1Kurban pangamponanna dusa kodu eatorragi ka PANGERAN mon badha kadaddiyan-kadaddiyan akantha e baba reya: Mon oreng se sacara resmi esoro nyakse’e e pangadilan, tape ta’ endha’ aberri’ katerrangan parkara se etangale otaba se ekaedhing aba’na, oreng jareya kodu nanggung ollena.
2Mon oreng ta’ etengnget daddi sala ban najjis lantaran nyedding barang se najjis, ompamana babathang, ban saellana jareya pas apangrasa ka kasala’anna.
3Mon oreng andhi’ sala lantaran ta’ etengnget nyedding ka barang se najjis se asalla dhari manossa, ban saellana jareya pas apangrasa ka kasala’anna.
4Mon oreng andhi’ sala lantaran asompa ban-saromban, parkara apa’a bai, ban saellana jareya pas apangrasa ka kasala’anna.
5Mon oreng andhi’ dusa, oreng jareya kodu ngakone dusana,
6ban menangka panebbussa dusana oreng jareya kodu ngatorragi dumba otaba embi’ bine’ ka PANGERAN. Imam kodu ngatorragi kurban jareya sopaja dusana oreng jareya esapora’a.
7Mon oreng se andhi’ dusa jareya ta’ kellar melle dumba otaba embi’ kaangguy panebbussa dusana, oreng jareya kodu ngatorragi mano’ poter otaba pejji sapasang, se settong menangka kurban pangamponanna dusa, ban settonganna menangka kurban obbaran.
8No’-mano’ jareya kodu egiba ka imam. Imam jareya kodu ngatorragi kaadha’ mano’ se la etantowagi kaangguy kurban pangamponanna dusa. Le’erra mano’ jareya kodu potel e bungkella, tape ta’ olle sampe’ tolges.
9Dharana mano’ jareya kodu eketessagi ka penggirra mezba, ban karena kodu perres epakalowar ka dhasarra mezba kaangguy kurban pangamponanna dusa.
10Saellana jareya imam buru kodu ngatorragi mano’ settonganna menangka kurban obbaran, menorot atoran se la etantowagi. Kantha jareya carana imam jareya ngatorragi kurban kaangguy dusana oreng gella’, sopaja dusana jareya esapora’a bi’ PANGERAN.
11Mon oreng se andhi’ sala jareya ta’ kellar melle mano’ poter otaba pejji sapasang kaangguy kurban pangamponanna dusana, oreng jareya kodu ngeba teppong sakilo. Teppong jareya ta’ olle campore mennya’ jaitun otaba epobuwi mennyan, sabab jareya kurban pangamponanna dusa, banne kurban sasajin.
12Teppong jareya kodu egiba ka imam. Imam jareya kodu ngala’ teppong buru sapergem menangka tandha ja’ teppong jareya kabbi la eatorragi ka PANGERAN. Teppong se sapergem gella’ kodu eobbar e attassa mezba menangka kurban kakanan. Jareya kurban pangamponanna dusa.
13Kantha jareya carana imam ngatorragi kurban kaangguy dusana oreng gella’, sopaja dusana jareya esapora’a bi’ Pangeran. Lebbina teppong gella’ daddi andhi’na imam, padha ban kurban sasajin.
14PANGERAN apareng atoran-atoran reya ka Mosa.
15Mon badha oreng se ta’ etengnget agabay dusa polana ta’ ngatorragi tor-ator se ewajibbagi ka PANGERAN, oreng jareya kodu ngatorragi kurban tebbusanna dusa. Kurban jareya kodu aropa dumba otaba embi’ lake’ se tadha’ calena. Argana dumba otaba embi’ jareya etantowagi menorot arga e Kemah Socce.
16Oreng jareya kodu majar se bannya’na padha ban se ta’ ebajarragi gella’ etambai ban dhu polo persenna. Keban jareya kodu epassra’agi ka imam, ban imam jareya kodu ngurbannagi keban buru, sopaja dusana oreng jareya esapora’a bi’ PANGERAN.
17Mon badha oreng se ta’ etengnget agabay dusa lantaran ngalakone sala settong dhari laranganna PANGERAN, oreng jareya sala ban kodu nanggung okomanna.
18Oreng jareya kodu ngatorragi kurban tebbusanna kasala’an aropa dumba otabana embi’ lake’ se tadha’ calena. Argana embi’ jareya eetong menorot arga se etantowagi e Kemah Socce. Imam ngurbannagi keban jareya kaangguy dusana oreng jareya, sopaja dusana jareya esapora’a bi’ PANGERAN.
19Jareya kurban tebbusanna dusana oreng jareya ka PANGERAN.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel