1PANGERAN adhabu ka sengko’,
2"He, manossa se ta’ langgeng, apa ba’na la asadhiya se ahakimana kottha se possa’ ban oreng dujan mate’e oreng rowa? Duduwagi ka reng-oreng jareya tengkana se majitjit."
3GUSTE Allah Se Mahatenggi makon sengko’ manapa’ pessen reya ka Yerusalim, "Ba’na sala polana mate’e pandhudhu’na ba’na dibi’ sabannya’na, ban manajjis aba’na polana nyemba la-brahala gabayanna ba’na dibi’. Daddi sa’at panghakimanna ba’na la para’ ban odhi’na ba’na la napa’ ka aherra. Bi’ Sengko’ ba’na edina eya-seya ban ekala’-gella’ sa-bangsa ban ra-nagara kabbi.
4(22:3)
5Ba’na eco-koco bi’ ra-nagara se jau ban se semma’ polana ba’na ros-terrosan nerrak hokom ban atoran.
6Pamimpin Isra’il kabbi ngandellagi kakowadanna dibi’ ban mate’e reng-oreng.
7Tadha’ pandhudhu’na ba’na settonga se hormat ka oreng towana. Ba’na nepo oreng manca ban ngala’ kaontongan dhari kasossa’anna randha ban kana’ jatim.
8Ngan-kennengnganna oreng abakte ka Sengko’ bi’ ba’na epakotor ban are Sabat ta’ eparduli.
9E antarana pandhudhu’na ba’na badha se padha dujan nas-manase ban metenna oreng sopaja oreng jareya eokoma mate. Badha keya se dujan ngakan daging se la ekurbannagi ka brahala. Badha pole se dujan alako cemmer.
10Badha se agudha ban tedhung bi’ ebu kaballunna, otabana babine’ se teppa’na dhateng kotorra,
11binena oreng laen otaba mantona otabana ale’ bine’na se laen ebu.
12Badha keya se ngala’ opa’an mate’e oreng, mabudhu’ pesse ban merres reng-oreng sabangsana. Reng-oreng jareya padha loppa kabbi ka Sengko’. Sengko’, GUSTE Allah Se Mahatenggi la ngoca’.
13Tape sateya Sengko’ ngantemma gal-bigalla ba’na ban reng-orengnga ba’na se daddi tokang mate’e oreng.
14Apa ba’na gi’ bangal otaba ba’ gi’ kowada ba’na ngangka’ tanangnga mon la eokom bi’ Sengko’? Sengko’, PANGERAN Se Mahatenggi la ngoca’, ban Sengko’ ajalannagiya sabarang se la ekoca’agi Sengko’.
15Bi’ Sengko’ pandhudhu’na ba’na epacar-tapencara ka sakabbinna nagara ban bangsa, ban Sengko’ maambuwa tengkana ba’na se juba’ jareya.
16Ba’na bakal eya’-seya’a bi’ sa-bangsa laen, daddi ba’na tao ja’ Sengko’ reya PANGERAN."
17PANGERAN adhabu ka sengko’,
18"He, manossa se ta’ langgeng, reng-oreng Isra’il reya tadha’ gunana ka Sengko’. Tadha’ bidana ban re’-kerre’na dimbaga, tema, besse ban tema celleng saellana salaka epamorne e dhalem apoy.
19Daddi sateya Sengko’, GUSTE Allah Se Mahatenggi, ngoca’a ka reng-oreng jareya ja’ aba’na tadha’ bidana ban besse se tadha’ gunana. Bi’ Sengko’ kabbi epakompola pas egiba’a ka Yerusalim epakantha’a salaka, dimbaga, besse, tema celleng ban tema pote se
20epamaso’ ka apoy polana epamorneya. Peggella Tang ate se talebat rajana reya bakal malejjara reng-oreng Isra’il akantha apoy se maancar besse.
21Onggu, Sengko’ makompola reng-oreng Isra’il e Yerusalim, masanga apoy kapeggellanna tang ate e babana reng-oreng jareya sampe’ kabbi padha lejjar.
22Akantha salaka se epaancar e dhalem apoy, bariya keya reng-oreng jareya epaancara e Yerusalim. Daddi reng-oreng jareya pas tao ja’ Sengko’, PANGERAN, la neba’agi peggella Tang ate ka aba’na."
23PANGERAN adhabu pole ka sengko’, dhabuna,
24"He, manossa se ta’ langgeng, kabala ka oreng Isra’il ja’ tanana najjis, daddi Sengko’ peggel ban madhatengnga okoman ka bangsa jareya.
25Para pamimpinna akantha macan se agaung samarena nyeppa’ mangsana. Para pamimpin jareya mate’e ra’yat, arampas sakabbinna dhi’-andhi’na se etemmo, daddi lantaranna bannya’ babine’an daddi randha.
26Para imam Isra’il nerrak Tang kom-hokom ban manajjis sabarang se epamalolo kaangguy Sengko’; ta’ abida’agi se kemma se halal ban se kemma se haram. Bariya keya ta’ ngajari ra’yat parkara kemma se berse ban se kemma se najjis menorot agama. Are Sabat ta’ eparduli. Daddi Sengko’ eya-seya bi’ bangsa Isra’il.
27Ja-pangrajana pamarenta akantha pate’ alas se bit-nyebbit mangsana. Mate’e oreng pera’ polana terro nyareya ontong.
28Para nabbi notobi sa-dusa jareya akantha oreng se alabur geddhung se kotor. Ton-pangatonanna palsu, bariya keya mal-ramalanna. Bi-nabbi jareya ngako sen-pessen se epanapa’ ka ra’yat rowa etarema dhari GUSTE Allah Se Mahatenggi, mangkana Sengko’ ta’ acaca ka reng-oreng jareya sakale.
29Reng-oreng sogi nepo ban arampok, tengkana ka oreng mesken ngala’ sanyamanna dibi’ sarta’anna nyare kaontongan dhari oreng manca.
30E antarana oreng Isra’il jareya Sengko’ nyare oreng se bisa maddek geddhung, otabana se bisa manjeng e ngan-kennengngan se dhung-geddhungnga gujur kaangguy masalamet nagara jareya mon bi’ Sengko’ epaancora e bakto Tang ate ce’ peggella, tape sengko’ ta’ nemmo settonga balakka’.
31Lantaran jareya sateya kapeggellanna Tang ate bi’ Sengko’ eteba’agi ka reng-oreng jareya. Akantha apoy Sengko’ matompessa reng-oreng jareya kabbi polana tengkana dibi’. Sengko’, GUSTE Allah Se Mahatenggi la ngoca’."
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel