1Dhabuna Mosa ka ommat Isra’il, "Mara toro’ sakabbinna hokom se la eajarragi sengko’ ka ba’na, sopaja ba’na gi’ odhi’a sampe’ ngennengnge nagara se eparengngagi ka ba’na bi’ PANGERAN, Allahna bangatowana ba’na.
2Apa se eparenta’agi sengko’ ka ba’na jareya ja’ sampe’ etambai otaba ekorange. Toro’ sakabbinna papakonna GUSTE Allahna ba’na, se bi’ sengko’ la ekabala ka ba’na.
3Ba’na la nangale dibi’ apa se elampa’agi PANGERAN e Gunong Peyor. Oreng se nyemba Ba’al e jadhiya padha epatompes kabbi,
4tape ba’na se gi’ esto ka GUSTE Allahna, sampe’ sateya gi’ paggun odhi’.
5Sengko’ la ngajarragi sakabbinna hokom jareya ka ba’na, akantha se edhabuwagi GUSTE Allah, tang PANGERAN, ka sengko’. Ta’adi kom-hokom jareya e nagara se emaso’ana ban ekobasa’ana ba’na jareya.
6Ta’adi saterrossa, ban dhari jareya sa-bangsa laen bakal taowa ja’ ba’na reya bicaksana onggu. Mon sa-bangsa jareya ngedhing parkara kom-hokom jareya, tantona pas ngoca’ bariya, ‘Bangsa se raja reya ce’ bicaksanana ban ce’ penterra!’
7Tadha’ bangsa laen, sanajjan tamaso’ bangsa se raja, se andhi’ la’-alla’an se ce’ semma’na mon teppa’ ekabuto, akantha GUSTE Allah, Pangeranna ba’na se ce’ semma’na ka sengko’ ban ba’na. GUSTE Allah nyaot bila’a bai ba’na aera’ menta tolong.
8Tadha’ bangsa laen, sanajjan tamaso’ bangsa se raja, se andhi’ kom-hokom se ce’ adilla akantha kom-hokom se eajarragi sengko’ ka ba’na are teya.
9Senga’ te-ngate! Kaenga’e ban ja’ sampe’ loppa ka apa se etangale bi’ matana ba’na dibi’. Careta’agi ka na’ potona parkara are rowa,
10e bakto ba’na kabbi manjeng e ajunanna GUSTE Allahna, e Gunong Sinay, e baktona Pangeran adhabu kantha reya ka sengko’, ‘Pakompol bangsa jareya. Soro ngedhingngagi pa-apa se ekoca’agiya Sengko’, sopaja bangsa jareya ajar ta’at ka Sengko’ saomorra, ban sopaja na’-ana’na eajarana ta’at ka Sengko’.’
11Careta’agi ka na’-ana’na ba’na baramma ba’na se manjeng e babana gunong se katotoban okos se petteng akantha ondhem se kandel ban apoy se rabbang sampe’ ka langnge’.
12PANGERAN pas abu-dhabu ka ba’na dhari dhalem apoy jareya, ba’na ngedhing sowarana tape ta’ nangale’e ka Salerana.
13E jadhiya ba’na edhabuwi apa se kodu ejalannagi bi’ ba’na kaangguy neptebbi parjanjiyan se ebadha’agi Pangeran ban ba’na, iya areya ba’na kodu ngestowagi Papakon Se Sapolo se la eserrat bi’ Pangeran e bato se dhadhuwa’ rowa.
14Sengko’ bi’ PANGERAN epakon ngajarragi ka ba’na sakabbinna hokom se kodu eestowagi bi’ ba’na e nagara se la para’ ekobasa’ana tor ekennengngana ba’na rowa."
15Mosa nerrossagi dhabuna, "Kaenga’e pateppa’! E baktona PANGERAN abu-dhabu ka ba’na dhari apoy e Gunong Sinay jarowa, ba’na ta’ nangale’e pa-apa.
16Jaga ja’ sampe’ ba’na agabay dusa polana ba’na agabay arca se esemba’a ba’na dibi’, arca se eparopa’a apa’a bai — oreng lalake’ otaba babine’,
17burun alas otaba mano’,
18keban se agalajar otaba juko’.
19Ja’ sampe’ ba’na agabay dusa nyemba ka apa’a bai se etangale’e ba’na e langnge’ — are, bulan ban tang-bintang. Bi’ GUSTE Allah, Pangeranna ba’na, sa-bangsa laen epanneng nyemba jareya.
20Tape ba’na reya bangsa se epasalamet PANGERAN dhari nagara Messer, kennengnganna ba’na nanggung seksa’an se talebat berra’na. Ba’na ebakta kalowar dhari nagara jareya sopaja daddiya ommadda dibi’, akantha kabadha’anna ba’na sateya reya.
21Tape GUSTE Allahna ba’na duka ka sengko’ polana ba’na, ban asompa ja’ sengko’ ta’ eedinana alengka Songay Yordan ban ta’ eedinana maso’ ka nagara se landhu se eparengngagi Salerana ka ba’na.
22Ba’na la para’ se alengka’a songay, ngobasa’ana tana se landhu rowa; tape sengko’ ta’ ngenneng noro’, sabab sengko’ bakal mateya e dhinna’.
23Senga’, ja’ sampe’ loppa ka parjanjiyan se la epabadha e antarana ba’na ban GUSTE Allahna. Ban estowagi papakonna; ja’ sampe’ ba’na agabay arca se aropa apa’a bai se esemba’a bi’ ba’na,
24sabab GUSTE Allah, Pangeranna ba’na padha ban apoy se rabbang; ta’ kasokan epadha’agi bi’ apa’a bai.
25Bariya keya mon ba’na la abit badha e nagara jareya sampe’ apoy-kompoy, ba’na ja’ agabay dusa polana agabay arca se eparopa’a apa’a bai se esemba’a ba’na. Jareya bi’ PANGERAN eanggep lalakon se jahat, se andaddiyagi dukana.
26Langnge’ ban bume bi’ sengko’ esorowa nyakse’e ja’ mon ba’na ta’ atoro’ oca’ ka sengko’, ba’na bakal duliya mosna dhari tana se ekennengngana ba’na e bara’anna Songay Yordan jareya. Ba’na ta’ kera abit odhi’ e jadhiya sabab ba’na bakal epatompessa kabbi.
27Bi’ PANGERAN ba’na bakal epacar-tapencara e antarana sa-bangsa laen, ban e antara ba’na reya pera’ sakone’ se gi’ odhi’a.
28E jadhiya ba’na bakal nyemba’a ka la’-alla’an gabayanna tanangnga manossa, la’-alla’an dhari kaju ban bato, se ta’ nangale’e ban ta’ ngedhing, se ta’ bisa ngakan otaba ngedhing bau.
29Saellana jareya ba’na bakal nyareya GUSTE Allah, Pangeranna ba’na, ban mon ba’na nyare kalaban gu-onggu, tanto tatemmo.
30Mon ba’na nemmo kasossa’an ban nemmo sakabbinna balai se kasebbut gella’, ba’na bakal abaliya ka PANGERAN ban ngestowagi papakonna.
31PANGERAN reya Allah se bellas ase; ta’ kera adina’agi otaba matompes ba’na, ta’ kera kalep ka parjanjiyan se ebadhi Salerana dibi’ bi’ bangatowana ba’na.
32Kodda’ sare dhari jaman lamba’, jaman sabellunna ba’na lahir, molae dhari are e bakto Allah nyepta’agi manossa e bume reya. Sare sabume. Ba’ taowa badha kadaddiyan raja kantha jareya sabellunna? Ba’ badha’a oreng se tao ngedhing badha kadaddiyan se kantha reya?
33Ba’ badha’a bangsa se gi’ panggun odhi’ saellana ngedhing badha la’-alla’an acaca ka bangsa jareya dhari apoy akantha se ealame ba’na rowa?
34Ba’ badha’a la’-alla’an se bangal ngala’ settong bangsa dhari bangsa laen, sarta bangsa jareya padha epadaddi ommadda dibi’, akantha se elampa’agi GUSTE Allahna ba’na se nolong ba’na e Messer? Ba’na la nangale dibi’ baramma Allah kalaban kakowadanna se raja madhateng balai ban perrang, mabadha kaajiban-kaajiban ban madhateng kadaddiyan-kadaddiyan se nako’e.
35Jareya kabbi bi’ PANGERAN epatangale ka ba’na menangka bukte ka ba’na ja’ Allah reya pera’ PANGERAN malolo, tadha’ laenna pole.
36Sowarana epakaedhing ka ba’na dhari langnge’ sopaja ngennenga ngajar ba’na; e bume reya Pangeran noduwagi apoyya se socce ka ba’na, sarta pas abu-dhabu dhari apoy jareya.
37Sarrena Pangeran reya taresna ka bangatowana ba’na, daddi ba’na pas epadaddi ommat peleyanna; kalaban kakobasa’anna se raja, Pangeran dibi’ se abakta ba’na kalowar dhari Messer.
38Sa-bangsa se araja’an ban akowadan dhari ba’na eojuk dhari seddi’anna ba’na, sopaja ba’na ngennenga maso’ ka nagara se eparengngagi ka ba’na, nagara se sateya ekaandhi’ ba’na reya.
39Daddi, are teya reya kaenga’e, ja’ sampe’ loppa: PANGERAN reya Allah se settong e langnge’ ban e bume; tadha’ laenna.
40Toro’ sakabbinna hokom se etotorragi sengko’ ka ba’na are teya reya, mon ba’na atoro’ ka kom-hokomma PANGERAN jareya, ba’na ban toronanna bakal taremtemma odhi’na sarta bakal odhi’a terros e nagara se bi’ PANGERAN eparengngagi ka ba’na salanjangnga."
41Mosa laju mele kottha tatello’ e temorra Songay Yordan
42epadaddi kottha sowaka, kennengnganna sowakana oreng mon ta’ etengnget mate’e oreng se banne mosona. Oreng jareya olle buru ka sala settonga kottha jareya me’ olle ta’ epate’e keya.
43Kottha Bezer e tana tenggi ra-ara beddhi esadhiya’agi ka suku Ruben; kottha Ramot e tana Gileyad ka suku Gad, ban kottha Golan e tana Basan ka suku Manasye.
44Mosa laju marengngagi kom-hokom ban atoran-atoran dhari Allah ka bangsa Isra’il.
45Parkara jareya elampa’agi saellana bangsa Isra’il kalowar dhari Messer ban la napa’ ka cora e temorra Songay Yordan, e adha’anna kottha Bet-Peyor. Jareya bekkas baba kakobasa’anna Sihon, ratona oreng Amori, se lamba’ marenta e kottha Hesybon. Mosa ban bangsa Isra’il makala bangsa jareya e bakto la kalowar dhari Messer.
46(4:45)
47Tanana Rato Sihon ekobasae, bariya keya tanana Rato Og dhari Basan, rato Amori se laen e temorra Songay Yordan.
48Tana jareya malanjang dhari kottha Aroër e penggirra Songay Arnon terros ka dhaja sampe’ ka Gunong Siriyon, iya areya Gunong Hermon,
49ban sakabbinna tana e temorra Songay Yordan ka lao’ sampe’ ka Tase’ Mate e sokona Gunong Pisga.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel