1Dhabuna PANGERAN, "Ba’na ja’ agabay brahala otaba arca otabana pelar bato otabana bato se eoker kaangguy esemba. Sengko’ reya PANGERAN, Allahna ba’na.
2Raya’agi re-are Sabat ban hormadi kennengngan se pera’ eangguy nyemba ka Sengko’ malolo. Sengko’ reya PANGERAN.
3Mon ba’na e dhalem odhi’na atoro’ ka Tang atoran-atoran ban ka Tang ta-parenta,
4Sengko’ matorona ojan teppa’ baktona, sopaja tana madhatengnga hasel ban ka’-bungka’an abuwa’a.
5Hasella tanana ba’na bakal talebat bannya’a, sampe’ mon la dhapa’ baktona molonga anggur, ba’na gi’ bakal teppa’na anye gandum. Ban mon la napa’ baktona namenna gandum, ba’na gi’ bakal teppa’na molong buwana anggur. Ba’na bakal ta’ kakorangana kakan ban odhi’ aman taremtem e nagarana.
6Sengko’ ajaga’a kaamananna nagarana ba’na sopaja ba’na ngennenga tedhung taremtem ban ta’ tako’ ka sapa’a bai. Run-burun alas se babaja epamosna’a dhari nagarana ba’na, ban ta’ kera badha perrang pole e nagarana ba’na.
7Ba’na bakal mennanga ka so-mosona;
8ba’na kalema bakal ngennenga makala moso saratos, ban ba’na saratos bakal ngennenga makala moso sapolo ebu.
9Bi’ Sengko’ ba’na eberkadana ban epabannya’a na’ potona. Apa se la ejanjiyagi Sengko’ ka ba’na tanto eteptebbi bi’ Sengko’.
10Hasella tanana ba’na bakal talebat bannya’a sampe’ cokop ekakan sataon. La’-mala’ ba’na bakal tapaksa’a makalowar lebbina hasella tanana se laju sopaja ngennenga nyempen hasella tanana se anyar.
11Sengko’ badha’a e nga’-tengnga’anna ba’na e dhalem Tang Kemah Socce, ban Sengko’ ta’ nolaga ba’na.
12Sengko’ abarengngana ba’na terros; Sengko’ daddiya Allahna ba’na ban ba’na daddiya Tang ommat.
13Sengko’ reya PANGERAN, Allahna ba’na, se ngeba ba’na kalowar dhari Messer sopaja ba’na ta’ ekadunora oreng pole. Kakobasa’an se nyeksa ba’na la epotel bi’ Sengko’, ban ba’na la epamardika."
14Dhabuna PANGERAN, "Mon ba’na ta’ ngedhingngagi ka Sengko’ ban ta’ atoro’ ka Tang parenta, ba’na eokoma.
15Mon ba’na ta’ endha’ atoro’ ka atoran-atoran ban ta-parentana Sengko’ ban marosak parjanjiyan se epabadha Sengko’ ban ba’na,
16bi’ Sengko’ ba’na eokoma. Bi’ Sengko’ ba’na epadhatengngana balai, panyaket bato’ kerreng ban panas se ta’ ekenneng pabaras, sampe’ matana ba’na buta ban ba’na odhi’ nyangsara. Ba’na bakal namennana tanana tape ta’ ngakan hasella, sabab so-mosona ba’na dhateng ban ba’na bakal epakala’a, ban sabarang se etamen ba’na bakal epatadha’a.
17Bi’ Sengko’ ba’na eokoma, sampe’ ba’na epakala ban so-mosona ban ekobasae reng-oreng se baji’ ka ba’na. Ba’na bakal katako’ana parana sampe’ ba’na buru, maske tadha’ oreng se nyerser.
18Mon saellana nyandhang sakabbinna okoman jareya ba’na gi’ ta’ atoro’ keya ka Sengko’, okomanna bi’ Sengko’ etamba’ana daddi pettong kalena.
19Ba’na talebat angga’na, tape bi’ Sengko’ ba’na econglettagiya. Ta’ kera badha ojan, sampe’ tanana ba’na bakal kerrenga ban daddi gali akantha besse.
20Lalakonna ba’na se berra’ ta’ kera badha ollena, sabab tanana ba’na ta’ kera madhateng hasel, ban men-tamennanna ba’na ta’ kera abuwa.
21Mon ba’na gi’ pagguna terros alaban ka Sengko’ ban ta’ atoro’ ka Sengko’, okomanna ba’na bi’ Sengko’ etamba’ana pettong kalena.
22Sengko’ madhatengnga run-burun alas ka nga’-tengnga’anna ba’na. Run-burun alas jareya bakal nyeppa’a na’-ana’na ba’na, mate’e ebinna ba’na ban matadha’a ba’na sampe’ kare sakone’, ban lan-jalan e nagarana ba’na bakal seppeya.
23Mon saellana narema okoman jareya kabbi ba’na gi’ ta’ endha’ ngedhingngagi ka Sengko’, ban gi’ terros alaban ka Sengko’,
24bi’ Sengko’ ba’na eajara ban eokoma aberra’an pettong kalena dhari se la kajalanan.
25Sengko’ madhatengnga paperrangan ka nga’-tengnga’anna ba’na menangka okoman lantaran ba’na ta’ neptebbi parjanjiyanna Sengko’ ban ba’na. Ban mon ba’na akompol e dhalem kotthana nyareya salamet, Sengko’ madhatengnga panyaket se ta’ ekenneng pabaras, sampe’ ba’na tapaksa atellok ka mosona.
26Ba’na bakal ta’ andhi’a pa-apa se ekakana, sampe’ oreng babine’ sapolo pera’ marlowagi pangeppanan settong kaangguy ngeppan roti se ekaandhi’ oreng sapolo jareya. Kakanan jareya bakal erangsuma, tape samarena ngakan rangsuman jareya ba’na gi’ pagguna lapar.
27Mon saellana narema okoman jareya kabbi ba’na gi’ terros alaban ka Sengko’ ban ta’ endha’ atoro’ ka Sengko’,
28Sengko’ bakal peggella ban ngajara ba’na, ngokoma ba’na epaberra’ana pettong kalena dhari se la kajalanan.
29Ba’na bakal kalaparana, sampe’ ba’na ngakan na’-ana’na dibi’.
30Sengko’ maancora ngan-kennengnganna pamojja’anna ba’na e nong-gunong, magujura ba-mezbana kennengnganna pangobbaranna dupana, ban ngontallagiya yit-mayyidda ba’na ka attassa la-brahalana ba’na se la gujur jareya. Tang ate bakal baji’a ka ba’na.
31Tha-kotthana ba’na bi’ Sengko’ epagujura, ngan-kennengnganna pamojja’anna epaancora ban ban-kurbanna ta’ etarema’a.
32Nagarana ba’na epatompessa epatadha’a karena, sampe’ so-mosona ba’na se ngobasane nagara jareya takerjat nangale’e saapa rajana karosagan jareya.
33Sengko’ madhatengnga paperrangan e nagarana ba’na, ban ba’na epacar-mencar e ra-nagara manca. Gal-teggalla ba’na bakal ta’ taorosa, ban tha-kotthana bakal possa’a ban jur-gujuranna bengko.
34E bakto jareya, sabatara ba’na ebuwang ka ra-nagarana so-mosona, tanana ba’na se ta’ tao epanneng sakale e bakto ekennengnge ba’na, bakal ta’ taorosa ban olleya kasempadan kaangguy aistirahat.
35(26:34)
36Reng-orengnga ba’na se ebuwang e nagara laen, bi’ Sengko’ epadaddiya katako’an, sampe’ monyena dhaun se etongngo’ angen bai andaddiyagi kabbi padha buru. Ba’na bakal buruwa akantha se eserser moso e dhalem paperrangan, ban ba’na bakal labuwa maske tadha’ moso se nyerser e seddi’anna ba’na.
37Ba’na bakal buruwa ban saleng tabentor, maske tadha’ oreng se nyerser. Ban ba’na ta’ kera ngenneng alaban ka so-mosona.
38Ba’na bakal mateya e pambuwangan, epatompes e tanana so-mosona.
39Sabagiyan dhari ba’na se gi’ odhi’ e nagarana so-mosona bakal sangsara’a odhi’na lantaran dusana dibi’ ban dusana bangatowana.
40Tape na’ potona ba’na bakal ngakowana dusana dibi’ ban dusana bangatowana se alaban ka Sengko’ ban ta’ atoro’ ka Sengko’,
41sampe’ madhateng okoman ka reng-oreng jareya, se ban Sengko’ laju eojuk ebuwang ka nagarana so-mosona. Dhi-budhina, mon toronanna ba’na la passra ka Sengko’ ban la ajalannagi okoman lantaran dusana se alaban ka Sengko’,
42Sengko’ ngenga’ana Tang parjanjiyan ban Yakub, Ishak tor Ibrahim, Sengko’ nganyarrana Tang janji se aberri’a tana rowa ka Tang bangsa.
43Tape tana jareya kodu epakosong gallu, pandhudhu’na se asal kodu epanyengla, sopaja tana jareya ngennenga aistirahat ongguwan. Ban Tang ommat kodu ajalannagi sakabbinna okoman se eteba’agi Sengko’ lantaran Tang ommat jareya ta’ endha’ atoro’ ka Tang atoran-atoran ban Tang parenta.
44Tape sanajjan gi’ badha’a e nagarana moso sakale, reng-oreng jareya bi’ Sengko’ ta’ edina’agiya otaba epatompessa salanjangnga. Sabab mon reng-oreng jareya kabbi bi’ Sengko’ epatompes, artena Sengko’ maburung Tang parjanjiyan ka reng-oreng jareya, mangkana Sengko’ reya PANGERAN, Allahna reng-oreng jareya.
45Sengko’ nganyarrana parjanjiyan se epabadha Sengko’ bi’ bangatowana reng-oreng jareya, e bakto Sengko’ noduwagi Tang kakobasa’an ka sakabbinna bangsa kalaban ngeba Tang ommat kalowar dhari Messer, sopaja Sengko’, PANGERAN, daddiya Allahna."
46Jareya kom-hokom ban papakon se eparengngagi PANGERAN e attassa Gunong Sinay ka Mosa kaangguy bangsa Isra’il.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel