1Mikha reya asalla dhari settong kottha kene’ se anyama Moresyet. E bakto nagara Yehuda alir-gilir eparenta Rato Yotam, Ahas ban Hizkiya, Mikha narema pessen se edhabuwagi PANGERAN parkara Samaria ban Yerusalim.
2Mara edhingngagi, he, sa-bangsa! Mara tetene, pandhudhu’ sadunnya! GUSTE Allah Se Mahatenggi rabu kaangguy nyakse’e ja’ ba’na padha sala kabbi. Edhingngagi apa se edhabuwagi Salerana dhari Padalemmanna se socce e sowarga.
3Salerana toron dhari kalenggiyanna se socce, ban alomampa e co’-konco’na gunong e bume.
4Nong-gunong lejjar e babana pa’-dapa’na akantha lilin e dhalem apoy se rabbang; tanana rendhes maso’ ka ra-cora, padha ban aeng e attas gumo’ se agili ka baba.
5Jareya bakal kadaddiyana kabbi polana oreng Isra’il dusa ban aberonta’ ka Allah. Sapa se daddi sababba Isra’il dusa? Gu ta’ Samaria, ibu kotthana dibi’, ta’ iya? Sapa se daddi sababba Yehuda nyemba brahala? Gu ta’ Yerusalim dibi’, ta’ iya?
6Jareya lantaranna PANGERAN adhabu, "Bi’ Sengko’ Samaria epadaddiya tombuganna jur-gujuran e ra-ara, ban kennengnganna oreng namen anggur. Jur-gujuranna kottha jareya bi’ Sengko’ ebuwanga ka cora, sar-dhasarra ebungkara.
7Ca-arcana se aji epaancora, ban sabarang se ebagi ka babine’an se epalako e kowel eobbara, ban sakabbinna brahalana epaancora. Rang-barang jareya hasella kabakteyanna ka diba kalandhuwan. Sateya kabbi bakal eangko’a bi’ so-mosona egabaya tor-ator menangka tandha sokkor ka ba-dibana reng-oreng jareya."
8Daddi sengko’, Mikha, arassa sossa ban aserrowan. Sengko’ ajalana ta’ akalambiyan tor ta’ akasodan kaangguy noduwagiya saapa sossana tang ate. Sengko’ agaunga akantha pate’ alas tor athowada akantha mano’ onta.
9Sabab ka-lokana Samaria ta’ ekenneng pabaras, dineng Yehuda bakal padha’a kabadha’anna. Balai la napa’ ka Yerusalim, labang sakethengnga tana asalla tang bangsa.
10Ja’ abala ka so-mosona se badha e Gat parkara kapalangan se teba ka sengko’ ban ba’na reya; ja’ sampe’ reng-oreng jareya nangale’e ba’na nanges. He, reng-oreng Bet-Le-Afra, mara ba’na agulu’ e dhalem abu menangka tandha ja’ ba’na ta’ andhi’ pangarebban pole!
11Ba’na pandhudhu’ Safir, kat-mangkat ka pambuwangan ta’ osa ngangguy pa-apa sarta kalaban ate malo! Reng-oreng Za’anan ta’ bangal kalowar dhari kotthana. Cerrengnga oreng Bet-Haezel noduwagi ka ba’na ja’ e jadhiya tadha’ pangaoban pole.
12Balai dhari PANGERAN la napa’ ka adha’na labang saketheng Yerusalim! Daddi, oreng Marot ta’ kera ngarep partolongan.
13Ba’na pandhudhu’ Lakhis, pasang jaran ka kareta perrang! Ba’na ro-nero sa-dusana oreng e Isra’il sampe’ Yerusalim pas noro’ dusa keya.
14Sateya, he, oreng Yehuda, ba’na bakal kaelangana kottha Moresyet-Gat. To-rato Isra’il ta’ kera olle bantowan pole dhari kottha Akhzib.
15He, oreng Maresya, bi’ PANGERAN ba’na bakal epassra’agiya ka moso se matelloga kotthana ba’na. Pamimpinna Isra’il se neggu’ kakobasa’an padha ngetegga e dhalem wa-guwa e Adulam.
16He, oreng Yehuda, ketthok obu’na ba’na jareya menangka tandha sossa mekkere na’-ana’na ba’na se kataresnan. Cokor cethagga ba’na pasampe’ gundhul akantha mano’ se ngakanan babathang, sabab na’-ana’na ba’na bakal eangko’a ka pambuwangan.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel