1Molja’agi PANGERAN, tang sokma! Agung onggu Junandalem, Guste ALLAH, Pangeran kaula! Junandalem ngagem rasogan kabessaran sareng kamolja’an,
2sareng abuko’ caja. Junandalem ngampar langnge’ epakadi kemah,
3sareng maddek dalemmepon e attas aeng e langnge’. Dhem-ondhem sareng Junandalem ebadhi teteyan, Junandalem netene kalembang angen.
4Sareng Junandalem angen ebadhi otosan, dhap-keddhap ebadhi pangladin.
5Junandalem masang bume epakoko e langganna, kantos ta’ kera gundhek salanjangnga.
6Junandalem notobi bume sareng tase’ raja, aengnga ngambang kantos ka konco’na nong-gunong.
7E bakto sareng Junandalem ebentak, aeng gapaneka agili, pagilina banter lantaran garudhu’na sowarana Junandalem.
8Aeng agili lebat e nong-gunong ka dhalem cora, ka kennengngan se ampon esadhiya’agi sareng Junandalem.
9Junandalem nantowagi tes-bates se ta’ kengeng elebadi aeng gapaneka, sopaja ta’ kantos abali ngambang neng e bume.
10Junandalem magili somber e ra-cora, ka-cangkana songay epagili e ke’-lekke’na mo’-gumo’,
11badhi ngenome keban, maelanga pelka’na mar-hemar alas.
12E ma’-semma’na no’-mano’ abadhi lebunna, ngoce e dhalemmanna un-dhaunan.
13Junandalem matoron ojan dhari langnge’ epagaggar ka pagunongan, bume possa’ sareng hasel karyaepon Junandalem.
14Junandalem matombu rebba menangka teddhana ban-keban, matombu samacemmepon men-tamennan kaagem manossa. Daddi manossa kengeng men-tamennan,
15sareng ngasellagi aengnga anggur se nyaman. Jugan mennya’ jaitun se matera’ mowana, sareng teddha’an se madhateng kakowadan ka badanna.
16Ka’-bungka’anna se etamen PANGERAN dibi’, comara Libanon se gi-tenggi eparenge ojan sacokobba.
17E ka’dhissa’ no’-mano’ abadhi lebunna, ko’-dalko’ alebun e co’-konco’na.
18Nong-gunong se tenggi daddi kennengnganna embi’ alas; kancel ngetek neng e to-bato karang.
19Junandalem abadhi bulan menangka tandhaepon bakto, are oneng bilaepon baktona compet.
20Manabi Junandalem madhateng petteng, are laju malem, sadajana burun alas padha kalowar.
21Can-macan se gi’ ngodha agaung nyare mangsana, nyare teddha’an se esadhiya’agi Allah.
22Manabi are moncar, burun alas gapaneka padha nyengla, arendhu e pangetegganna.
23Manossa laju kalowar alalakona, terros alako kantos are para’ compedda.
24Bannya’ onggu karyaepon Junandalem, GUSTE, sadajana elampa’agi Junandalem kalaban bicaksana; bume possa’ sareng cepta’annepon Junandalem.
25Oladi tase’ se lebar ngampar ka’dhissa’, sareng mahlok raja kene’ se ta’ kabilang bannya’na.
26E tase’ gapaneka pal-kapal alajar, Lewiyatan, naga tase’ cepta’annepon Junandalem, en-maenan.
27Sadajana padha ngarep Junandalem, anante’ papareng teddha’an manabi ampon baktona.
28Junandalem marenge, sadajana padha neddha, Junandalem nyadhiya’agi teddha’an, sadajana padha kennyang.
29Manabi Junandalem malengos, sadaja padha tako’; manabi Junandalem mondhut nyabana, sadaja padha mate, abali daddi abu akadi asalla.
30Namong manabi sareng Junandalem eparenge nyaba, sadajana ecepta’agi; Junandalem apareng odhi’ se anyar ka bume.
31Moga kaagunganna PANGERAN teptebba salanjangnga! Moga Salerana sennengnga panggaliyanna ngoladi sadaja cepta’anna!
32Pangeran ngoladi ka bume sampe’ bume ngetter, nong-gunong esedding sampe’ okossa kalowar.
33Sengko’ anyanye kaagem ka PANGERAN saomorra, anyanye pojiyan kaator ka Allah saabidda sengko’ gi’ odhi’ e dunnya.
34Moga tang nyanyeyan katarema’a, sabab Salerana se maperak tang ate reya.
35Mandar oreng daraka epamosna’a dhari bume, oreng jahat mandar padha’a mate. Molja’agi PANGERAN, tang sokma! Molja’agi PANGERAN!
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel