1Dhabuna PANGERAN ka Mosa ban Harun e Messer,
2"Bulan reya daddi bulan se kapeng settong e dhalem taon pananggalanna ba’na.
3Kabala ka sakabbinna ommat Isra’il Tang parenta reya: E tanggal sapolo bulan reya oreng lalake’an kodu nyambelli budhu’na dumba otaba budhu’na embi’, pas kakan kambuli’i ban saessena bengkona bang-sebang.
4Mon essena bengkona sakone’ gallu, daddi dumba settong jareya ta’ kera eabi’, tatanggana se paleng semma’ ajak, soro noro’ ngakan keya. Budhu’na dumba jareya kodu ebagi noro’ bannya’na oreng se ngakan.
5Ba’na olle mele dumba otaba embi’, tape kodu lalake’, omorra sataon, ban tadha’ calena.
6Embi’ otaba dumba jareya kodu saba’ gallu sampe’ tanggal pa’ bellas. E are jareya, e baja asar, ommat Isra’il kodu padha nyambelli dumbana bang-sebang.
7Dharana kala’ sakone’, buliddagi ka pangpangnga labang ban e attasanna labangnga bengko se ekennengnge ngakan dumba jareya.
8E malem jareya keya dagingnga kodu epanggang, pas kakan ban ngan-gangan se pae’ sarta roti se ta’ eragi’i.
9Dumba jareya ta’ olle badha se ekakan matta otaba ekella; kodu panggang kabbi, tamaso’ cethagga, sokona ban bai’ dhalemma.
10Ja’ pabadha karena sampe’ kalagguwanna; mon gi’ badha karena kodu obbar pasampe’ tadha’.
11Mon ngakan ba’na kodu akalambi pagenna’ akantha oreng se entara jalan; sandhalla cekka’ ka sokona, tongkedda tagenne e tanangnga. Mon ngakan duliyan. Jareya paraya’an Paska kaangguy ngormat Sengko’, PANGERAN.
12Sabab dhaggi’ malem Sengko’ lebada epabalattra’a e Messer, mateyana sakabbinna ana’ sareyang, molae dhari ana’na manossa sampe’ ka budhu’na ban-keban, ngokoma sakabbinna illah se badha e Messer, sabab Sengko’ reya PANGERAN.
13Dhara se ebuliddagi e pangpangnga labangnga bengkona ba’na jareya menangka tandha ja’ jareya bengkona ba’na. Mon Sengko’ nangale’e dhara jareya, bengko jareya bi’ Sengko’ elebadana, bi’ Sengko’ ta’ epama’-baramma’a e bakto Sengko’ ngokom reng-oreng Messer.
14Are jareya kodu eparengeddi menangka are raja kaangguy ngenga’e pa-apa se elakone Sengko’, PANGERAN. Are jareya kodu eraya’agi saterrossa sabban taon."
15Dhabuna PANGERAN, "Pettong are abidda ba’na ta’ olle ngakan roti se eragi’i. E are se kapeng settong ragi se badha e bengkona ba’na kodu buwang kabbi, sabab mon e dhalem bakto se pettong are jareya badha oreng se ngakan roti se eragi’i, oreng jareya la ta’ eanggep Tang ommat pole.
16E are se kapeng settong ban se kapeng petto’ ba’na kodu akompol kabbi, abakte ka Sengko’. E are jareya ba’na ta’ olle alako apa’a bai kajabana nyadhiya’agi pa-apa se ekakana oreng e are jareya.
17E are jareya bangsana ba’na bi’ Sengko’ epakalowara dhari Messer. Daddi sabban taon, saterrossa, ba’na ron-temoron kodu araya’agi are jareya menangka are raja.
18E bulan settong, molae tanggal pa’ bellas sar-asar sampe’ tanggal settong lekor malem, ba’na ta’ olle ngakan roti se eragi’i.
19E dhalem bakto se pettong are jareya ta’ olle badha ragi e bengkona ba’na. Oreng Isra’il otabana oreng manca se ngakan roti se eragi’i saabidda paraya’an jareya, ta’ eanggep Tang ommat pole."
20(12:19)
21Mosa pas makompol para seppona Isra’il, pas adhabu, "Kassa’ padha ngala’ budhu’na dumba otaba budhu’na embi’ settong ebang. Pas sambelli, sopaja ana’ binena ba’na ngennenga araya’agi paraya’an Paska.
22Samarena pas ngala’ kembang karang sagintel, cabbur ka jembung se aesse dharana keban jareya. Dharana buliddagi ka canggana labangnga ban e attasanna labangnga bengkona. Ja’ sampe’ badha e antarana ba’na se kalowar dhari bengkona, sampe’ kalagguwanna.
23Mon PANGERAN lebat e sabalattrana Messer kaangguy mateyana reng-oreng Messer, PANGERAN tanto ngoladi dhara se badha e canggana labangnga otaba e attasanna labangnga bengkona ba’na jareya. PANGERAN tanto pas pera’ lebat malolo; Malaekat Maot ta’ kera eparengngagi maso’, daddi ba’na ta’ kera badha se epate’e.
24Parenta reya masthe etoro’ salanjangnga bi’ ba’na sarta na’ potona.
25Mon ba’na la maso’ ka nagara se ejanjiyagi PANGERAN rowa, ba’na kodu mabadha opacara jareya.
26Mon na’-ana’na ba’na atanya, ‘Ponapa arteepon opacara paneka?’
27Saodi kantha reya, ‘Areya opacara Paska kaangguy amolja’agi PANGERAN, sabab e bakto PANGERAN mate’e ana’na reng-oreng Messer, bengkona reng-oreng Isra’il elebadi, daddi ba’na ban sengko’ gi’ odhi’ sampe’ sateya.’" Oreng Isra’il padha asojud abakte ka PANGERAN.
28Samarena jareya kabbi padha ajalannagi sabarang se edhabuwagi PANGERAN ka Mosa ban Harun.
29E baja tengnga malem PANGERAN mate’e ana’ lalake’an sareyang e Messer, molae dhari pottrana rato se bakal aganteya daddi rato Messer, sampe’ ka ana’na reng-oreng okoman e penjara e dhalem tana; bariya keya budhu’ sareyangnga ban-keban.
30E malem jareya rato ban ba-ponggabana sarta ra’yat Messer se tedhung padha jaga kabbi. Oreng sanagara Messer laju padha ramme nanges kabbi ce’ kajana, sabab tadha’ bengko se ta’ kapateyan ana’ lalake’ sareyangnga.
31E malem jareya keya rato nembali Mosa ban Harun dhabuna, "Ondur ba’na, kabbi ban reng-oreng Isra’il laenna! Ondur dhari tang nagara reya! Kassa’ abakte ka PANGERANna sabab jareya se epenta ba’na.
32Giba dumba ban embi’na, bariya keya sapena. Pas duli ondur! Nyo’onnagi berkat keya sengko’ reya."
33Reng-oreng Messer nyoro keya sopaja oreng Isra’il duliya ondur dhari nagarana. Ca’na reng-oreng jareya, "Mon sampeyan ta’ duli ondur dhaggi’ oreng Messer mate kabbi."
34Daddi reng-oreng Isra’il padha ngala’ pancina, eesse’e adunna roti se ta’ eragi’i, ci-panci jareya ebundu’ ban rambing, pas epekol.
35Oreng Isra’il ajalannagi keya apa se edhabuwagi Mosa; kabbi padha menta barang gagaliyan ban angguy dhari reng-oreng Messer.
36Reng-oreng Messer jareya bi’ PANGERAN eparenge lamba’ atena, daddi padha aberri’ apa se epenta reng-oreng Isra’il. Kalaban cara se kantha jareya oreng Isra’il ngeba dhi’-andhi’na oreng Messer ka lowar dhari nagarana.
37Oreng Isra’il laju padha mangkat ajalan soko dhari kottha Ra’amses ka kottha Sukot. Bannya’na oreng jareya ra-kera nem atos ebu, ta’ tamaso’ babine’an ban na’-kana’.
38Reng-oreng Isra’il jareya ngeba dumba, embi’ ban sapena. Bannya’ keya reng-oreng bangsa laen se noro’.
39Reng-oreng jareya ngeba adunna roti se ta’ eragi’i, pas eeppan, sabab etondhung dak-dadak bi’ oreng Messer, daddi ta’ sempat ngeppan roti se ekasangowa, ban ta’ sempat agabay adunna roti se eragi’i.
40Bangsa Isra’il se badha e Messer abidda pa’ ratos tello polo taon.
41Saellana olle pa’ ratos tello polo taon jareya, ommadda PANGERAN jareya laju nyengla dhari Messer.
42E malem jareya keya PANGERAN terros ajaga abakta’a bangsa Isra’il kalowar dhari Messer. Malem jareya ban saterrossa oreng Isra’il ron-temoron amolja’agi PANGERAN, menangka parengeddan e baktona bangsa Isra’il aga-jaga.
43PANGERAN adhabu ka Mosa ban Harun, "Areya’ atoranna paraya’an Paska. Oreng manca ta’ olle noro’ ngakan dagingnga dumba se egabay tor-atorra kurban e are Paska,
44tape dunor se la ebelli ba’na olle noro’ ngakan mon la esonnat.
45Oreng se neng e jadhiya pera’ sabatara, otabana koli, ta’ olle noro’ ngakan.
46Dagingnga dumba jareya kodu ekakan e dhalem bengko kabbi, ta’ olle egiba ka lowar. Tolangnga ta’ olle badha se epapotong.
47Sakabbinna ommat Isra’il kodu noro’ araya’agi pesta jareya.
48Oreng se ta’ asonnat ta’ olle noro’ ngakan e dhalem pesta jareya. Mon badha oreng manca se la neptep apolong ban ba’na terro noro’a araya’agi Paska polana noro’a amolja’agi Sengko’, PANGERAN, lalake’anna kodu esonnat gallu. Saellana jareya reng-oreng jareya eanggep padha ban oreng Isra’il asli, ban olle noro’ araya’agi pesta jareya.
49Atoran se kantha jareya ekennengngagi ka oreng Isra’il se asli ban ka oreng manca se la neptep e antarana ba’na."
50Reng-oreng Isra’il ngestowagi ban ajalannagi pa-apa se epakonnagi PANGERAN ka Mosa ban Harun jareya.
51E are jareya PANGERAN abakta sakabbinna ommat Isra’il kalowar dhari Messer.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel