Alkitab Mobile SABDA
[VER] : [MADURA]     [PL]  [PB] 
 <<  Imamat 13 >> 

1Dhabuna PANGERAN ka Mosa ban ka Harun,

2Mon badha oreng kole’na etemmo bu-tombu otabana poro otabana kole’na lak-bellak pote se bisa daddi panyaket kole’ budhuk, oreng jareya kodu egiba ka imam Harun otaba toronanna.

3Imam kodu mareksa bagiyan se sake’ e kole’na oreng jareya. Mon bulu e bagiyan jareya daddi pote, ban bagiyan se sake’ keldem, oreng jareya nyandhang panyake’ kole’ budhuk. Imam kodu anyata’agi ja’ oreng jareya najjis.

4Tape mon bagiyan se sake’ jareya barnana pote, ban ta’ keldem, ban bulu e bagiyan jareya ta’ aoba daddi pote, oreng jareya kodu epangongse dhari kennengnganna oreng bannya’ pettong are abidda.

5E are se kapeng petto’ imam kodu mareksa oreng jareya pole. Mon menorot panemmona panyaket jareya gi’ paggun kabadha’anna ban ta’ alatlat, oreng jareya kodu epanyengla pettong are aggi’.

6E are se kapeng petto’ imam kodu mareksa oreng jareya pole, ban mon bagiyan se sake’ jareya la baras ban ta’ alatlat, imam kodu anyata’agi ja’ oreng jareya la berse. Jareya panyake’ kole’ se ta’ babaja. Oreng jareya kodu nyassa angguyya, ban oreng jareya laju berse.

7Tape mon samarena enyata’agi berse bi’ imam panyakedda alatlat, oreng jareya kodu ngadhep pole ka imam.

8Bi’ imam kodu epareksa pole, mon panyakedda pajat alatlat, oreng jareya kodu enyata’agi najjis; oreng jareya nyandhang panyaket kole’ budhuk.

9Oreng se nyandhang panyaket kole’ budhuk kodu egiba ka imam.

10Mon menorot pamareksa’anna imam e kole’na oreng jareya badha se bara, se pote barnana, daddi poro ban bulu e bagiyan jareya daddi pote,

11oreng jareya nyandhang panyaket kole’ budhuk. Imam kodu anyata’agi ja’ oreng jareya najjis. Oreng jareya ta’ osa ebuwang sabab la terrang ja’ aba’na najjis.

12Mon imam nangale’e ja’ lak-bellak se pote jareya la balattra dhari cethak sampe’ ka sokona,

13ban menorot pamareksa’anna panyaket jareya la balattra daddi sabadan ban kole’na la pote kabbi, imam kodu anyata’agi ja’ oreng jareya berse.

14Tape mon badha porona, oreng jareya najjis.

15Mon jareya pajat poro, oreng jareya kodu enyata’agi najjis, sabab nyandhang panyaket kole’ budhuk.

16Tape mon poro jareya baras ban la daddi pote pole, oreng jareya kodu ngadhep ka imam

17menta pareksa pole. Mon porona pajat la pote, imam kodu anyata’agi oreng jareya berse.

18Mon oreng etemmo bu-tombu se la baras,

19tape e lampadda kalowar bara se pote otabana lak-bellak pote abak ra-mera, oreng jareya kodu ngadhep imam

20sopaja epareksa. Mon bagiyan se lak-bellak mera jareya keldem, ban buluna e bagiyan jareya la pote keya, oreng jareya bi’ imam kodu enyata’agi najjis. Bu-tombu jareya parmola’anna panyaket kole’ budhuk.

21Tape mon menorot pamareksa’anna imam bulu e bagiyan jareya ta’ daddi pote, ban bagiyan jareya ta’ keldem, pera’ barnana angodha’an, oreng jareya kodu epanyengla pettong are abidda.

22Mon lak-bellak se pote jareya alatlat, imam kodu anyata’agi ja’ oreng jareya najjis sabab oreng jareya nyandhang panyaket kole’ budhuk.

23Tape mon lak-bellak se pote jareya ta’ aoba ban ta’ alatlat, jareya coma lampadda bu-tombu, daddi oreng jareya bi’ imam kodu enyata’agi berse.

24Mon badha oreng bulla’, ban lokana laju daddi pote otabana pote abak sora’ mera,

25imam kodu mareksa oreng jareya. Mon buluna e bagiyan jareya daddi pote ban lokana keldem, panyaket kole’ budhuk molae tombu e bagiyanna loka se bulla’ jareya, imam kodu anyata’agi ja’ oreng jareya najjis.

26Tape mon buluna e bagiyan jareya ta’ daddi pote ban bagiyan jareya ta’ keldem, coma barnana angodha’an sakone’, oreng jareya bi’ imam kodu epanyengla dhari kennengnganna oreng bannya’ pettong are abidda.

27E are se kapeng petto’ oreng jareya kodu epareksa pole bi’ imam. Mon lak-bellak pote jareya alatlat, oreng jareya nyandhang panyaket kole’ budhuk, ban kodu enyata’agi najjis bi’ imam.

28Tape mon lak-bellak pote jareya ta’ aoba, sarta’anna ta’ alatlat, pera’ barnana angodha’an, jareya banne panyaket kole’ budhuk. Oreng jareya kodu enyata’agi berse bi’ imam, sabab barna se pote jareya coma lampadda se bulla’.

29Mon badha oreng lalake’ otaba babine’ nyandhang panyaket kole’ e cethagga otaba e cangkemma,

30oreng jareya kodu epareksa bi’ imam. Mon bagiyan se sake’ jareya katon keldem, ban obu’na otaba janggu’an e bagiyan jareya daddi abak koneng sarta pas ronto, oreng jareya nyandhang panyaket kole’ budhuk e cethagga ban e cangkemma, daddi kodu enyata’agi najjis bi’ imam.

31Mon menorot pamareksa’anna imam bagiyan se sake’ jareya ta’ katon keldem, tape e bagiyan jareya tadha’ obu’ otaba janggu’ se celleng, oreng jareya kodu epanyengla dhari kennengnganna oreng bannya’ pettong are abidda.

32E are se kapeng petto’, oreng jareya kodu epareksa pole bi’ imam, mon panyaket jareya ta’ alatlat sarta e bagiyan jareya tadha’ obu’na otaba janggu’na se abak koneng, ban pole katonna ta’ keldem,

33oreng jareya kodu nyokor obu’na otaba janggu’na e sakalenglengnga bagiyan se sake’. Saellana jareya oreng jareya kodu epanyengla dhari kennengnganna oreng bannya’ pettong are abidda.

34E are se kapeng petto’ imam kodu mareksa oreng jareya pole. Mon panyakedda ta’ alatlat ban bagiyan jareya katonna ta’ keldem, oreng jareya kodu enyata’agi berse ban kodu nyassa angguyya.

35Tape mon saellana enyata’agi berse panyakedda laju alatlat,

36oreng jareya kodu epareksa pole bi’ imam. Mon bendher panyaket jareya pajat alatlat, imam ta’ parlo mareksa pole apa obu’ otaba janggu’na oreng jareya daddi koneng, sabab la terrang ja’ oreng jareya najjis.

37Tape mon menorot panemmona imam panyaket jareya ta’ alatlat, ban e kennengngan jareya tombu obu’ ban janggu’ se celleng, panyaket jareya la baras, ban imam kodu anyata’agi ja’ oreng jareya berse.

38Mon badha oreng lalake’ otaba babine’ e kole’na metto lak-bellak pote,

39imam kodu mareksa oreng jareya. Mon lak-bellak jareya katonna pote beddeng, oreng jareya pera’ etemmo pora’, ban enyata’agi berse.

40Mon oreng lalake’ daddi buthak e bagiyan budhina otaba bagiyan adha’na cethagga, oreng jareya ta’ najjis.

41(13:40)

42Tape mon e bagiyan buthagga jareya metto bara se abarna pote ra’-sora’ mera, oreng jareya nyandhang panyaket kole’ budhuk.

43Imam kodu mareksa oreng jareya, mon pajat badha se bara, se barnana pote ra’-sora’ mera,

44imam kodu anyata’agi ja’ oreng jareya najjis polana nyandhang panyaket kole’ budhuk e cethagga.

45Oreng se nyandhang panyaket kole’ budhuk kodu akalambi se dha-beddha ban obu’na egambak ta’ esoroy. Mowana bagiyan baba kodu etotobi sambi ra’-era’an, "Najjis! Najjis!"

46Saabidda nyandhang panyaket jareya oreng jareya najjis ban kodu neng e lowarra parkemahan, jau dhari reng-oreng laenna.

47Mon badha kalambi otabana kaen dhari wol otaba linen,

48otaba kole’ otaba apa’a bai se ekagabay dhari kole’, se daddi ambung,

49ban rang-barang se ambung jareya ra’-sora’ biru otaba ra’-sora’ mera, ambungnga jareya tamaso’ macemma se alatlat ban kodu eduduwagi ka imam.

50Imam kodu mareksa barang jareya, sarta pas manyengla barang jareya pettong are abidda.

51E are se kapeng petto’ imam jareya kodu mareksa pole barang gella’, ban mon ambungnga jareya gi’ alatlat, barang jareya najjis.

52Barang jareya kodu eobbar bi’ imam, sabab ambungnga jareya tamaso’ macemma se alatlat, daddi kodu eobbar epamosna.

53Tape mon menorot pamareksa’anna imam ambungnga jareya ta’ alatlat ka barang jareya,

54imam jareya kodu marenta’agi sopaja barang jareya esassa ban epanyengla pettong are aggi’ abidda.

55Saellana jareya pas kodu epareksa pole bi’ imam, mon ambungnga jareya ta’ aoba barnana, barang jareya paggun najjis ban kodu eobbar, maske ambungnga jareya pera’ badha e bagiyan adha’na otaba e bagiyan budhina.

56Tape mon menorot pamareksa’anna imam ambungnga jareya la ngorange, bagiyan se ambung e kaen otaba kole’ jareya kodu esebbit.

57Mon saellana jareya pas badha ambungnga pole, barang jareya kodu eobbar bi’ se andhi’.

58Mon saellana esassa otaba eassae ambungnga jareya elang, barang jareya kodu esassa otaba eassae pole, buru eanggep berse.

59Kantha jareya atoran-atoranna parkara barang se ambung, se aropa kalambi otaba kaen dhari linen otaba wol, otabana apa’a bai se ekagabay dhari kole’.



 <<  Imamat 13 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2020
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran