1"Areya’ kom-hokom se kodu eta’adi ba’na saomorra e nagara paparengnga PANGERAN, Allahna bangatowana ba’na!
2Mon ba’na la napa’ ka nagara jareya, paancor sakabbinna kennengngan se eangguy bangsa jareya nyemba ka la’-alla’anna e attas nong-gunong se tenggi, e mo’-gumo’ ban e babana ju-kajuwan se rampa’.
3Parosak ba-mezbana, pagujur lar-pelarra se eanggep karamat. Obbar bang-lambangnga dewi Asyera, paancor ca-arca brahalana, sopaja la’-alla’an jareya ta’ sampe’a esemba pole e ngan-kennengngan jareya.
4Mon ba’na nyemba ka GUSTE Allahna, ja’ nero carana reng-oreng jareya mon nyemba la’-alla’anna.
5E nagara Isra’il GUSTE Allahna ba’na bakal meleya settong kennengngan se eangguya bangsa Isra’il ngadhep ka ajunanna ban nyemba Salerana.
6Ba’na kodu entar ka jadhiya mon ngeba’a ban-kurban obbaran ban ban-kurban laenna, tor-ator parsapolowan ban tor-ator laenna, kurban ngessa’agiya neyat, kurban sokalella ban budhu’na sape sarta embi’ ban dumba se sareyang.
7E kennengngan jareya keya, e ajunanna GUSTE Allahna, ba’na ban saessena bengkona kodu ngakan sambi agumbiraan polana ba’na eberkadi GUSTE Allahna e dhalem usahana sampe’ ahasel.
8Mon bakto jareya la napa’, ba’na ta’ olle kantha sateya pole. Sampe’ sateya reya ba’na abakte ka Pangeran sakarebba dibi’,
9sabab ba’na gi’ ta’ maso’ ka nagara paparengnga GUSTE Allahna se bakal daddiya kennengnganna ba’na se teptep, kennengnganna ba’na odhi’a taremtem salanjangnga.
10Mon ba’na la alengka Songay Yordan, bi’ GUSTE Allahna ba’na bakal etolonga sopaja bisa’a ngobasane tana jareya. Ba’na bakal ejaga’a bi’ Salerana dhari mosona ban ba’na bakal odhi’a aman ban taremtem.
11Saellana jareya GUSTE Allahna ba’na bakal meleya settong kennengngan se kodu egabay kennengnganna oreng abakte ka Salerana. Ba’na kodu entar ka jadhiya mon ngeba’a sabarang se eparenta’agi bi’ sengko’, iya areya kurban obbaran ban ban-kurban laenna, tor-ator parsapolowan ban tor-ator se ejanjiyagi ba’na malolo ka PANGERAN.
12Ba’na agumbiraan e ajunanna GUSTE Allahna, abareng ban na’-ana’na, nor-dunorra ban reng-oreng Lewi se badha e tha-kotthana ba’na, sabab oreng Lewi ta’ olle bagiyan tana akantha ba’na.
13Ba’na ta’ olle ngatorragi kurban e man-dhimman sakarebba dibi’;
14pera’ olle e kennengngan se epele PANGERAN e dhaerana sala settonga sukuna ba’na dibi’. Pera’ e jadhiya ba’na kodu ngatorragi kurban obbaran ban ngalakone sabarang laenna se la eparenta’agi sengko’ ka ba’na.
15Tape ba’na olle nyambelli ebin ban ngakan dagingnga e dhimma’a bai se ekennengnge ba’na. Ba’na olle ngakan bannya’na padha ban se eparengngagi PANGERAN ka ba’na. Sapa’a bai, se socce otaba se najjis, olle ngakan daging jareya, tadha’ bidana ban oreng ngakan dagingnga keddang otaba manjangan.
16Pera’ dharana ja’ kakan, kodu totta’ ka tana akantha aeng.
17Tape tor-ator parsapolowanna gandumma, anggurra otaba mennya’ jaitunna, sape otaba embi’ ban dumba sareyangnga, kurban pangessa’anna neyat, kurban sokalella otaba tor-ator laenna, ta’ olle kakan e bengkona.
18Ba’na ban na’-ana’na, nor-dunorra ban reng-oreng Lewi se badha e kotthana ba’na, kodu ngakan tor-ator jareya e ajunanna GUSTE Allahna, e kennengngan se la epele bi’ GUSTE Allahna. E jadhiya ba’na kodu agumbiraan polana usahana ba’na se eberkadi Pangeran.
19Jaga ja’ sampe’ kaom Lewi kalaparan saabidda ba’na badha e nagara jareya.
20Mon GUSTE Allahna ba’na la malebar tes-batessa nagarana ba’na akantha se la ejanjiyagi Salerana, ba’na olle ngakan daging sakarebba.
21Mon kennengnganna kabakteyan se epele GUSTE Allahna ba’na rowa ce’ jauna dhari kennengnganna ba’na, ba’na olle nyambelli sape otaba dumba otaba embi’ se eparengngagi PANGERAN ka ba’na, ban olle ngakan dagingnga e bengkona, akantha se la ekoca’agi bi’ sengko’ ka ba’na.
22Sapa’a bai, se socce otaba se najjis, olle ngakan daging jareya, tadha’ bidana ban oreng ngakan dagingnga keddang otaba manjangan.
23Tape daging se gi’ badha dharana ta’ olle kakan, sabab e dhalem dhara jareya badha nyabana, ban ba’na ta’ olle ngakan daging se gi’ badha nyabana.
24Dharana ta’ olle kakan; dhara jareya kodu ebuwang ka tana, akantha oreng se nyelen aeng.
25Mon ba’na atoro’ ka papakon jareya, PANGERAN tanto senneng panggaliyanna, odhi’na ba’na ban na’ potona tanto nyaman.
26Kurban ban tor-ator se la ejanjiyagi ba’na ka PANGERAN, kodu egiba ka kennengngan se la etantowagi bi’ PANGERAN.
27Kurban obbaran ban kurban se ekakan dagingnga kodu eatorragi e attassa mezbana GUSTE Allahna ba’na ban dharana kodu etotta’ ka attassa mezba jareya.
28Estowagi kabbi se eparenta’agi sengko’ ka ba’na reya, sopaja odhi’na ba’na ban na’ potona nyaman ban salamet salanjangnga amarga ba’na ngalakone barang se becce’ se ekasokane GUSTE Allahna."
29"GUSTE Allahna ba’na matompessa sa-bangsa e nagara reya, sopaja ba’na bisa’a ngobasane ban ngennengnge nagara jareya.
30Saellana sa-bangsa jareya epatompes, ba’na kodu te-ngate ja’ sampe’ ro-nero sa-bangsa jareya nyemba la’-alla’an, sabab lalakon jareya bakal madhatengnga balai.
31Ba’na ta’ olle nyemba GUSTE Allahna nerowe carana sa-bangsa jareya mon nyemba la’-alla’anna, sabab reng-oreng jareya nyemba la’-alla’anna ngangguy cara se daraka se ta’ ekasokane PANGERAN. La’-mala’ sa-bangsa jareya ngobbar ana’na dibi’ e mezbana, egabay kurban ka la’-alla’anna.
32Lakone sabarang se eparenta’agi sengko’ ka ba’na; ja’ tambai ban ja’ korange."
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel