1E bakto hokomma Mosa ebaca’agi e adha’anna ra’yat, e dhalemma hokom jareya badha katerrangan se amonye kantha reya: "Oreng Amon ban oreng Mo’ab maske baramma’a ta’ olle apolong ban ommadda Allah;
2sabab e bakto bangsa Isra’il badha e dhalem parjalanan kalowar dhari Messer, bangsa se dhadhuwa’ jareya ta’ aberri’ ngakan ban ngenom ka bangsa Isra’il jareya. La’-mala’ ngopa Bileyam, esoro abasto bangsa Isra’il, tape bi’ Allah babaston jareya eoba epadaddi berkat."
3E bakto bangsa Isra’il ngedhing se kantha jareya buru, laju padha manyese reng-oreng manca jareya dhari masarakat Isra’il.
4Tape sabellunna jareya Imam Elyasib, se epangawase mar-kamar pangandhuwanna bahan kakanan e Padalemman Socce, andhi’ hubungan ban Tobiya.
5Bi’ Elyasib Tobiya jareya eberri’i settong kamar se raja se sabendherra kodu malolo egabay kennengnganna panyempennanna tor-ator gandum, mennyan, pakakassa Padalemman Socce, tor-ator kaangguy para imam, parsapolowanna gandum, anggur ban mennya’ jaitun, se ebagiya ka reng-oreng Lewi, para tokang mosik ban panjagana labang sakethengnga Padalemman Socce.
6E bakto badha kadaddiyan jareya, sengko’ teppa’na tadha’ e Yerusalim, sabab e taon se kapeng tello polo dhuwa’ pamarenta’anna Artahsasta, rato Babil rowa, sengko’ entar ka Babil areppoda ka rato. Sengko’ buru olle edi saellana anante’ abak abit
7abali ka Yerusalim. Sanapa’na dha’ enna’, sengko’ takerjat saellana tao ja’ Elyasib aberri’ kamar e Padalemman Socce ka Tobiya.
8Sengko’ ce’ peggella, ban rang-barangnga Tobid bi’ sengko’ epelpallagi ka lowar kabbi.
9Sengko’ pas nyoro sopaja ebadha’agi opacara maberse mar-kamar jareya. Saellana jareya tor-ator gandum ban mennyan sarta kas-pakakas Padalemman Socce bi’ sengko’ epabali kabbi ka mar-kamar jareya.
10Laen dhari jareya sengko’ nemmone keya ja’ para tokang tabbuna mosik ban reng-oreng Lewi padha nyengla dhari Yerusalim abali alako e teggalla bang-sebang polana kabutowanna ta’ ecokobi bi’ ra’yat.
11Sengko’ laju maenga’ para pamimpin polana Padalemman Socce edina ta’ eoros. Reng-oreng Lewi ban tokang tabbuna mosik jareya bi’ sengko’ esoro abali ban esoro ajalannagi pole lalakonna bang-sebang.
12Ra’yat pas padha molae pole aberri’ tor-ator parsapolowan se aropa gandum, anggur ban mennya’ jaitun, se pas esaba’ e pangandhuwanna bahanna kakanan.
13Sengko’ mele reng-oreng se kasebbut e baba reya esoro ngawase mar-kamar pangandhuwanna bahan kakanan: Imam Selemiya, Zadok ahli Hokom ban Pedaya oreng Lewi. Hanan ana’na Zakur kompoyya Matanya bi’ sengko’ esoro nolonge. Sengko’ tao reng-oreng jareya ekenneng parcaja, tanto jujur ngoros pambagiyanna han-bahan kakanan jareya ka ca-kancana se padha alako e jadhiya.
14Ya, Allah, kaemodi sadaja se elakone abdidalem kaangguy Padalemmannepon Junandalem sareng sadajana pangladinanna.
15E jaman jareya sengko’ nangale’e e Yehuda badha reng-oreng se merres anggur e are Sabat. Badha pole reng-oreng se mowa’ gandum, aeng anggur, buwana anggur ban buwana ara sarta rang-barang laenna, ebuwa’ hemarra egiba ka Yerusalim. Bi’ sengko’ reng-oreng jareya ta’ ebagi awal-juwal e Yerusalim.
16Bariya keya badha reng-oreng dhari Tirus se enneng e Yerusalim, ngeba juko’ ban acem-macem barang dagangan laenna ka Yerusalim e are Sabat, ejuwala ka reng-oreng Yehuda.
17Sengko’ maenga’ para pamimpin Yehuda, ngoca’ kantha reya, "Ponapa sampeyan ta’ apangrasa ja’ sampeyan alako jahat lantaran ta’ atoro’ ka atoranna are Sabat?
18Gu ta’ lantaran dusa se kantha ganeka Allah ngokom bangatowana sampeyan sareng kaula sarta pas maancor kottha paneka? Ponapa samangken sampeyan namba’ana dadukanna Allah ka Isra’il kalaban macemmer are Sabat paneka?"
19Daddi sengko’ marenta’agi sopaja mon teppa’ parmola’anna are Sabat, iya areya Juma’at malem, bang-labang sakethengnga kottha sopaja etotop kabbi mon are la para’ compedda, ban ta’ olle ebukka’ sampe’ are Sabat la lebat iya areya e Satto lem-malem. E bang-labang saketheng jareya bi’ sengko’ esaba’i tang reng-oreng sopaja tadha’a barang dagangan se egiba maso’ ka dhalem e bakto are Sabat.
20Tape dhang-kadhang badha reng-oreng se adagang ban ajuwal barang daganganna jareya se ngenep e lowarra geddhung Yerusalim e are Juma’at malem.
21Sengko’ ngoca’ ka reng-oreng jareya, "Parcoma ba’na anante’ sampe’ laggu e jadhiya. Senga’, mon ba’na gi’ ros-terrosan kantha jareya, bi’ sengko’ etangkebba!" Molae dhari jareya reng-oreng jareya ta’ tao dhateng pole e are Sabat.
22Reng-oreng Lewi bi’ sengko’ pas esoro mabadha opacara ababerse, sarta esoro ajaga e bang-labang saketheng kaangguy ngawase sopaja reng-oreng ngormadi are Sabat. Sengko’ adu’a, "Ya, Allah, kaemodi abdidalem lantaran parkara ka’dhinto jugan; nyo’ona kabellasi abdidalem menorot kataresna’an sareng kaestowannepon Junandalem se raja."
23E jaman jareya keya sengko’ nangale’e ja’ bannya’ reng-oreng Yahudi se abine babine’an Asdod, babine’an Amon ban babine’an Mo’ab.
24Sabagiyan dhari ana’na reng-oreng jareya ta’ ngarte basa Yahudi, tape ngarte basa Asdod otaba basa manca se laen.
25Bi’ sengko’ reng-oreng jareya epaenga’ ban ebasto; e antarana badha se epokole, egumba’ obu’na sarta esoro asompa bit asmana Allah ja’ reng-oreng jareya ban na’-ana’na ta’ akabina campor pole.
26Ca’na sengko’, "Sulaiman, rato Isra’il rowa, gu ta’ tao agabay dusa kantha jareya lamba’? Tadha’ rato se alebbiyan dhari Sulaiman e dunnya reya. Sulaiman ekataresnae Allah, bi’ Allah epajumenneng rato saantero Isra’il, tape maske bariya Sulaiman tanoro’ keya ka dhalem dusa polana tagudha babine’an nagara manca jareya.
27Daraka onggu ba’na reya! Bangal ta’ atoro’ ka dhabuna Allah kalaban abine babine’an manca."
28Yoyada reya ana’na Imam Agung Elyasib, tape badha ana’na Yoyada se ekamanto Sanbalat dhari kottha Bet-Horon. Daddi bi’ sengko’ Yoyada jareya etondhung dhari Yerusalim!
29Sengko’ adu’a, "Ya, Allah, kaemodi kadi ponapa reng-oreng ka’dhinto makocem nyamaepon imam sareng parjanjiyannepon Junandalem sareng para imam sareng reng-oreng Lewi!"
30Daddi sengko’ la maberse bangsa Isra’il dhari sabarang se kasambung ban bangsa manca. Sengko’ neptebbagi atoran-atoran kaangguy para imam ban reng-oreng Lewi, sampe’ reng-oreng jareya padha andhi’ lalakon se wajib elakone bang-sebang.
31Sengko’ ngator keya sopaja to-sabakto bisa esadhiya’agi kaju kaangguy tor-ator kurban ban ra’yat bisa ngeba tor-ator hasel bumena se dha’-adha’. Dhi-budhina sengko’ adu’a, "Ya, Allah, kaemodi sadaja ka’dhinto, sareng berkadi abdidalem."
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel