Alkitab Mobile SABDA
[VER] : [MADURA]     [PL]  [PB] 
 <<  Keluaran 28 >> 

1"Olok Harun kaka’na ba’na rowa ban na’-ana’na Nadab, Abihu, Eleyazar ban Itamar. Kabbi soro ja’ apolong ban reng-oreng Isra’il sopaja bisa’a daddi imam se aladinana Sengko’.

2Harun gabayyagi pangangguyya imam, me’ olle katon agung ban lebur abasanna.

3Olok sakabbinna kang-tokang jai’ se bi’ Sengko’ la eberri’i kaahliyan, balai soro agabay pangangguyya Harun sopaja Harun bisa’a daddi imam se malolo aladine Sengko’.

4Balai keya kang-tokang jai’ jareya soro agabay totobba dhadha, efod, juba, kameja solaman, surban ban sabbu’. Reng-oreng jareya kodu agabayyagi pangangguy jareya kaangguy Harun ban na’-ana’ lalake’anna sopaja bisa’a daddi imam se aladinana Sengko’.

5Kalambi jareya kodu ekagabay dhari wol bungo, bungo terrong ban mera, bennang emmas ban linen se alos. Laen dhari jareya efod gella’ kodu erengga ban solaman.

6(28:5)

7Talena bau dhadhuwa’ se egabay panyekka’anna efod jareya kodu ejai’agi ka penggirra.

8Efod jareya pobuwi sabbu’ tennonan alos dhari bahan se padha ban kalambina, jai’agi ka efod jareya sopaja daddiya settong bagiyan.

9Ngala’ bato dalima dhadhuwa’. Nyare kemmasan se ahli soro ngokerragi e bato jareya ma-nyamana ana’na Yakub se dhubellas. Toles noro’ giliranna omorra, settong bato tolese nyama nem-ennem. Bato mamatan se dhadhuwa’ jareya kodu epasang e dhalem ban-embanna mamatan se dhari emmas, sarta saba’ e talena bauna efod menangka tandha parengeddanna suku Isra’il se dhubellas rowa. Kalaban cara se kantha jareya Harun ngeba nyamana ku-suku jareya e bauna, daddi Sengko’, PANGERAN, terrosa enga’ ka ku-suku jareya. Salaenna ban-emban emmas se dhadhuwa’ jareya,

10(28:9)

11(28:9)

12(28:9)

13kodu kagabay keya rantay dhadhuwa’ dhari emmas morne se epente akantha tale, pasang ka ban-embanna mamatan se dhari emmas jareya."

14(28:13)

15"Gabayyagi totobba dhadha kaangguy Imam Agung se kodu eangguy mon terro taowa apa se daddi kasokanna Allah. Se ekagabay totobba dhadha jareya ban solamanna kodu padha ban se ekagabay efod.

16Bangonna masagi empa’, eleppet dhuwa’, lanjang ban lebarra padha dhu lekor sentimeter.

17Totobba dhadha jareya pobuwi mamatan pa’ baris. E baris se kapeng settong bato dalima, topas ban biduri sepah.

18E baris se kapeng dhuwa’ jamerrut, mamatan bungo ban enten.

19E baris se kapeng tello’ lazuwardi, akek ban kacobung.

20E baris se kapeng empa’ pirus, jakut ban ratna campaka. Mamatan se dhubellas macem jareya kodu etale’e bi’ tale emmas.

21Saneyap mamatan kodu eokere sala settonga nyamana ana’na Yakub se dhubellas menangka tandha parengeddanna ku-suku Isra’il.

22Totobba dhadha jareya gabayyagi rantay dhadhuwa’ dhari emmas morne se epente akantha tale.

23Gabayyagi keya long-kolong emmas dhadhuwa’, pasang e konco’ se dhadhuwa’ e bagiyan attassa totobba dhadha jareya;

24rantay emmassa se dhadhuwa’ maso’agi ka long-kolong jareya.

25Konco’ settonganna rantay se dhadhuwa’ jareya taleyagi ka ban-embanna mamatan se dhari emmas se dhadhuwa’ gella’, sopaja totobba dhadhana ekennenga sambung bi’ bagiyan adha’na talena bauna efod jareya.

26Gabayyagi long-kolong emmas dhadhuwa’ aggi’, pas pasang ka totobba dhadha e konco’ babana bagiyan dhalemma se nyedding ka efod.

27Saellana jareya pas agabay long-kolong emmas dhadhuwa’ aggi’, pasang e bagiyan adha’na talena bauna efod se dhadhuwa’ e bagiyan baba e seddi’anna sambunganna jai’an kelleman, e attasanna sabbu’ se dhari tennonan alos.

28Long-kolong totobba dhadhana kodu sambung ban tale bungo ka long-kolongnga efod sopaja totobba dhadha jareya pagguna badha e attassa sabbu’ ban ta’ locot.

29E bakto Harun maso’ ka Rowangan Se Socce kodu ngeba nyamana ku-suku Isra’il se eoker e totobba dhadhana sopaja Sengko’, PANGERAN, teptebba enga’ ka Tang ommat.

30Urim ban Tumim saba’ e totobba dhadhana jareya, paangguy ka Harun mon ngadhebba ka Sengko’. Mon teppa’na kantha jareya Harun kodu ngangguy totobba dhadha ros-terrosan, sopaja Harun taowa apa se ekakarep Sengko’ ka ommat Isra’il."

31"Juba se eangguy e attassa efod jareya kodu dhari wol bungo kabbi.

32Juba jareya pobuwi lobangnga le’er, ban lobangnga le’er jareya kodu epakowat ban pita tennonan me’ olle ta’ gampang beddha.

33E sakalenglengnga penggir babana kodu epobuwi rarenggan aropa dalima dhari wol bungo, bungo terrong ban mera, lang-selleng ban ceng-lonceng dhari emmas.

34(28:33)

35Juba jareya kodu eangguy Harun mon teppa’na atugas menangka imam. E bakto ngadhebba ka Sengko’ e Rowangan Se Socce, otaba mon kalowara dhari kennengngan jareya, ceng-lonceng jareya tanto pas amonye, sopaja Harun ta’ mateya.

36Gabayyagi rarenggan dhari emmas morne ngangguy okeran tolesan ca’-oca’ se amonye, ‘Kaangguy PANGERAN malolo.’

37Rarenggan jareya taleyagi ka surbanna ngangguy tale bungo terrong towa.

38Rarenggan emmas jareya kodu epasang e dhaina Harun, sopaja Sengko’, PANGERAN, endha’a narema sakabbinna tor-ator se egiba oreng Isra’il ka Sengko’, maskeya e dhalem ngatorragi kurban jareya reng-oreng jareya agabay sala.

39Kamejana Harun kodu etennon dhari linen se alos. Gabayyagi keya surban dhari linen alos ban sabbu’ se esolam.

40Na’-ana’na Harun gabayyagi keya kameja, sabbu’ ban surban sopaja padha katon agung ban lebur abasanna.

41Kalambi jareya angguyyagi ka Harun ban na’-ana’na. Reng-oreng jareya mennya’e mennya’ jaitun, kalaban cara se kantha jareya reng-oreng jareya etahbissagi ban emalolowagi daddi imam se aladinana Sengko’.

42Saellana jareya reng-oreng jareya gabayyagi katho’ pandha’ dhari kaen linen, lanjangnga dhari tengngana sampe’ ka pokangnga kaangguy notobi bagiyanna badanna se ta’ patot etangale’e oreng.

43Katho’ jareya kodu eangguy terros e bakto maso’ ka dhalem Tang Kemah otabana mon nyemma’e mezba kaangguy ajalannagi kabakteyan menangka imam e Rowangan Se Socce, sabab mon mam-imam jareya bagiyanna badanna se ta’ patot etangale’e ta’ etotobi, sampe’ etangale’e oreng laen, mam-imam jareya tanto mate. Atoran reya kodu ejalannagi salanjangnga bi’ Harun ban na’ potona."



 <<  Keluaran 28 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel