Alkitab Mobile SABDA
[VER] : [MADURA]     [PL]  [PB] 
 <<  Pengkhotbah 3 >> 

1Sabarang se badha e dunnya reya kadaddiyan e bakto se la etantowagi bi’ Allah.

2Allah nantowagi bila baktona se lahirra ban bila se mateya, bila se namenna ban bila se molonga,

3bila se mateyana ban bila se mabarasa, bila baktona se magujura ban bila se maddegga.

4Allah nantowagi bila baktona se agella’a ban bila se nangesa, bila baktona se agingginga ban bila se atariya,

5bila lalake’ ban babine’ se tedhunga apolong otaba se alaena, bakto alu’-gellu’a ban bakto ngampedda napsona.

6Allah nantowagi bakto bila se nemmowa ban bila se kaelangana, bakto kaangguy nyempen pesse ban bila se wang-mowanga,

7bakto kaangguy nyebbit ban bakto kaangguy ajai’, bakto kaangguy neng-enneng ban bakto kaangguy acaca.

8Allah nantowagi baktona se baji’a ban bila se taresna’a, bila baktona se aperranga ban bila se rokona.

9Apa ollena sengko’ ban ba’na se alako sampe’ lesso?

10Sengko’ tao bi’ Allah manossa eparenge tanggungan se berra’.

11Salerana la nantowagi bakto se teppa’ kaangguy apa’a bai. Sengko’ ban ba’na padha eparenge pekkeran terro taowa parkara se bakal dhatengnga, tape ta’ sanggup ngarte apa se elampa’agi Allah dhari awwal sampe’ aher.

12Sengko’ tao ja’ monggu ka sengko’ ban ba’na tadha’ se lebbi becce’ dhari neng-sennengngan ban ngarassa’agi kobassana odhi’ saomorra.

13Lebbi becce’ sengko’ ban ba’na kabbi ngakan ban ngenom ban ngarassa’agi hasella lakona. Jareya paparengnga Allah.

14Sengko’ tao ja’ sakabbinna ollena se elampa’agi Allah bakal badha’a terros salanjangnga. Manossa ta’ bisa nambai otaba ngorange. Bi’ Allah epakantha jareya sopaja sengko’ ban ba’na tako’a ka Salerana.

15Se kalakon sateya, la kalakon sabellunna. Se bakal badha’a, la abit se badha. Allah nantowagi sopaja se la kadaddiyan, kadaddiyan pole.

16Badha pole se etangale’e sengko’ e dunnya reya: e kennengngan se samasthena badha kaadilan ban kabecce’an, e jadhiya badha kajahadan.

17Ca’na tang pekker, Allah bakal ngadilana oreng se becce’ ban se jahat, sabab saneyap parkara ban saneyap lalakon bakal kalakona teppa’ e bakto se la etantowagi bi’ Allah.

18Daddi pandha’na ca’na sengko’: Allah reya ngoji sengko’ ban ba’na kaangguy noduwagi ja’ papasthenna sengko’ ban ba’na reya tadha’ bidana ban papasthenna keban.

19Maske baramma’a, papasthenna manossa ban keban reya padha bai. Se settong mate, se laenna bariya keya. Se dhadhuwa’ jareya padha mahlok. Daddi, manossa ta’ apojuran dhari burun alas, sabab monggu ka se dhadhuwa’ jareya odhi’ reya tadha’ gunana.

20Kennengngan se etojju se dhadhuwa’ jareya padha. Asalla padha dhari abu ban padha abaliya ka abu.

21Sengko’ ban ba’na ta’ tao apa errohna manossa reya ongga ka attas ban errohna keban toron ka tana.

22Daddi sengko’ apangrasa ja’ monggu ka manossa tadha’ se lebbi becce’ dhari ane’madi hasella lalakonna. Laen dhari jareya tadha’ pole se bisa elakone. Manossa ta’ kera tao apa se kadaddiyana saellana mate.



 <<  Pengkhotbah 3 >> 


Bahan Renungan: SH - RH - ROC
Download
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
© 2010-2021
Alkitab.SABDA.org

Android.SABDA.org
SABDA.mobi
Bantuan
Single Panel

Laporan Masalah/Saran