1Sanbalat, Tobiya, Gesyem ban reng-oreng laenna se ngamoso sengko’ ban reng-oreng Yahudi padha ngedhing ja’ reng-oreng Yahudi la mare se mateppa’ geddhungnga kottha reya, ban ja’ lobangnga la etotobi kabbi, maske e bakto jareya labangnga bang-labang sakethengnga kottha jareya gi’ ta’ epobu.
2Sanbalat ban Gesyem laju akerem onjangan ka sengko’. Sengko’ epenta mabadha rapat ban reng-oreng jareya e sala settongnga disa neng e Cora Ono. Tape sengko’ tao ja’ reng-oreng jareya andhi’ maksod macalaka’a sengko’.
3Daddi sengko’ laju akerem balessan kantha reya, "Kaula ta’ kengeng dhateng polana kalerressan badha lalakon se penting. Lalakon paneka tanto ta’ ajalan mon bi’ kaula edina’agi kaangguy arapat sareng panjennengngan."
4Sampe’ pa’ kale reng-oreng jareya se akerem onjangan ka sengko’ se essena padha ban onjangan se dha’-adha’, ban sabban narema onjangan jareya sengko’ akerem balessan se padha akantha se dha’-adha’ keya.
5Se kapeng lema’na orengnga Sanbalat magi sorat se abukka’ ka sengko’,
6se essena kantha reya, "Gesyem ngakone ja’ pajat lerres badha rarasan e kalangan sa-bangsa e ma’-semma’na ka’iya, se ngoca’ ja’ panjennengngan ban sadajana oreng Yahudi agabay rancana aberonta’a, ban ganeka sababba panjennengngan malerres geddhungnga kottha. Gesyem ngoca’ jugan ja’ panjennengngan terro daddiya rato Yehuda,
7sarengngan ampon mele bi-nabbi se epakona ngangkat sampeyan daddi rato e Yerusalim. Rarasan gapaneka dhi-budhina tanto napa’ ka rato. Daddi ngereng panjennengngan earep rabuna ka ka’dhinto, eajaga aparembagan."
8Tape sengko’ ngerem balessan kantha reya, "Sadaja se edhabuwagi sampeyan ganeka lecek, karanganna sampeyan dibi’."
9Reng-oreng jareya ngoddi ko’-nako’e sengko’ ban en-laenna, maksodda sopaja lalakon rowa eambuwana. Sengko’ adu’a, "Adhu, Guste Allah, nyo’ona kowat abdidalem, Guste!"
10Ra-kera e baja teya sengko’ entar ka bengkona Semaya ana’na Delaya kompoyya Mehetabe’el, sabab oreng jareya andhi’ alangan ta’ ngenneng entar ka sengko’. Oca’na ka sengko’, "Ngereng panjennengngan sareng abdina ngetek e Padalemman Socce. Labangnga konci sadaja, sabab badha oreng se mateyana panjennengngan. Olle daddi dhaggi’ malem panjennengngan epateyana oreng."
11Tape sengko’ nyaot, "Masa’ sengko’ buruwa! Sengko’ reya oreng biyasa, ta’ olle maso’ ka Padalemman Socce, dhaggi’ sengko’ mate. Enja’, sengko’ ta’ endha’."
12Saellana ebang-tembang bi’ sengko’, sengko’ pas apangrasa ja’ pangajagga Semaya jareya banne dhari Allah, tape dhari Tobiya ban Sanbalat. Semaya esogo’ esoro ngoca’agi nobuwat jareya ka sengko’.
13Maksodda me’ olle sengko’ tako’ sarta pas norodi oca’na reng-oreng jareya, daddi sengko’ pas dusa. Kalaban cara se kantha jareya, reng-oreng jareya pas olle kasempadan majuba’ tang nyama sopaja sengko’ daddiya rasanna oreng.
14Sengko’ adu’a, "Adhu, Guste Allah, kaemodi ponapa se elakone Tobiya sareng Sanbalat ka’dhinto. Okommagi se kadhuwa gapaneka, Guste. Sapaneka jugan nabbi babine’ se anyama Nowaja sareng bi-nabbi laennepon se ko’-nako’e abdidalem."
15Se mateppa’ geddhung rowa ngabi’ bakto saeket dhuwa’ are, ban mare e tanggal sagame’ bulan Elul.
16E bakto so-moso e antarana sa-bangsa se badha e sabingkerra kottha ngedhing parkara jareya, arassa tako’ ta’ andhi’ mowa, sabab oreng padha tao ja’ lalakon jareya ejalannagi kalaban partolonganna Allah.
17Sabatara jareya para pamimpin Yahudi gi’ rat-soradan bi’ Tobiya.
18Bannya’ oreng Yahudi akanca ban Tobiya, sabab Tobiya jareya mantona Sekhanya ana’na Arah. Apa pole Yokanan, ana’na Tobiya, abine ana’na Mesulam ana’na Berekhya.
19Maske Tobiya ros-terrosan noles sorat ka sengko’, se maksodda ko’-nako’ana sengko’, tape para pamimpin Yahudi ros-terrosan but-nyebbut e adha’anna sengko’ sabarang kabecce’anna Tobiya, ban sabarang se ekoca’agi sengko’ ekabala ka Tobiya jareya.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel