Alkitab Mobile SABDA
[VER] : [MADURA]     [PL]  [PB] 
 <<  Ulangan 6 >> 

1"GUSTE Allahna ba’na makon sengko’ ngajarragiya kom-hokom reya ka ba’na. Estowagi kom-hokom jareya e nagara se bakal ekennengngana ba’na rowa.

2Saomorra ba’na ban na’ potona kodu hormat ka GUSTE Allahna, ban ngestowagi sakabbinna hokomma se bi’ sengko’ epanapa’ ka ba’na reya, sopaja ba’na bisa’a lanjang omor e nagara jareya.

3Daddi, tan-taretan, ommat Isra’il. Edhingngagi ban toro’ kom-hokom jareya, sopaja ba’na sennengnga odhi’na ban daddiya bangsa se raja e nagara se sogi tor landhu jareya, akantha se la ejanjiyagi bi’ GUSTE Allahna sengko’ ban ba’na.

4Tan-taretan, ommat Isra’il, kaenga’e, ya! Pera’ PANGERAN — pera’ PANGERAN malolo — Allahna ba’na ban sengko’.

5Taresnae GUSTE Allahna ba’na kalaban gu-onggu ate. Duduwagi jareya e dhalem odhi’na ba’na ban e dhalem tengka gulina.

6Ja’ sampe’ ba’na loppa ka papakon se eajarragi sengko’ ka ba’na sateya reya.

7Ajarragi jareya ka na’-ana’na ba’na. Kacaca jareya mon ba’na badha e dhalem bengko otaba e lowar bengko, mon ba’na teppa’na neng-enneng otaba alalakon.

8Taleyagi ka lengngenna ban pasang e dhaina sopaja ba’na enga’a terros.

9Toles e pangpangnga labangnga bengkona ban e labangnga pagarra taneyanna."

10"GUSTE Allahna ba’na ajanji ka bangatowana ba’na, iya areya Ibrahim, Ishak ban Yakub, ja’ ba’na eparengngana nagara rowa. Tha-kotthana raja tor ma’mor, ban banne ba’na se maddek.

11Ko-bengkona possa’ bi’ rang-barang se bagus, rang-barang se banne giba’anna ba’na. E jadhiya ba’na bakal nemmowa mor-somor se banne kaleyanna ba’na. Ba’na bakal nemmowa bun-kebbun jaitun se banne tamennanna ba’na. Mon ba’na la ebakta ka nagara jareya bi’ PANGERAN, ban sakabbinna se terro ekakana ba’na la genna’ kabbi,

12senga’ ja’ kaloppae ka PANGERAN se la nolong mabebas ba’na dhari Messer, kennengnganna ba’na ekadunor oreng.

13Hormadi GUSTE Allahna ba’na, ja’ nyemba laenna kajabana ka GUSTE Allah, ban mon asompa, asompa demi asmana malolo.

14Ja’ nyemba la’-alla’an se kemma’a bai se esemba sa-bangsa e sakalenglengnga ba’na.

15Mon ba’na nyemba ka la’-alla’an, ba’na tanto narema babendun dhari GUSTE Allahna, ban tanto epatompes kabbi, sabab GUSTE Allah jareya ta’ kasokan epadha’agi bi’ apa’a bai.

16Ba’na ja’ ba’-nyoba’ GUSTE Allahna akantha se e Masa rowa.

17Estowagi kom-hokom se eparengngagi GUSTE Allah ka ba’na.

18Lakone apa se bi’ PANGERAN enyata’agi becce’ ban teppa’, sabab kalaban cara se kantha jareya odhi’na ba’na bakal nyamana. Tana se landhu se ejanjiyagi PANGERAN ka bangatowana ba’na bakal ekaandhi’a ba’na,

19ban ba’na bakal ngojuga so-mosona kabbi, menorot se ejanjiyagi PANGERAN.

20E budhi are na’-ana’na ba’na tanto atanya ka ba’na kantha reya, ‘Aponapa GUSTE Allah me’ makon sampeyan sareng kaula sopaja ngestowagi sadajana hokom paneka?’

21Ba’na kodu nyaot kantha reya, ‘Lamba’ ommat Isra’il ekadunor rato Messer, bi’ PANGERAN pas epabebas bi’ kakowaddanna se raja.

22Sengko’ ban oreng Isra’il laenna nangale’e dibi’ PANGERAN mabadha kaajiban-kaajiban ban kadaddiyan-kadaddiyan se nako’e ka bangsa Messer ban ka ratona sarta ka ja-pangrajana.

23Bangsa Isra’il epabebas dhari Messer polana ba’na ban sengko’ ebakta’a dha’ enna’, eparengana tana reya, akantha se la ejanjiyagi Salerana ka bangatowana ba’na ban sengko’.

24Daddi GUSTE Allah makon sengko’ ban ba’na sopaja padha’a ngestowagi kom-hokom jareya, sarta hormat ka Salerana. Mon dhabuna jareya eestowagi, bangsa Isra’il tanto epeyara bi’ PANGERAN, eparenge odhi’ se nyaman ban taremtem.

25Mon sengko’ ban ba’na terros ngestowagi papakonna, GUSTE Allah tanto lebur ka sengko’ ban ba’na.’"



 <<  Ulangan 6 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel