Alkitab Mobile SABDA
[VER] : [MADURA]     [PL]  [PB] 
 <<  Yehezkiel 11 >> 

1Sengko’ pas eangka’ bi’ Erroh Allah egiba ka labang saketheng e Temor e Padalemman Socce. E jadhiya sengko’ nangale’e oreng sagame’, e antarana tamaso’ pamimpinna bangsa kadhuwa, iya reya Ya’azanya ana’na Azur ban Pelaca ana’na Benaya.

2Allah adhabu ka sengko’, "He, manossa se ta’ langgeng, reya’ reng-oreng se andhi’ rancana jahat ka kottha reya, ban se aberri’ babala’an se sala ka oreng.

3Daddi kabala’agi Tang pessen ka reng-oreng jareya parkara okoman se bi’ Sengko’ eteba’agiya ka aba’na, he, manossa se ta’ langgeng. Sabab reng-oreng jareya ngoca’, ‘Sakejja’ aggi’ sengko’ ban ba’na maddegga pole ko-bengko reya. Kottha reya padha ban polo’, dineng ba’na ban sengko’ padha ban daging se badha e dhalemmanna. Tape sakone’na sengko’ ban ba’na tanto aman dhari apoy sabab katotoban polo’ jareya.’"

4(11:3)

5Saellana jareya sengko’ emaso’e Errohna PANGERAN; sengko’ bi’ PANGERAN pas epakon ngoca’ kantha reya ka ommat Isra’il, "He, bangsa Isra’il, Sengko’ tao apa se ekoca’agi ba’na ban apa se ekasajja ba’na.

6Ce’ bannya’na oreng se epate’e ba’na sampe’ rong-lorong e kottha possa’ ban mayyit.

7Daddi Sengko’, GUSTE Allah Se Mahatenggi, sateya ngoca’a ka ba’na: Bendher, kottha reya polo’, tape daging se badha e dhalemmanna banne ba’na, tape reng-oreng se epate’e ba’na! Dineng ba’na bi’ Sengko’ eojuga dhari kottha reya!

8Apa ba’na tako’ ka peddhang? Sengko’ madhatengnga oreng se ngeba peddhang epanyerranga ba’na.

9Bi’ Sengko’ ba’na egiba’a kalowar kottha pas epassra’agiya ka oreng manca. Bi’ Sengko’ ba’na la eteptebbagi eokoma mate.

10Ba’na bakal mateya e dhalem paperrangan e nagarana dibi’, daddi ba’na tao ja’ Sengko’ PANGERAN.

11Daddi ba’na ta’ kera aman e kottha reya, ta’ akantha daging e dhalem polo’. Bi’ Sengko’ ba’na eserserra ban eokoma, maske ba’na badha e dhimma’a bai e nagara Isra’il reya.

12Daddi ba’na tao ja’ Sengko’ PANGERAN ban ba’na eokom bi’ Sengko’ polana ta’ atoro’ ka ran-atoran sarta ta-parenta se dhari Sengko’, tape atoro’ ka kom-hokomma sa-bangsa e sabingkerra ba’na."

13Sabatara sengko’ ngoca’agi ca’-oca’ jareya, o-tao Pelaca robbu, terros mate. Sengko’ laju asojud sambi aera’, "Adhu, Guste ALLAH Se Mahatenggi! Ponapa karena oreng Isra’il ka’dhinto sareng Junandalem epateyana sadaja?"

14PANGERAN adhabu pole ka sengko’,

15"He, manossa se ta’ langgeng, ba’na ban ca-kancana se badha e pambuwangan padha ekacaca bi’ reng-oreng Yerusalim. Ca’na reng-oreng jareya, ‘Reng-oreng buwangan rowa ce’ jauna dhari Yerusalim, daddi ta’ bisa abakte ka PANGERAN. Tana Isra’il reya bi’ Pangeran la eparengngagi ka sengko’ ban ba’na kabbi.’

16Daddi kabala ka ca-kancana ba’na se badha e pambuwangan reya, ja’ Sengko’ se ngeba reng-oreng jareya ka jauna ka kennengnganna sa-bangsa laen ban nyaba’ reng-oreng jareya epamencar e ra-nagara jareya. Tape sabatara badha e jadhiya, reng-oreng jareya bi’ Sengko’ paggun ebarengngana.

17Sengko’, GUSTE Allah Se Mahatenggi makompola pole reng-oreng se asa-pesa e ra-nagara laen jareya, ban tana Isra’il bi’ Sengko’ epabaliya pole ka reng-oreng jareya.

18Mon la mole, reng-oreng jareya bakal mowanga la-brahala se jahat ban majitjit se etemmo e jadhiya.

19Reng-oreng jareya bi’ Sengko’ eberri’ana ate se anyar ban pekkeran se anyar. Atena se gali akantha bato bi’ Sengko’ ekala’a eganteyana ate se ta’at ka Sengko’.

20Reng-oreng jareya bakal atoro’a ka sakabbinna Tang atoran ban esto atoro’ ka Tang parenta. Reng-oreng jareya bakal daddiya Tang ommat ban Sengko’ daddiya Allahna.

21Tape oreng se gi’ nyemba brahala se juba’ ban majitjit rowa bi’ Sengko’ eokoma polana tengkana se jahat jareya." Kantha jareya dhabuna GUSTE Allah Se Mahatenggi.

22Rub-kerub jareya molae ngabber, ban dha-rodhana noro’ keya. Sonar se agalirap, se nandha’agi ja’ Allahna Isra’il badha e attasanna.

23Saellana jareya sonar se agalirap jareya ngalle dhari Yerusalim ka gunong e temorra kottha jareya.

24E dhalem pangatonan jareya, bi’ Errohna Allah sengko’ eangka’ pas epabali ka reng-oreng buwangan e Babil. Saellana jareya pangaton buru elang.

25Sengko’ laju nyareta’agi ka reng-oreng buwangan sabarang se epatangale ka sengko’ bi’ PANGERAN.



 <<  Yehezkiel 11 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel