1Mosa adhabu pole ka reng-oreng Isra’il,
2"Sateya tang omor la saratos dhu polo taon, sengko’ la ta’ sanggup pole mimpin ba’na. Laen dhari jareya PANGERAN la adhabu ja’ sengko’ ta’ eedine noro’ alengka Songay Yordan.
3GUSTE Allah dibi’ se alomampa’a e adha’anna ba’na, mateyana sa-bangsa se abengko e jadhiya, sopaja ba’na bisa’a ngobasane nagarana. Yusak se mimpina ba’na, akantha se la edhabuwagi PANGERAN.
4PANGERAN matompessa sa-bangsa jareya, padha ban se makala Sihon ban Og, ratona oreng Amori, ban maancor nagarana.
5Bi’ PANGERAN ba’na epamennanga ka sa-bangsa jareya, saellana jareya ba’na kodu atoro’ ka apa se epessennagi sengko’ parkara sa-bangsa jareya kodu epabaramma.
6Ba’na pakoko atena, ban pabangal. Ta’ osa tako’ ka sa-bangsa jareya, ba’na bakal etolonga bi’ GUSTE Allahna dibi’. Ba’na ta’ kera eco-koco ban ta’ kera edinggallagi bi’ Salerana."
7Mosa pas adikane Yusak, sarta pas adhabu e adha’na reng-oreng Isra’il, "Ba’na pakoko atena ban pabangal, Yusak! Ba’na se mimpina bangsa Isra’il reya se entara arebbu’ nagara se ejanjiyagi PANGERAN ka bangatowana.
8PANGERAN dibi’ se nontona ban nolongana ba’na. PANGERAN ta’ kera co-ngoco ban ta’ kera adinggallagi ba’na. Daddi ba’na ta’ osa tako’ otaba kene’ ate."
9Mosa pas nyerrat hokomma GUSTE Allah, laju eparengngagi ka mam-imam Lewi se epangoros Petthe Parjanjiyan, sarta ka para pamimpinna oreng Isra’il.
10Mosa makon kantha reya ka reng-oreng jareya, "Sabban pettong taon sakaleyan, e aher taon, e dhalem taon palebbaranna otang e bakto paraya’an Ranggun Dhaun,
11ba’na kodu maca’agi kom-hokom reya pakaja e adha’anna reng-oreng Isra’il se abakte ka GUSTE Allahna e kennengngan se etantowagi Salerana.
12Reng-oreng lalake’an ban babine’an, na’-kana’ ban oreng manca se abengko e tha-kotthana ba’na soro akompol, soro ngedhingngagi baca’an jareya, me’ olle reng-oreng jareya ajar hormat ka GUSTE Allahna sarta ngestowagi kon-papakonna.
13Kalaban cara se kantha jareya, na’-ana’na ba’na se gi’ ta’ tao ngedhing parkara hokomma GUSTE Allahna jareya pas daddi ngedhing, sarta pas ajar hormat ka Pangeran saabidda odhi’ e nagara se sakejja’ aggi’ reya bakal ekobasa’ana ba’na e bara’na Songay Yordan."
14PANGERAN pas adhabu ka Mosa, "Odhi’na ba’na e dunnya reya la ta’ abit pole. Daddi kassa’ olok Yusak, ajak ka Tang Kemah, bi’ Sengko’ eberri’ana du-petodu." Daddi Mosa ban Yusak laju meyos ka Kemah Socce,
15PANGERAN ngaton ka se kadhuwa jareya e dhalem pelar ondhem e seddi’na labangnga Kemah.
16Dhabuna PANGERAN ka Mosa, "Ba’na la para’ mateya, ban samatena ba’na, bangsa Isra’il ta’ esto pole ka Sengko’, ban ta’ neptebbi parjanjiyan se epabadha Sengko’ bi’ reng-oreng jareya. Reng-oreng Isra’il bakal mongkorana Sengko’ sarta pas nyemba’a ka la’-alla’an se esemba e nagara se sakejja’ aggi’ emaso’ana reng-oreng Isra’il jareya.
17Mon sampe’ kantha jareya, Sengko’ bakal peggella parana ka reng-oreng jareya. Reng-oreng jareya bi’ Sengko’ edina’agiya ban epatompessa. Bi’ Sengko’ epadhatengngana balai se nako’e sabannya’na, saellana jareya reng-oreng Isra’il buru apangrasa ja’ balai jareya dhateng polana aba’na eonduri bi’ Sengko’.
18E bakto jareya Sengko’ la ta’ endha’ nolonge reng-oreng jareya pole, polana reng-oreng jareya nyemba ka la’-alla’an ban alako jahat.
19Sateya mara toles nyanyeyan reya, ajarragi ka bangsa Isra’il menangka bukte se nerrangngagi salana reng-oreng jareya.
20Bi’ Sengko’ reng-oreng Isra’il jareya egiba’a ka nagara se sogi tor landhu, akantha se ejanjiyagi Sengko’ ka bangatowana. E dhissa’ reng-oreng jareya bakal sennengnga odhi’na ban bakal olleya sakabbinna kakanan se ekaparlo aba’na. Tape saellana jareya reng-oreng jareya bakal mongkorana Sengko’ pole, pas nyemba ka la’-alla’an. Reng-oreng jareya bakal nolaga Sengko’ ban mongkere Tang parjanjiyan,
21ban bakal bannya’a balai se nako’e se teba’a ka aba’na. Tape nyanyeyan reya bakal enyanyeyagiya terros, menangka bukte se nerrangngagiya salana reng-oreng jareya. La’-mala’ sateya reya, sabellunna Sengko’ ngeba reng-oreng jareya ka nagara se la ejanjiyagi Sengko’ rowa, Sengko’ la tao essena atena."
22E are jareya keya Mosa nyerrat nyanyeyan rowa, se pas eajarragi ka bangsa Isra’il.
23Saellana jareya PANGERAN adhabu ka Yusak, pottrana Nun, dhabuna, "Ba’na pakoko atena ban pabangal, Yusak! Ba’na se mimpina bangsa Isra’il maso’a ka nagara se ejanjiyagi Sengko’ ka reng-oreng jareya, ban Sengko’ se nolongana ba’na."
24Mosa pas nyerrat kom-hokomma PANGERAN e dhalem buku. Se nyerrat epangastete, dhari adha’ sampe’ ka budhi.
25Saellana mare pas adhabu ka mam-imam Lewi se epangoros Petthe Parjanjiyan, dhabuna,
26"Giba buku Hokomma Allah reya, saba’ e seddi’anna Petthe Parjanjiyanna GUSTE Allahna, sopaja pagguna badha e jadhiya menangka bukte se nerrangngagi salana bangsa reya.
27Sengko’ tao bangsa Isra’il reya ce’ cengkalla ban dujan aberonta’. E bakto sengko’ gi’ odhi’ bai reng-oreng jareya la aberonta’ ka PANGERAN; apa pole mon sengko’ la mate!
28Sateya mara pakompol e adha’anna sengko’ reya para pamimpinna bangsa Isra’il ban para parwirana, polana badha se ekoca’agiya sengko’. Langnge’ ban bume bi’ sengko’ epadaddiya sakse ka reng-oreng jareya.
29Sengko’ tao, ja’ mon sengko’ la mate, oreng Isra’il tanto daraka’a pole ban ta’ endha’ atoro’ ka sabarang se la eajarragi bi’ sengko’. Pagi’ reng-oreng jareya bakal nemmowa balai, sabab PANGERAN duka polana reng-oreng jareya ngalakone sabarang se elarang PANGERAN."
30Saellana jareya Mosa laju anyanye sampe’ mare, eedhingngagi bi’ sakabbinna ommat Isra’il.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel