1Mara edhingngagi apa se earannagi PANGERAN ka Isra’il. Ngereng ngadek, GUSTE, ngereng dhabuwagi ponapa se eparkara’agiya sareng Junandalem! Diggal me’ olle gunong sareng gumo’ padha mereng ponapa se edhabuwagiya Junandalem.
2He, nong-gunong, he, sar-dhasarra bume, mara edhingngagi pa-apa se eparkara’agiya bi’ PANGERAN! Salerana kaagungan parkara ban Isra’il ommadda ban bangsa Isra’il jareya eparkara’agiya bi’ Salerana.
3PANGERAN adhabu, "He, Tang ommat, ba’na reya epabaramma bi’ Sengko’? E dhalem parkara apa Sengko’ masossa ba’na? Mara nyaot!
4Bi’ Sengko’ ba’na la egiba kalowar dhari Messer, ban epabebas dhari se ekadunor oreng; Sengko’ la ngotos Mosa, Harun ban Miriyam esoro mimpin ba’na.
5Tang ommat, kaenga’e apa se ekasajja Balak rato Mo’ab rowa ka ba’na, ban apa se esaoddagi Bileyam ana’na Beor ka Balak jareya. Kaenga’e badha kadaddiyan apa e parjalanan antarana parkemahan e Sitim ban e Gilgal. Mon ba’na enga’ ka jareya kabbi, ba’na tanto apangrasa apa se la elakone Sengko’ kaangguy masalamet ba’na."
6Apa se kodu eatorragi sengko’ ka PANGERAN, Allah se jumenneng e sowarga, mon sengko’ entara abakte ka Salerana? Apa sengko’ kodu ngeba sape ngodha se paleng bagus kaangguy eatorragi menangka kurban obbaran ka Salerana?
7Apa PANGERAN kerana sennengnga panggaliyanna mon sengko’ ngeba ka Salerana dumba abun-ebun otabana mennya’ jaitun se talebat bannya’na? Apa sengko’ kodu ngatorragi ka Salerana tang ana’ sareyang menangka tebbusanna tang sa-dusa?
8Enja’! PANGERAN la anyata’agi ka sengko’ ban ba’na apa se becce’. Se ekasokane dhari sengko’ ban ba’na pera’ sopaja sengko’ ban ba’na reya alako adil, ros-terrosan ngamallagi kataresna’an, sarta kalaban andhap asor odhi’ manyettong ban Allah.
9Bicaksana onggu mon oreng tako’ ka PANGERAN. Salerana aera’ ka reng-oreng kottha, "Mara edhingngagi, he, reng-oreng se padha akompol e kottha!
10E bengkona reng-oreng se jahat badha arta se ekaolle kalaban jalan nepo. Reng-oreng jareya ngangguy takerran palsu, settong lalakon se ekabaji’i bi’ Sengko’. Oreng se ngalakone jareya bi’ Sengko’ eokoma.
11Masa’ Sengko’ nyapora’a oreng se ngangguy tembangan palsu?
12Reng-oreng sogi e kotthana ba’na nyecce’ oreng mesken, ban ba’na kabbi padha lecegan.
13Sateya Sengko’ molae mokol ban maancor ba’na polana sa-dusana ba’na jareya.
14Ba’na bakal ngakana tape ta’ daddi kennyang — la’-mala’ paggun lapar. Ba’na bakal ngangko’a barang tape ta’ bisa maaman rang-barang jareya. Apa’a bai se epaaman ba’na, bi’ Sengko’ epaancora e dhalem paperrangan.
15Ba’na bakal nabura gandum, tape ta’ kera molong hasella. Ba’na bakal agabaya mennya’ dhari buwana jaitun, tape ta’ bisa ngangguy mennya’na. Ba’na bakal merressa aeng anggur, tape ta’ kera ngenom aeng anggur jareya.
16Jareya kabbi bakal kadaddiyana polana ba’na nero kajahadan-kajahadan se elakone Rato Omri ban ana’na, iya reya Rato Ahab. Ba’na noro’ ra-carana se kadhuwa jareya. Daddi Sengko’ maancora ba’na, ban ba’na bakal eya’-seya’a bi’ sakabbinna bangsa."
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel