Alkitab Mobile SABDA
[VER] : [MADURA]     [PL]  [PB] 
 <<  Mazmur 103 >> 

1Dhari Daud. Mara molja’agi PANGERAN, tang sokma, tang ate, mara molja’agi asmana se socce.

2Mara molja’agi PANGERAN, tang sokma, ja’ kaloppae kasaeyanna Salerana!

3Salerana se nyapora sakabbinna dusana ba’na, se mabaras sakabbinna panyakedda ba’na,

4Salerana se malopot nyabana ba’na dhari koburan, se marenge ba’na kataresna’an ban kabellasan se talebat bannya’na.

5Salerana se marenge odhi’na ba’na sabarang se becce’ se ta’ korang bannya’na sampe’ ba’na teptep ngodha akantha mano’ ellang raja.

6PANGERAN alampa’agi hokom ban kaadilanna, kaangguy sakabbinna oreng se tatendhes odhi’na.

7Salerana anyata’agi ka Mosa sabarang se elampa’agiya Salerana, bangsa Isra’il epanangale sabarang se elampa’agi Salerana.

8Sabab PANGERAN reya bellas ase, lanjang sabbarra ban kataresna’anna talebat rajana.

9Salerana ta’ abentak ros-terrosan, ta’ duka salanjangnga.

10Pangeran ta’ ngokom sengko’ ban ba’na satembang ban dusana, otabana apareng babales ka sengko’ ban ba’na satembang ban kasala’anna.

11Tape padha ban tenggina langnge’ e attassa bume, sajareya rajana kataresna’anna ka oreng se alem.

12Akantha jauna temor dhari bara’, sajareya keya jauna Salerana mowang sa-dusana sengko’ ban ba’na.

13Akantha oreng lake’ se neser ka na’-ana’na, kantha jareya taresnana PANGERAN ka oreng se alem.

14Sabab PANGERAN ngagali ekagabay dhari apa sengko’ ban ba’na reya, Pangeran emot sengko’ ban ba’na pera’ dhari abu tana.

15Odhi’na manossa sakejja’ akantha rebba, mekkar akantha kembang e teggal;

16mon eketbat angen laju elang mosna, la’-mala’ ta’ etemmo lampadda kennengnganna.

17Tape PANGERAN teptep taresna ka oreng alem, kabecce’anna ta’ ambu ron-temoron

18ka oreng se neggu’i parjanjiyanna, ban esto ajalannagi papakonna.

19PANGERAN marenta e sowarga; Salerana jareya rato se ngobasane sakabbinna.

20Molja’agi PANGERAN, kat-malaekat se parjuga, se meyarsa’agi ban alampa’agi dhabuna.

21Molja’agi PANGERAN, lok-mahlok e sowarga, sakabbinna abdina se ajalannagi kasokanna.

22Molja’agi PANGERAN, sakabbinna cepta’an se badha e baba kakobasa’anna. Molja’agi PANGERAN, tang sokma!



 <<  Mazmur 103 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel