1PANGERAN adhabu ka sengko’,
2"He, manossa se ta’ langgeng, koca’e bi-nabbi Isra’il se ngoca’agi ramalan gabayanna dibi’. Balai soro ngedhingngagi Tang oca’."
3GUSTE Allah Se Mahatenggi adhabu, "Palang bi-nabbi se budhu rowa! Ilhamma ollena gabayanna dibi’ ban pangatonan se etangale’e sabendherra palsu.
4He, Isra’il, bi-nabbina ba’na jareya tadha’ gunana, padha ban te’-pate’ alas se odhi’ e tengngana jur-gujuranna kottha.
5Reng-oreng jareya ta’ ajaga e ngan-kennengngan se geddhungnga gujur, ban ta’ mateppa’ dhung-geddhung se gujur jareya. Daddi Isra’il ta’ ekenneng pasalamet mon badha perrang e are bakto Sengko’, PANGERAN, ngokoma.
6Ton-pangatonanna bi-nabbi jareya palsu, ban mal-ramalanna lecek. Reng-oreng jareya ngako ngeba pessen dhari Sengko’, mangkana Sengko’ ta’ tao ngotos reng-oreng jareya. Baramma se bisa’a reng-oreng jareya ngarep ramalanna kalakona?
7Sengko’, GUSTE Allah Se Mahatenggi, ngoca’ ka reng-oreng jareya, ‘Ton-pangatonanna ba’na jareya palsu, mal-ramalanna ba’na jareya lecek. Ba’na ngoca’ jareya kabbi Tang pessen, mangkana Sengko’ ta’ tao acaca ka ba’na! Daddi Sengko’ daddiya mosona ba’na.
8(13:7)
9Sengko’ ngokoma ba’na, bi-nabbi se ngoca’agi mal-ramalan se lecek ban nyareta’agi ton-pangatonan gabayanna dibi’. Ba’na ta’ olle pole noro’ aberri’ potosan e dhalem dhang-sidhangnga Tang ommat. Ma-nyamana ba’na ecoreda dhari dhaftarra kaomma Isra’il, ban ba’na bakal ta’ moleya pole ka tana asalla. Daddi ba’na tao ja’ Sengko’ reya GUSTE Allah Se Mahatenggi.
10He, bi-nabbi palsu, ba’na la ngeba Tang ommat ka jalan se sala kalaban ngoca’ ja’ kabbi aman ban beres. Mangkana enja’! Tang ommat masang pagar bata se ta’ koko pasanganna, saellana jareya ba’na pas dhateng alabur geddhung jareya.
11He, bi-nabbi palsu, geddhungnga ba’na bakal gujura. Sengko’ matorona ojan derres. Geddhung jareya bakal ekennenga kaleng busbus ban ojan es
12sampe’ gujur, oreng kabbi bakal padha atanya’a apa gunana geddhung jareya elabur.’"
13GUSTE Allah Se Mahatenggi adhabu, "E bakto Sengko’ peggel, Sengko’ madhatengnga kaleng busbus, ojan derres ban ojan es maancora geddhung jareya.
14Sengko’ aneyat magujura geddhung se elabur ba’na rowa, epalejjara sampe’ pera’ kare dhasarra malolo. Geddhung jareya bakal ngarobbuwana ba’na sampe’ mate kabbi. Daddi ba’na tao ja’ Sengko’ PANGERAN.
15Geddhung jareya ban ba’na se alabur bakal taowa rassana rajana peggella Tang ate. Saellana jareya Sengko’ pas abala’a ka ba’na ja’ geddhung jareya la mosna, padha ban reng-oreng se alabur,
16he, bi-nabbi palsu! Ba’na aramallagi ja’ Yerusalim aman ban beres, mangkana sabendherra enja’!" Kantha jareya dhabuna GUSTE Allah Se Mahatenggi.
17PANGERAN adhabu, "Sateya he, manossa se ta’ langgeng, abassagi babine’an se atengka akantha bi-nabbi bine’ e antarana bangsana ba’na rowa. Koca’e reng-oreng jareya,
18ban kabala apa se ekoca’agi bi’ Sengko’, GUSTE Allah Se Mahatenggi, ka reng-oreng jareya: ‘Palang ba’na! Ba’na agabayyagi sakabbinna oreng lang-gellang jimat ban dhung-kodhung sakte, sopaja reng-oreng se ngangguy bisa’a ngobasae odhi’na oreng laen. Ba’na terro ngobasa’ana odhi’ matena Tang ommat, ban kobasa jareya bi’ ba’na eangguy nyare kaontonganna dibi’.
19Ba’na ya-nyeya Sengko’ e adha’na Tang ommat pera’ polana terro olleya gandum barampa pergem ban roti barampa kerra’. Reng-oreng se ta’ sala bi’ ba’na epate’e, dineng reng-oreng se sapantessa mate bi’ ba’na epanneng ta’ epama-baramma. Ba’na malae barang se cek-lecek ka Tang ommat, ban Tang ommat parcaja ka ba’na.’"
20PANGERAN Se Mahatenggi adhabu ka babine’an se atengka akantha bi-nabbi bine’ rowa, "Sengko’ baji’ nangale’e lang-gellang jimat se eangguy ba’na kaangguy ngobasae mate odhi’na Tang ommat. Lang-gellang jareya bi’ Sengko’ esendhala dhari lengngenna ba’na, ban reng-oreng se ekobasae ba’na bi’ Sengko’ epabebasa.
21Dhung-kodhung saktena ba’na bi’ Sengko’ esebbida, dineng Tang ommat bi’ Sengko’ epalopoda dhari pangarona ba’na se juba’ salanjangnga. Daddi ba’na tao ja’ Sengko’ reya PANGERAN.
22Reng-oreng becce’ se bi’ Sengko’ ta’ epama’-baramma’a, bi’ ba’na ecek-lecegi sampe’ padha kene’ ate. Reng-oreng jahat bi’ ba’na eparaja ate sopaja pagguna dusa ban ta’ epasalamet.
23Sateya ton-pangatonan palsu ban mal-ramalanna ba’na se lecegan jareya la ta’ ekenneng paterros pole. Sengko’ masalamedda Tang ommat dhari pangarona ba’na se jahat. Daddi ba’na tao ja’ Sengko’ reya PANGERAN."
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel