1Areya’ essena parjanjiyan se menorot dhabuna PANGERAN ebadhi Mosa ban bangsa Isra’il e bakto bangsa jareya badha e nagara Mo’ab. Parjanjiyan jareya menangka tamba’anna parjanjiyan se ebadhi PANGERAN bi’ bangsa jareya e Gunong Sinay.
2Mosa makompol sakabbinna oreng Isra’il, laju adhabu ka reng-oreng jareya, "Ba’na la nangale’e dibi’ apa se elampa’agi PANGERAN ka rato Messer, para pangraja ban saantero nagarana.
3Bariya keya ba’na la nangale’e sakabbinna balai se nako’e ban jat-mo’jijat sarta kaajiban-kaajiban se elampa’agi PANGERAN.
4Tape sampe’ sateya bi’ Salerana ba’na gi’ ta’ epangarte apa se ealame ba’na jareya.
5Pa’ polo taon abidda PANGERAN mimpin ba’na lebat e ra-ara beddhi, tape kalambi ban sandhalla ba’na ta’ endha’ laju ban alpo’.
6Ba’na ta’ andhi’ roti se ekakana, ta’ andhi’ aeng anggur otabana non-enoman kerras, tape bi’ PANGERAN ba’na eparenge sabarang se ekabuto ba’na sopaja ba’na taowa ja’ Salerana jareya GUSTE Allahna ba’na.
7Ban e bakto sengko’ ban ba’na napa’ ka kennengngan reya, Rato Sihon dhari Hesybon ban Rato Og dhari Basan merrange ba’na. Tape bi’ ba’na reng-oreng jareya epakala.
8Tanana bi’ ba’na erebbu’ pas egi-bagi ka suku Ruben, Gad ban sabagiyan dhari suku Manasye.
9Daddi ba’na kodu ngestowagi sakabbinna parjanjiyan reya, sopaja ba’na ahasela e dhalem sakabbinna usahana.
10Are teya ba’na kabbi padha manjeng e ajunanna GUSTE Allahna: sakabbinna kapala suku, para pamimpin, parwira, lalake’an,
11babine’an, na’-kana’ ban sakabbinna oreng manca se badha e antarana ba’na ban se nolonge ba’na ngetthok kaju ban mekol aeng.
12GUSTE Allah mabadha parjanjiyan ban ba’na, ban ba’na kabbi padha akompol e dhinna’ nyekkennana parjanjiyan reya sarta narema’a kawajiban-kawajibanna.
13Kalaban parjanjiyan jareya e are teya PANGERAN makoko ba’na daddi bangsana, ban Salerana daddi Allahna ba’na akantha se la ejanjiyagi ka ba’na ban ka bangatowana ba’na Ibrahim, Ishak ban Yakub.
14Parjanjiyan jareya ban sakabbinna kawajibanna ebadhi bi’ PANGERAN banne pera’ ban ba’na malolo,
15tape bi’ saneyap oreng se are teya manjeng e dhinna’, e ajunanna GUSTE Allah, ban bariya keya bi’ toronanna sengko’ ban ba’na se bakal dhatengnga."
16"Ba’na gi’ enga’ baramma odhi’na ba’na e Messer ban baramma ba’na se ajalan lebat e nagarana sa-bangsa laen.
17Ba’na la nangale’e ca-arca brahalana sa-bangsa jareya se majitjidan, se ekagabay dhari kaju, bato, salaka ban emmas.
18Daddi jaga ja’ sampe’ badha e antarana ba’na, lalake’ otaba babine’, kalowarga otabana suku se manjeng e dhinna’ sateya reya, se sampe’ abalik dhari GUSTE Allah polana nyemba’a la’-alla’anna bangsa laen. Lalakon jareya padha ban ramo’ se tombu daddi tamennan se pae’ ban badha raconna.
19E antarana ba’na se ngedhing parenta se kerras reya ja’ sampe’ badha se apekker ja’ odhi’na nyamana terros maskeya nekat noro’ karebba dibi’. Jareya bakal macalaka’a ba’na kabbi, reng-oreng se becce’ ban se jahat padha bai.
20PANGERAN ta’ kera nyapora oreng se kantha jareya. Sabaligga, oreng se kantha jareya tanto ekenneng babendunna PANGERAN se talebat rajana, ban samacemma balai se etoles e buku reya tanto ngenneng ka aba’na, sampe’ oreng jareya epatompes bi’ PANGERAN.
21Oreng jareya bi’ PANGERAN bakal ekagabaya conto ka sakabbinna suku Isra’il, ban eokom ban babaston se esebbuttagi e dhalem parjanjiyan se etoles e buku reya, buku Hokomma PANGERAN.
22E budhi are, toronanna ba’na ban oreng manca se asalla dhari nagara se jau bakal nangaleyana balai ban kasangsara’an se acem-macem se epadhateng PANGERAN ka nagarana ba’na.
23Gal-teggalla ba’na bakal daddiya tana kajal se topo bi’ balirang ban buja. Tanana ta’ ekenneng tamenne ban rebba ta’ endha’ tombu e jadhiya. Nagarana ba’na bakal daddiya akantha tha-kottha Sodom ban Gomora, Adma ban Zebo’im se bi’ PANGERAN epamosna e bakto ce’ dukana.
24Oreng sadunnya bakal atanya’a, ‘Arapa reng-oreng rowa me’ epakantha jareya bi’ PANGERAN? Arapa PANGERAN me’ ce’ sarana dukana?’
25Ban jawabba iya areya, ‘Polana reng-oreng jareya ta’ neptebbi parjanjiyanna PANGERAN, Allahna bangatowana; parjanjiyan se ebadha’agi Salerana ban reng-oreng jareya e bakto Salerana abakta reng-oreng jareya kalowar dhari Messer.
26Reng-oreng jareya ngabdi ka la’-alla’an se ta’ ekennal bi’ aba’na mangkana PANGERAN la alarang reng-oreng jareya nyemba ka la’-alla’an jareya.
27Jareya sababba PANGERAN duka ka ommadda ban madhateng ka nagarana sakabbinna balai se etoles e dhalem buku reya.
28PANGERAN ce’ dukana, ban e dhalem dukana se ce’ rajana jareya bangsa Isra’il ecabut dhari tanana ban epelpallagi ka nagara manca, daddi reng-oreng Isra’il jareya badha e jadhiya.’
29Badha rang-barang se eroseya’agi bi’ PANGERAN; tape Hokomma la enyata’agi ka ba’na kabbi, ban ba’na satoronanna kodu ngestowagi hokom jareya salanjangnga."
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel