Alkitab Mobile SABDA
[VER] : [MADURA]     [PL]  [PB] 
 <<  Obaja 1 >> 

1Reya’ ramalanna Obaja, se aropa pessen dhari GUSTE Allah Se Mahatenggi parkara bangsa Edom: PANGERAN la ngerem otosanna ka sa-bangsa, sengko’ ban ba’na la ngedhing parkara pessen se egiba para otosan jareya, iya reya, "Mara aya-sadhiya se aperranga! Mara ja’ mangkada nyerrang Edom!"

2Ban ka Edom, PANGERAN adhabu, "Bi’ Sengko’ ba’na epata’andhi’a kakowadan, sopaja ba’na eya’-seya’a bi’ sakabbinna bangsa.

3Ba’na ekenneng tepo atena se angko. Ibu kotthana ba’na gunong bato se koko; kennengnganna ba’na e konco’na gunong se tenggi. Daddi ba’na apekker, ‘Sapa se bisa’a malabu Sengko’?’

4Maske bengkona ba’na tenggina epakantha tenggina lebunna mano’ rajabali, akantha tenggina tang-bintang e langnge’, bi’ Sengko’ masthe epalabu.

5Maleng ban rampok se dhateng e baja malem, pera’ ngala’ sabarang se ekaterrowe. Mon oreng se metthek anggur e kebbun, masthe gi’ badha se edina e bungkana. Tape ba’na epatompes tadha’ karena bi’ mosona.

6He, toronanna Esau, ba’na egaludhak bi’ mosona ban dhi’-andhi’na ba’na se eerrep erampas.

7Ba’na eco-koco bi’ sakutuna, ban eojuk dhari nagarana. Ba’na epakala bi’ bat-sobadda, ejebbak bi’ oreng se ngakan abareng ban ba’na. Reng-oreng jareya padha atanya parkara ba’na, ‘E dhimma sateya sakabbinna kapenterranna?’

8E are baktona Sengko’ ngokom Edom, reng-orengnga se ter-penter bi’ Sengko’ epateyana. Sakabbinna kabicaksana’anna bakal mosna’a, tadha’ lampadda.

9Para parjurit dhari Téman bakal padha’a katako’an ban parjurit Edom bakal tebasa kabbi."

10"Ba’na kejjem ka tan-taretanna, toronanna Yakub; daddi ba’na bakal epamateya, ban ecaleya oreng salanjangnga jaman.

11Ba’na manjeng e jauna e are baktona moso arosak labangnga Yerusalim ban makala kottha jareya. Ba’na neng-enneng malolo e bakto moso ngangko’ sakabbinna dhi’-andhi’na Yerusalim se bi’ moso pas ebagi e antarana reng-orengnga dibi’. Ba’na padha jahadda ban moso jareya.

12Ba’na ta’ sapantessa senneng nangale’e papasthenna oreng Yehuda se palang sarta arassa senneng e are teppa’na taretanna ba’na mate. Ta’ sapantessa ba’na raja caca e bakto taretanna ba’na sossa.

13Ta’ pantes ba’na maso’ ka kotthana Tang ommat, nyoragi reng-oreng se nanggung kasossa’an, apa pole arampok dhi’-andhi’na e are teppa’na aba’na palang!

14Ta’ sapantessa ba’na manjeng e tapadhangdhang ngaddhanga reng-oreng se buru dhari moso otabana massra’agi reng-oreng jareya ka mosona e are teppa’na reng-oreng jareya nemmo kasossa’an."

15"Onggu, la para’ arena, Sengko’, PANGERAN, se ngadilana sa-bangsa. Apa se elakone Edom bakal ebalessa ka aba’na. Edom bakal taowa rassana keya apa se la elakone aba’na.

16E attassa Tang gunong se socce Tang ommat la ngenom nom-enoman okoman se pae’. Tape nom-enoman kaangguy sa-bangsa e bume reya jang pae’an pole. Okomanna jareya ta’ ekenneng tolak. Kodu eenom sampe’ tadha’, saellana jareya reng-oreng jareya bakal mosna’a tadha’ lampadda."

17"Tape e Gunong Siyon bakal badha’a se salamet, ban gunong jareya daddi kennengngan kaangguy Sengko’ malolo. Toronanna Yakub bakal ngaandhi’a pole tana sangkolanna.

18Tang ommat Isra’il bakal padha’a ban apoy se ngello’ toronanna Esau sampe’ katonon tadha’ karena akantha apoy se ngello’ darameyan e teggal. Tadha’ settonga dhari toronanna Esau se lopoda. Sengko’, PANGERAN, la ngoca’!

19Reng-oreng Yehuda Lao’ bakal ngobasa’ana Edom. Reng-oreng dhari pagunongan bagiyan bara’ bakal makala’a baba Filistin. Suku Benyamin bakal ngobasa’ana Gileyad, ban Isra’il Tang ommat bakal ngobasa’ana saantero Efraim ban Samaria.

20Oreng Isra’il dhaja bakal abaliya dhari pambuwanganna ban ngobasa’ana Fenisia sampe’ ka Zarfat. Reng-oreng Yerusalim se ebuwang e Sardis, bakal abaliya ban ngaandhi’a tha-kottha e bagiyan lao’na Yehuda.

21Pandhudhu’ Yerusalim se jaja bakal nyerranga Edom ban matellok nagara jareya. Ban Sengko’, PANGERAN, bakal marenta’a menangka rato."



 <<  Obaja 1 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2021
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran