imma, ban meyosa ka’amma?"
18Saodda oreng Lewi jareya, "Kaula dhateng dhari Betlehem e Yehuda, palemana ka compo’ e disana pagunongan Efraim. Kaula asalla dhari ka’issa’. Tadha’ settonga dhari oreng e ka’iya se poron ngajak kaula ngenep e compo’na, mangkana
19tadha’ laenna se ekaparlo kaula, sabab sango kaula ampon cokop. Kaula ampon ngeba darameyan sareng pakanna mar-hemar paneka; kaula ngeba roti sareng anggur se eteddha’a kaula sareng bine kaula sarta kabula kaula paneka."
20Oreng towa jareya pas ngoca’, "Diggal ja’ kobater, kaula se nolonga. Sampeyan ta’ osa asaren e lon-alon paneka."
21Daddi se katello jareya laju egiba ka bengkona; mar-hemarra laju epakane. Tamoyya jareya padha abacco sokona, pas padha ngakan.
22Teppa’na se katello jareya neng-sennengngan, o-tao bengko jareya ekeppong bi’ reng-oreng se bejjat odhi’na e kottha jareya. Labangnga bengko jareya edhardhar. Oca’na reng-oreng jareya ka oreng towa gella’, "Mara pakalowar lalake’ se egiba ba’na jareya! Bi’ sengko’ ekapolonga tedhung!"
23Tape oreng towa jareya kalowar, laju ngoca’ ka oreng se ngeppong bengkona, "Ampon tan-taretan! Kaula nyo’ona, ampon ja’ lakone barang se cemmer ganeka, sabab paneka tamoy kaula.
24Diggal sellerra saos bi’ kaula ebagiya ka sampeyan sareng ana’ bine’ kaula dibi’. Epakadi ponapa’a saos ampon eatore. Tape tamoy kaula se lalake’ paneka ja’ le’-ole’."
25Tape reng-oreng e lowar jareya ta’ endha’ ngedhingngagi. Daddi oreng Lewi gella’ ngeba sellerra kalowar, pas esaba’ e jadhiya. Bi’ reng-oreng jareya sellerra oreng Lewi buru laju eparkosa tadha’ ambuna samalem sampe’ kalagguwanna gu-laggu.
26E bakto pajjar babine’ buru abali, tape sanapa’na ka labangnga bengkona oreng towa gella’, se eenebbi lakena, laju kalengnger. E bakto are la moncar babine’ jareya gi’ badha e jadhiya.
27E baja laggu jareya, e bakto lakena jaga ban mokka’ labang mangkada, laju nangale’e sellerra tamoyya labu tasorkep e adha’na bengko jareya, tanangnga neggu’i ka labangnga.
28"Mara jaga. Mara ja’ mangkada," oca’na ka sellerra. Tape babine’ jareya ta’ nyaot sabab la mate. Sellerra jareya laju eangka’, esaba’ e attassa hemarra, laju mangkat moleya ka bengkona.
29Sanapa’na ka bengkona, oreng Lewi jareya maso’ ka bengkona, ngala’ ladding. Mayyidda sellerra jareya laju ethok-ketthok epadaddi dhubellas. Thok-ketthoganna mayyit jareya epakerem ka suku bangsa Isra’il se dhubellas, saneyap suku ekereme settong.
30Reng-oreng se nangale’e jareya padha ngoca’, "Molae lamba’ sengko’ ta’ tao nangale’e badha kadaddiyan kantha reya! Molae ommat Isra’il kalowar dhari Messer sampe’ sateya. Sateya parkara reya ta’ ekenneng panneng. Mara padha aparembagan baramma nyamanna sateya."
<< Hakim-hakim 19 >>
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel