1E settong are Nadab ban Abihu, tra-pottrana Harun, mondhut padupa’anna bang-sebang, padupa’an jareya eesse’e mardha sarta pas epobuwi dupa, pas eatorragi ka PANGERAN. Tape apoy jareya ta’ socce lantaran PANGERAN ta’ makon se kantha jareya.
2Daddi PANGERAN laju matoron apoy, se kadhuwa jareya taobbar sampe’ padha mate e dhalem Kemah Socce jareya.
3Mosa laju adhabu ka Harun, "Jareya se ekamaksod bi’ PANGERAN e bakto adhabu, ‘Sakabbinna oreng se aladine Sengko’ kodu ngargai kasocceyanna Sengko’. Sengko’ noduwagiya Tang kamolja’an ka sakabbinna Tang bangsa.’" Tape Harun mendel malolo.
4Saellana jareya Mosa adikane Misa’el ban Elsafan, tra-pottrana Uziyel, majadhi’na Harun. Dhabuna ka se kadhuwa jareya, "Mara dha’ enna’, kala’ mayyidda sapopona ba’na se kadhuwa reya dhari Kemah Socce reya pas saba’ e lowaranna parkemahan."
5Se kadhuwa jareya nyander pas ngeba mayyid se dhadhuwa’ se gi’ akalambi jareya ka lowaranna parkemahan akantha se edhabuwagi Mosa.
6Dhabuna Mosa ka Harun ban ka tra-pottrana se laen, iya areya Eleyazar ban Itamar, "Obu’na ba’na ja’ pasalsal, ban kalambina ja’ sebbit kaangguy noduwagi ja’ ba’na sossa. Mon ba’na sampe’ salsal obu’na ban nyebbit kalambina menangka tandha ja’ ba’na sossa, ba’na bakal mateya, ban sakabbinna ommat Isra’il bakal ebendunana PANGERAN. Tape reng-oreng Isra’il laenna olle sossa polana kapateyan oreng se kadhuwa se ekello’ apoy se epatoron PANGERAN jareya.
7Ja’ ondura dhari Kemah Socce me’ olle ba’na ta’ mate, sabab ba’na la etahbissagi bi’ mennya’ opacara kaangguy aladine PANGERAN." Harun ban tra-pottrana padha alampa’agi se edhabuwagi Mosa.
8Dhabuna PANGERAN ka Harun,
9"Samarena ngenom anggur otabana nom-enoman kerras ba’na ban na’-ana’na ta’ olle maso’ ka dhalem Tang Kemah. Mon ba’na ta’ atoro’ ka atoran jareya, ba’na bakal mateya. Parenta reya kodu etoro’ bi’ sakabbinna toronanna ba’na.
10Ba’na kodu tao abida’agi se kemma se la eatorragi ka Allah malolo ban se kemma se ekenneng angguy kaangguy kaparlowan se umum, se kemma se najjis ban se kemma se ta’ najjis.
11Sakabbinna hokom se ebagi Sengko’ ka ba’na kalaban parantara’anna Mosa kodu eajarragi ka ommat Isra’il."
12Dhabuna Mosa ka Harun ban ka pottrana se kadhuwa, iya areya Eleyazar ban Itamar, "Kala’ gandum karena kurban obbaran se eatorragi ka PANGERAN. Dhari teppong jareya agabay roti se ta’ eragi’i, laju kakan e erenganna mezba, sabab kurban jareya talebat soccena.
13Roti jareya kodu ekakan e kennengngan se socce, sabab dhari kakanan se eatorragi ka PANGERAN, roti jareya bagiyanna ba’na ban na’-ana’ lalake’anna. Jareya se edhabuwagi PANGERAN ka sengko’.
14Tape ba’na ban na’-ana’ lalake’anna sarta ana’ babine’anna olle ngakan dhadhana tor-ator ka’-angka’ ban pokangnga tor-ator kusus. Jareya bagiyanna para imam dhari kurban salameddanna bangsa Isra’il. Ba’na ban na’-ana’na olle ngakan jareya e kennengngan e dhimma’a bai se ta’ najjis.
15Pokangnga kurban kusus ban dhadhana tor-ator kusus jareya kodu egiba epabareng ban gajina kurban obbaran menangka tor-ator kusus ka PANGERAN. Bagiyan-bagiyan jareya daddi andhi’na ba’na ban na’-ana’na kaangguy salanjangnga, menorot se edhabuwagi PANGERAN."
16Saellana jareya Mosa mareksane parkara embi’ se ekagabaya kurban pangamponanna dusa. Ta’ taona embi’ jareya la eobbar. Daddi Mosa duka ka Eleyazar ban Itamar, tra-pottrana Harun, dhabuna,
17"Arapa kurban pangamponanna dusa jareya bi’ ba’na me’ ta’ ekakan e kennengngan se socce? Jareya bagiyan se talebat soccena, se bi’ PANGERAN eparengngagi ka ba’na sopaja dusana ommat Isra’il esapora’a.
18Dharana embi’ jareya ta’ egiba ka Kemah Socce, daddi masthena kurban jareya bi’ ba’na kodu ekakan e jadhiya akantha se la eparenta’agi bi’ sengko’."
19Dhabuna Harun ka Mosa, "Ja’ sakenga kurban pangamponanna dusa reya bi’ sengko’ ekakan sateya, apa kerana PANGERAN kasokana panggaliyanna? Pajat bendher e are teya ommat Isra’il la ngatorragi kurban pangamponanna dusana sarta kurban obbaran ka PANGERAN, tape balai reya la teba ka sengko’."
20Mosa abendherragi dhabuna Harun jareya.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel