Alkitab Mobile SABDA
[VER] : [MADURA]     [PL]  [PB] 
 <<  Hakim-hakim 3 >> 

1Kaangguy ngoji reng-oreng Isra’il se ta’ tao ngalame paperrangan e Kana’an, bi’ PANGERAN badha sa-bangsa se epapaggun neng e nagara jareya.

2Kan epakantha jareya, kasokanna PANGERAN tadha’ laen pera’ ngajara saneyap angkadanna Isra’il parkara perrang, bi-lebbi reng-oreng se ta’ tao noro’ aperrang.

3Sa-bangsa se gi’ badha e nagara jareya iya areya: bangsa se ngennengnge kottha se lalema’ e Filistin, sakabbinna bangsa Kana’an, bangsa Sidon, ban bangsa Hewi se ngennengnge pagunongan Libanon, molae dhari Gunong Ba’al-Hermon sampe’ ka jalan se ka Hamat.

4Reng-oreng jareya badha e jadhiya epangojiya bangsa Isra’il. Kalaban cara se kantha jareya pas etemmo apa bangsa Isra’il jareya ngestowagi papakonna PANGERAN se eparengngagi ka bangatowana kalaban parantara’anna Mosa.

5Jareya sababba arapa reng-oreng Kana’an, Het, Amori, Feris, Hewi ban Yebus me’ gi’ paggun neng e nagara jareya apolong ban ommat Isra’il.

6Ommat Isra’il akabin ban sa-bangsa jareya, sarta noro’ nyemba ka ba-dibana.

7Ommat Isra’il agabay dusa ka PANGERAN, Allahna. Loppa ka Salerana sampe’ nyemba ka la-brahalana Ba’al ban Asyera.

8Daddi PANGERAN duka ka ommat Isra’il, bangsa Isra’il epanneng epakala Rato Kusyan-Risyataim dhari Mesopotamia. Ballung taon abidda ommat Isra’il ekobasae rato jareya.

9Saellana jareya ommat Isra’il aserro nyo’on partolongan ka PANGERAN, PANGERAN laju ngotos Otniyel se mabebasa ommat Isra’il jareya. (Dineng Otniyel reya ana’na Kenas, ale’na Kaleb.)

10Otniyel emaso’e Errohna PANGERAN sampe’ daddi pamimpinna ommat Isra’il. Otniyel mangkat aperrang, bi’ PANGERAN laju epamennang ka rato Mesopotamia.

11Daddi nagara jareya pas taremtem sampe’ pa’ polo taon abidda. Samarena jareya Otniyel laju seda.

12Ommat Isra’il agabay dusa pole ka PANGERAN, daddi Eglon, rato Mo’ab, bi’ PANGERAN epakowadan dhari Isra’il.

13Rato Eglon agabung ban bangsa Amon sarta bangsa Amalek, laju makala oreng Isra’il, sarta laju arebbu’ Yerikho, kottha korma rowa.

14Ballu bellas taon abidda ommat Isra’il ekobasae Eglon.

15Tape e bakto ommat Isra’il aserro nyo’on partolonganna PANGERAN, PANGERAN laju madhateng Ehud se mabebasa ommat Isra’il jareya. Ehud reya oreng kidal, pottrana Gera dhari suku Benyamin, se biyasana ngaterragi pesse opet dhari ommat Isra’il ka Rato Eglon.

16E settong are Ehud abadhi peddhang se amata dhuwa’ se lanjangnga para’ satengnga meter. Peddhang jareya ekasandhang e tengngana se bagiyan kangan, e dhalemmanna kalambina,

17laju meyos ngaterragi pesse opet dhari ommat Isra’il ka Rato Eglon. Rato jareya ce’ lempona.

18Saellana massra’agi pesse opet jareya, Ehud makon mole reng-oreng se mekol emmas jareya.

19Tape Ehud dibi’ ambu e bakto napa’ ka to-bato okeran e seddi’na Gilgal, saellana jareya laju abali ka Eglon. E bakto jareya Eglon badha e pangkengnga se cellep e lotengnga karaton. Dhabuna Ehud ka Eglon, "Guste, abdidalem abakta kabar roseya." Dhabuna rato, "Nante’ gallu," rato jareya laju makon sopaja para abdina kalowar kabbi, daddi salerana laju coma kadhuwa’an ban Ehud. Ehud laju nyander ka seddi’na rato jareya, se teppa’na alenggi, atorra, "Badha kabar dhari Allah ka junandalem, guste!" Meyarsa jareya rato buru pas ngadek.

20(3:19)

21Ehud laju nyabut peddhangnga bi’ asta kacerra dhari tengngana se kangan, peddhang jareya laju ecocowagi ka padha’aranna rato, epadhalem. Peddhang jareya sampe’ ka gagangnga maso’ kabbi ka dhalem gajina padha’aranna rato jareya, sampe’ terbas ka budhi. Bi’ Ehud peddhang jareya edina ta’ edabu’.

22(3:21)

23Ehud laju kalowar, labangnga pangkengnga ekanceng, terros ekunci,

24samarena jareya pas ondur dhari jadhiya. E bakto para abdina rato jareya entar ka pangkengnga rato, pas nangale’e ja’ bang-labangnga pangkeng jareya ekunci, kabbi padha nyangka ratona badha e dhalem teppa’ akaberradan.

25Saellana cokop abidda se anante’ ban ratona ta’ duli mokka’ labangnga, kabbi padha bingong, laju ngala’ konci ban laju mokka’ labang jareya. O-tao ratona etemmo ngenjer seda e palesteranna.

26Sabatara reng-oreng jareya gi’ te’-nante’an, Ehud la buru ka Seira lebat e to-bato okeran.

27Buru napa’ ka dhaera pagunongan Efraim, Ehud laju nope tarompet adikane oreng Isra’il se epamangkada aperrang. Oreng Isra’il padha dhateng, laju epimpin Ehud toron dhari dhaera pagunongan jareya.

28"Mara noro’ sengko’," dhabuna ka reng-oreng jareya, "bi’ PANGERAN ba’na la etolonge makala mosona, reng-oreng Mo’ab rowa." Daddi oreng Isra’il jareya laju toron dhari pagunongan, epimpin Ehud, laju arebbu’ bagiyanna Songay Yordan se bi’ oreng Mo’ab egabay palebadan mon alengka’a songay. Tadha’ settonga mosona se bisa salamet alengka Songay Yordan jareya.

29E dhalem paperrangan jareya oreng Isra’il mate’e ra-kera sapolo ebu tantara Mo’ab se paleng bagus; tadha’ settonga se lopot.

30E are jareya Mo’ab kala ka Isra’il, ban nagara jareya laju taremtem sampe’ ballung polo taon abidda.

31Pamimpin samarena Ehud iya areya Samgar pottrana Anat. Samgar jareya aperrang mabebas Isra’il keya, mate’e nem atos oreng Filistin ngangguy tongket pangowananna sapena.



 <<  Hakim-hakim 3 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel