1Kaangguy pamimpinna koor. Jaburra Daud. Kaangguy Yedutun. (39-2) Ca’na tang pekker, "Sengko’ ajaga’a tang aba’ sopaja sengko’ ta’ sampe’a agabay dusa bi’ tang jila. Sengko’ ta’ acaca’a mon gi’ badha oreng jahat e semma’na."
2(39-3) Sengko’ neng-enneng, ta’ acaca maske sakeccaba ta’ but-nyebbut pa-apa maske parkara se becce’. Tape tang kasossa’an ekarassa atamba berra’;
3(39-4) sengko’ ce’ ketterra rassana. Sajan epekker sajan sossa tang ate; dhi-budhina sengko’ ngoca’,
4(39-5) "Adhu GUSTE, ngereng abdidalem parenge oneng bila abdidalem se mateya, sopaja abdidalem onenga ja’ odhi’ abdidalem talebat pandha’na."
5(39-6) Junandalem apareng omor ka abdidalem ce’ pandha’na! Monggu ka Junandalem omor abdidalem tadha’ artena. Pajat lerres manossa tadha’ bidana sareng nyaba sasergu’an,
6(39-7) odhi’epon elang akadi jang-bajangan. Sadaja karepodanna tadha’ gunana; makompol arta, namong ta’ oneng pasera se ngangguya.
7(39-8) Samangken ponapa se enante’a abdidalem, Guste? Namong Junandalem pangarebban abdidalem.
8(39-9) Pabebassagi abdidalem dhari sadajana dusa abdidalem, ja’ kantos abdidalem eya-seya oreng se budhu.
9(39-10) Abdidalem neng-enneng, ta’ acaca, sabab Junandalem se masangsara abdidalem sapaneka.
10(39-11) Cabuddagi okomanna Junandalem ka’dhinto, Guste, Abdidalem ampon ta’ kellar akadi se mateya.
11(39-12) Manossa lantaran kasala’anna sareng Junandalem eparenge okoman; sadaja se raja argana ka oreng gapaneka sareng Junandalem epalejjar epakadi ngetnget Lerres, manossa ta’ lebbi dhari nyaba sasergu’an.
12(39-13) Peyarsa’agi du’a abdidalem, GUSTE, peyarsa’agi parnyo’onan ka’dhinto; ja’ mendel saos manabi abdidalem nanges. Akadi bangatowa abdidalem sadajana, namong sakejja’ saos abdidalem ngampong kennengngan ka Junandalem.
13(39-14) Ja’ ganggu abdidalem, me’ olle arassa senneng sanare namong sakone’ sabellunnepon abdidalem mangkat ta’ abali pole.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel