1Kaangguy pamimpinna koor. Jaburra Daud. (40-2) Sengko’ epasabbar anante’ partolonganna PANGERAN; Salerana pas meyarsa’agi sengko’ se aserrowan.
2(40-3) Bi’ Salerana sengko’ eangkes dhari lobang se babaja, epakalowar dhari cellot e raba. PANGERAN nyaba’ sengko’ e attassa gumo’ bato, sampe’ teggep tengka’na tang soko.
3(40-4) PANGERAN ngajari sengko’ nyanye lagu anyar, lagu pojiyan kaangguy Allahna sengko’ ban ba’na. Bannya’ oreng se nangale pas padha tako’ atena, sarta parcaja ka PANGERAN.
4(40-5) Bajjra oreng se parcaja ka Pangeran, se ta’ nyemba ka ba-diba, otaba menta tolong ka oreng se sombong.
5(40-6) GUSTE, saponapa bannya’epon se elampa’agi Junandalem kaangguy abdidalem sadaja, Guste ALLAH, Pangeran kaula, Junandalem tadha’ bandhinganna! Junandalem kaagungan sajja se makasambu’ ate kaangguy abdidalem sadaja, se bannya’epon ta’ kabilang.
6(40-7) Junandalem ta’ kasokan tor-ator sareng kurban sasajin, jugan ta’ mondhut kurban obbaran otabana kurban palebbarannepon dusa. Namong Junandalem marenge kopeng ka abdidalem sopaja merengnga sowaraepon Junandalem.
7(40-8) Abdidalem laju mator, "Ka’dhinto abdidalem, Guste, dhabuepon Junandalem badha e dhalem gulunganna buku sadaja.
8(40-9) Abdidalem senneng ajalannagi kasokannepon Junandalem, Guste, hokommepon Junandalem sareng abdidalem esempen e dhalem ate."
9(40-10) E dhalem kompolannepon ommadda Junandalem abdidalem aberta’agi kabar gumbira, kabar manabi Junandalem ampon masalamet abdidalem sadajana. Junandalem ngagali, GUSTE, abdidalem ta’ ambuwa ngabarragi parkara ka’dhinto sadaja.
10(40-11) Kabar kasalameddan ka’dhinto sareng abdidalem ta’ esempen e dhalem ate malolo, partolongan sareng kaestowannepon Junandalem ros-terrosan ekaberta sareng abdidalem. E adha’epon kompolanna ommattepon Junandalem abdidalem ta’ oneng neng-enneng; abdidalem terros ngabarragi kataresna’an sareng kaestowannepon Junandalem.
11(40-12) Adhu GUSTE, ja’ pegga’ kataresna’annepon Junandalem ka abdidalem; jaga’agi abdidalem saterrossa kalaban kataresna’an sareng kaestowannepon Junandalem.
12(40-13) Abdidalem ekeppong balai se bannya’, se ta’ kabilang bannya’na. Abdidalem eserser sa-dusa abdidalem kantos ta’ bisa nengale. Bannya’na alebbiyan dhari obu’ se badha e cethak abdidalem, kantos abdidalem potos pangarep.
13(40-14) Nyo’ona salamet abdidalem, GUSTE, ngereng duli tolong abdidalem, GUSTE!
14(40-15) Diggal reng-oreng se terro mateyana abdidalem me’ olle padha buru kabingongen. Diggal oreng se asorak nengale abdidalem palang me’ olle nyorot polana tako’ sareng eya-seya.
15(40-16) Diggal oreng se ngala’-gella’ abdidalem me’ olle takerjat sareng malo.
16(40-17) Sadajana oreng se nyemba ka Junandalem mandar eparengngana senneng sareng perak; sadajana oreng se asokkor polana epasalamet sareng Junandalem eparengngana terros ngoca’, "Agung onggu PANGERAN reya!"
17(40-18) Abdidalem ka’dhinto mesken sareng ta’ kowat, namong Junandalem emot terros ka abdidalem, Guste. Junandalem se nolong sareng panyalamet abdidalem, ngereng duli tolong abdidalem, Guste.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel