1Oreng Isra’il padha mangkat dhari Elim. E tanggal lema bellas e bulan se kapeng dhuwa’ saellana mangkat dhari Messer, reng-oreng jareya napa’ ka ra-ara Sin se badha e antarana Elim ban Sinay.
2E ra-ara jareya ommat Isra’il padha ango’ngo’an ka Mosa ban Harun,
3oca’na, "Ja’ sakenga bi’ PANGERAN kaula epamate e Messer bai, e baktona ju’-toju’ ngadhebbi panci se aesse daging ban teppa’na ngakan roti sampe’ kennyang, gu ta’ anyamanan. Tape bi’ sampeyan kaula egiba ka ka’iya epamateya kalaparan."
4Dhabuna PANGERAN, "Sateya Sengko’ matorona ojan kakanan dhari langnge’ se daddiya kakanna ba’na kabbi re-saarena. Sabban arena oreng Isra’il kodu kalowar, makompol kakanan se cokop kaangguy kaparlowanna saare. Kalaban cara se kantha jareya Sengko’ terro taowa apa reng-oreng jareya atoro’ ka Tang parenta apa enja’.
5E are se kapeng ennem mon makompol kakanan, reng-oreng jareya soro ngala’ dhu kalena bannya’na se biyasana."
6Dhabuna Mosa ban Harun ka reng-oreng Isra’il, "Dhaggi’ lem-malem ba’na bakal taowa ja’ se ngeba ba’na dha’ enna’ reya PANGERAN dibi’.
7Laggu’ gi’ laggu ba’na bakal ngangaleyana kamolja’anna PANGERAN, sabab PANGERAN la meyarsa ba’na aseddhiyan ka Salerana. Sanyatana ba’na jareya pajat ango’ngo’an ka PANGERAN, sabab sengko’ reya coma ajalannagi dhabuna."
8Mosa pas adhabu pole, "PANGERAN dibi’ se aparenga daging se ekakana ba’na e bakto malem, ban PANGERAN keya se aparenga roti se ekaparlo ba’na gu-laggu, sabab PANGERAN la meyarsa ba’na aseddhiyan ka Salerana. Sabab mon ba’na aseddhiyan ka sengko’ artena ba’na aseddhiyan ka PANGERAN."
9Dhabuna Mosa ka Harun, "Kabala ka reng-oreng rowa sopaja padha’a ngadhep ka PANGERAN, sabab PANGERAN la meyarsa ngo’ngo’na reng-oreng jareya."
10Teppa’na Harun abu-dhabu ka reng-oreng jareya, kabbi padha atole ka sagara beddhi, ban o-tao pas nangale’e sonarra PANGERAN dhari dhalem ondhem.
11Dhabuna PANGERAN ka Mosa,
12"Sengko’ la ngedhing ngo’ngo’na oreng Isra’il. Kabala ka reng-oreng jareya ja’ mon malem kabbi bakal bisa’a ngakan daging, ban e bakto gu-laggu kabbi bakal padha bisa’a ngakan roti sampe’ kennyang. Daddi reng-oreng jareya bakal taowa ja’ Sengko’ reya PANGERAN, Allahna."
13E baja asar pas badha mano’ gemmek ce’ bannya’na sampe’ parkemahan jareya ta’ etangale’e, ban e baja laggu e sabingkerra parkemahan jareya toron ebbun.
14E bakto ebbun jareya la ngebbat, sagara beddhi jareya laju katon katotoban barang se tepes, akantha sesse’ se alos, padha ban ebbun se kecceng daddi es.
15E bakto reng-oreng Isra’il nangale’e jareya, kabbi padha ta’ tao apa jareya. Daddi kabbi padha saleng atanya, "Apa rowa?" Dhabuna Mosa, "Jareya kakanan paparengnga PANGERAN, se daddiya kakanna ba’na.
16Dhabuna PANGERAN, ba’na coma olle makompol cokop saparlowanna. Ba’na olle makompol se ekaparlo saessena kemahna, rang-sorangnga dhu liter."
17Reng-oreng Isra’il atoro’ ka parenta jareya; badha se ngala’ lebbi, badha se ngala’ korang.
18Bakto etaker, se makompol lebbi etemmo tadha’ lebbina, ban se makompol korang etemmo ta’ korang. Kabbi padha eppas ban bannya’na se ekaparlo bang-sebang.
19Dhabuna Mosa, "Ta’ olle badha se nyempen lebbina sampe’ kalagguwanna."
20Tape badha se ta’ ngedhingngagi ka dhabuna Mosa. Reng-oreng jareya nyempen sabagiyan dhari kakanan jareya. Kalagguwanna karena se esempen jareya etemmo bucco’, bannya’ ola’na; Mosa duka ka reng-oreng jareya.
21Sabban gu-laggu reng-oreng jareya ngala’ pera’ saparlowanna bang-sebang; mon are la panas, karena se badha e tana etemmo ancar daddi aeng.
22E are se kapeng ennem oreng Isra’il jareya makompol kakanan jareya bannya’na dhu kalena biyasana, iya areya pa’ liter rang-sorangnga. Para pamimpinna bangsa Isra’il mator parkara jareya ka Mosa.
23Dhabuna Mosa, "PANGERAN adhabu: Ja’ lagguna reya are se kusus kaangguy aistirahat, are Sabat, are se eangguy kusus abakte ka PANGERAN. Apa se epangganga ba’na, panggang are teya, apa se ekella’a, kella are teya keya. Lebbina saba’, angguy lagguna."
24Daddi lebbina kakanan jareya bi’ reng-oreng gella’ esaba’, akantha se edhabuwagi Mosa; kakanan jareya ta’ bucco’ ban tadha’ ola’na.
25Dhabuna Mosa, "Jareya kakanna ba’na are teya, sabab sateya reya are Sabat, are kaangguy aistirahat, kaangguy abakte ka PANGERAN, ban ba’na ta’ kera nemmo kakanan jareya maske sakone’a e lowaranna parkemahan reya.
26Ngala’ kakanan jareya nem are abidda, tape e are se kapeng petto’ ba’na kodu aistirahat, ban tadha’ kakanan se gaggara e are jareya."
27E are se kapeng petto’ badha reng-oreng Isra’il se kalowar ngala’a kakanan, tape ta’ nemmo.
28Dhabuna PANGERAN ka Mosa, "Sampe’ bila bangsa reya se ta’ atoro’a ka Tang parenta?
29Kaenga’e ya, ja’ Sengko’, PANGERAN, aberri’ ka ba’na bakto saare kaangguy aistirahat. Jareya sababba arapa e are se kapeng ennem Sengko’ me’ aberri’ kakanan se cokop kaangguy kaparlowan dhu are. E are se kapeng petto’ oreng Isra’il kodu neng e bengkona kabbi, ta’ olle kalowaran."
30Daddi bangsa jareya pas aistirahat e are se kapeng petto’.
31Kakanan jareya bi’ oreng Isra’il enyamae manna. Ropana padha ban katombar, barnana pote, rassana akantha jajan se ngangguy maddu.
32Dhabuna Mosa, "Badha dhabuna PANGERAN kantha reya: Ngala’ manna jareya dhu liter, pas sempen. Patao ka na’ potona, sopaja na’ potona ba’na padha’a tao ka kakanan se ebagi Sengko’ ka bangsa Isra’il e ra-ara beddhi, e bakto Sengko’ ngeba ba’na kalowar dhari Messer."
33Dhabuna Mosa ka Harun, "Kassa’ ngala’ pennay, esse’e manna ra-kera dhu liter, pas saba’ e ajunanna PANGERAN, sempen ron-temoron, me’ olle na’ potona pagi’ padha tao kabbi."
34Daddi pennay jareya bi’ Harun esaba’ e adha’anna Petthe Parjanjiyan, esempen, menorot se edhabuwagi PANGERAN ka Mosa.
35Manna jareya se daddi kakanna oreng Isra’il saabidda pa’ polo taon, kaetong dhari are jareya sampe’ napa’ ka Kana’an, tana se la ekennengnge oreng.
36(Ker-taker se eangguy e bakto jareya nyamana sagomer,essena dhu polo liter.)
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel