1Dhi-budhina padha abali ka ra-ara beddhi lebat jalan se ka Tellok Akaba, akantha se edhabuwagi PANGERAN. Abit ba’na se ajalan e dhaera pagunongan Edom jareya.
2PANGERAN laju adhabu ka sengko’
3ja’ la cokop sengko’ ban ba’na alalana e dhaera jareya. Daddi sengko’ ban ba’na kodu ajalan ka dhaja.
4Saellana jareya sengko’ bi’ Pangeran epakon aberri’ du-petodu reya ka ba’na, ‘Ta’ abit pole bakal maso’a ka nagara Edom, dhaerana la-balana ba’na, iya areya toronanna Esau. Reng-oreng jareya bakal tako’a ka ba’na,
5tape ba’na ta’ olle nyerrang, sabab tanana reng-oreng jareya tadha’ se ebagiya ka ba’na maske sakone’a, sabab dhaera Edom bi’ Sengko’ la ebagi ka toronanna Esau.
6Ba’na olle melle kakanan ban nom-enoman dhari reng-oreng jareya.’
7Kaenga’e, ra, baramma PANGERAN se la aberkadi ba’na e dhalem sabarang se elakone ba’na. Ba’na ejaga ban epasalamet saabidda ajalan e ra-ara beddhi se lebar reya. Saabidda pa’ polo taon reya ba’na ejaga ban epasalamet sarta eparenge sabarang se ekabuto.
8Saellana jareya ba’na ajalan terros, dhari jalan se lebat e tha-kottha Elat ban Ezion-Geber ka Tase’ Mate, laju abiluk ka temor lao’ ka ra-ara beddhi Mo’ab.
9PANGERAN adhabu ka sengko’, ‘Oreng Mo’ab, toronanna Lot rowa, ja’ ca-anca. Bariya keya ja’ serrang. Nagara Ar bi’ Sengko’ la ebagi ka bangsa jareya, ban dhari tanana reng-oreng jareya bi’ Sengko’ tadha’ se ebagiya ka ba’na maske sakone’a.’"
10(Lamba’ Ar reya ekennengnge oreng Emim. Badanna ja-raja,padha ban oreng Enak, padha bangsana buta.
11Akantha oreng Enak, oreng Emim jareya enyamae keya oreng Refa’im, tape bi’ oreng Mo’ab enyamae oreng Emim.
12Lamba’ oreng Hori neng e Edom, tape eojuk sarta epatompes bi’ toronanna Esau, se saellana jareya ngennengnge tanana jareya; bariya keya bangsa Isra’il e budhi are ngojuk so-mosona dhari tana paparengnga PANGERAN jareya.)
13"Saellana jareya ba’na entas Songay Zered menorot se edhabuwagi PANGERAN ka sengko’ ban ba’na.
14Se entas Songay Zered jareya teppa’ tello polo ballu’ taon saellana mangkat dhari Kades-Barnea. Tantara dhari angkadan jareya la padha mate kabbi akantha se la edhabuwagi PANGERAN.
15Bi’ PANGERAN reng-oreng dhari angkadan jareya terros ekamoso sampe’ dhi-budhina kabbi padha epatompes.
16Saellana reng-oreng jareya padha mate kabbi,
17PANGERAN adhabu ka ba’na,
18‘Are teya ba’na lebada e dhaera Mo’ab, lebat dhari nagara Ar.
19Daddi ba’na bakal napa’a ka seddi’anna tanana oreng Amon, toronanna Lot. Reng-oreng jareya ja’ ca-anca ban ja’ perrange, sabab tana se bi’ Sengko’ la ebagi ka bangsa jareya tadha’ se ebagiya ka ba’na maske sakone’a.’"
20(Bannya’ oreng tao, dhaera jareya nagarana oreng Refa’im,Refa’im reya nyamana bangsa se lamba’ neng e jadhiya; bi’ oreng Amon reng-oreng jareya enyamae oreng Zamzumim.
21Bangsa jareya padha ban oreng Enak, badanna raja ban kowat; orengnga talebat bannya’na. Tape bi’ PANGERAN epatompes kabbi, daddi oreng Amon laju arebbu’ tanana sarta terros neng e jadhiya.
22Bariya keya se elampa’agi PANGERAN ka oreng Edom, toronanna Esau, se ngennengnge dhaera pagunongan Edom. Oreng Hori bi’ PANGERAN epatompes, daddi oreng Edom arebbu’ tanana sarta pas neng e jadhiya sampe’ sateya.
23Tana e salanjangnga paseser Tase’ Tengnga ekobasae ban ekennengnge reng-oreng dhari polo Kareta. Reng-oreng jareya matompes oreng Awi, iya areya oreng se asli e tana jareya, pas ngobasane sarta ngennengnge dhaera jareya sampe’ ka lao’ ka kottha Gaza.)
24"Saellana lebat dhari Mo’ab, PANGERAN adhabu ka ba’na, ‘Kassa’ sateya ba’na entas Songay Arnon. Sihon, rato Amori se marenta e Hesybon, ban nagarana bi’ Sengko’ ebagiya ka ba’na. Kassa’ serrang, nagarana kobasae.
25Molae dhari sateya sa-bangsa e dhimma’a bai bi’ Sengko’ epatako’a ka ba’na. Sapa’a bai bakal ngetterra katako’an mon ngedhing nyamana ba’na.’"
26"Saellana jareya sengko’ ngotos reng-oreng dhari ra-ara beddhi Kedemot ka Sihon, rato Hesybon, esoro manapa’ usul ngajak akanca; sengko’ apessen kantha reya:
27‘Abdidalem nyo’ona edi bangsa Isra’il ngamponga lebat e nagaraepon junandalem. Bangsa dalem ajalana terros, ta’ nyempanga dhari lorong raja.
28Teddha’an se eteddha sareng aeng se eenom bangsa abdidalem, ebajarana. Se ekaparlo bangsa abdidalem namong ngamponga lebat e nagara ka’dhinto,
29kantos entas Songay Yordan maso’a ka nagara se eparengngagi GUSTE Allah, Pangeran, ka bangsa abdidalem. Toronanna Esau se badha e Edom sareng oreng Mo’ab se badha e Ar jugan ampon ngedine bangsa abdidalem lebat e nagarana.’
30Tape bi’ Rato Sihon ba’na ta’ ebagi lebat e nagarana jareya. Rato jareya bi’ GUSTE Allahna ba’na epacengkal sarta epanekat sopaja ba’na bisa’a makala rato jareya ban ngobasane baba kakobasa’anna, se sampe’ sateya reya ekennengnge sengko’ ban ba’na.
31Saellana jareya PANGERAN adhabu ka sengko’, ‘Rato Sihon ban nagarana bi’ Sengko’ la ebagi ka ba’na; kala’ ban kennengnge nagara jareya.’
32Sihon pas dhateng abareng ban sakabbinna pasukanna merrangana ba’na e seddi’na kottha Yahas.
33Tape GUSTE Allahna ba’na marengngagi rato jareya ka ba’na, daddi rato jareya ban na’-ana’na sarta tantarana epakala kabbi bi’ ba’na.
34E bakto jareya keya ba’na arebbu’ ban maancor saneyap kotthana ban mate’e saneyap oreng se badha e tha-kottha jareya, lalake’an, babine’an ban na’-kana’. Kabbi epate’e epatadha’ karena.
35Ebin bi’ ba’na ekala’, ban tha-kotthana erampas.
36Kalaban partolonganna GUSTE Allah, sengko’ ban ba’na bisa arebbu’ sakabbinna kottha jareya, molae dhari Aroër e konco’na Cora Arnon, ban kottha se badha e cora jareya, sampe’ ka Gileyad. Tadha’ kottha se ta’ ekennenga kobasae bi’ ba’na maske pagar alassa koko.
37Tape ba’na ta’ nyander ka seddi’anna baba kakobasa’anna oreng Amon otaba penggirra Songay Yabok otaba tha-kottha e bagiyan pagunongan otaba e kennengngan laenna se elarang bi’ GUSTE Allahna ba’na."
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel