1PANGERAN adhabu ka sengko’, dhabuna,
2"He, manossa se ta’ langgeng, badha babine’ kadhuwa, kaka’ ale’.
3E bakto gi’ ngodhana, se kadhuwa jareya enneng e Messer. E jadhiya se kadhuwa jareya kaelangan kaparabananna, laju daddi sondel.
4Se sareyang nyamana Ohola, alambangngagi Samaria. Dineng ale’na anyama Oholiba, alambangngagi Yerusalim. Bi’ Sengko’ se kadhuwa jareya ekabine; Sengko’ andhi’ ana’ dhari se kadhuwa jareya.
5Maske la daddi Tang bine, Ohola paggun nyondel, ban ce’ bajengnga aladine se-kakasena dhari Asyur.
6Lalake’an jareya tantara se asaragam mera ban bungo terrong, reng-oreng agung ban ja-pangraja tenggi; kabbi tamaso’ ra-parwirana pasukan jaran se bagus robana.
7Ohola azina ban ja-pangraja jareya. Dhari rajana baraina, Ohola laju manajjis aba’na, nyemba la-brahalana lalake’an jareya.
8Se nyondel terros ta’ endha’ ambu, akantha lamba’ gi’ badha e Messer, kennengnganna se kaelangan kaparabananna. Molae gi’ kene’ Ohola jareya la ekapolong tedhung bi’ lalake’an, eanggep sondel.
9Daddi bi’ Sengko’ pas ebagi ka se-kakasena, reng-oreng Asyur se ekakerronge rowa.
10Babine’ jareya ebangkange epakasar bi’ lalake’an jareya, saellana laju epate’e ban peddhangnga, na’-ana’na erampas. Nasibba se kantha jareya e man-dhimman daddi rarasanna babine’an.
11Oholiba, ale’na, nangale’e kadaddiyan jareya, tape napsona aba’na kaangguy azina araja’an dhari Ohola.
12Oholiba padha keya, ce’ terrona ka reng-oreng Asyur jareya, iya reya ngangodhadan se bagus robana dhari pasukan jaran, reng-oreng agung ban ja-pangraja tenggi, sarta tantara se asaragam mera ban bungo terrong.
13Sengko’ nangale’e ja’ Oholiba jareya talebat bejjadda, padha ban embugga.
14Sajan abit Oholiba jareya sajan bejjat. Atena kapencot ka bar-gambarra ra-parwira tenggina Babil se eoker e geddhung, eeccet abarna mera dhara, ra-parwira se ngangguy sabbu’ se bagus ban surban se abul-jambul.
15(23:14)
16E bakto nangale’e bar-gambar jareya, baraina Oholiba ongga gan otegga, daddi laju nyoro oreng epangone’e ra-parwira e Babil jareya.
17Ra-parwira Babil jareya laju dhateng, pas tedhung ban babine’ jareya. Oholiba epacemmer ce’ sarana sampe’ dhi-budhina arassa jitjit dibi’ ka ra-parwira jareya.
18Saellana jareya aba’na pas nyondel rang-terrangan aba’na epatenggu ka oreng. Sengko’ baji’ nangale’e babine’ jareya, padha ban baji’na Sengko’ ka embugga.
19Sajan abit sajan seggut se azina, tadha’ bidana ban gi’ ngodhana e bakto nyondel e Messer;
20gila ka lalake’ se raja napsona, lalake’an se baraina padha ban jaran lake’.
21(He, Oholiba, ba’na ngolangana kacemmerranna tengkana gi’ngodhana, e bakto oreng Messer tedhung ban ba’na.)"
22GUSTE Allah Se Mahatenggi adhabu, "He, Oholiba, ba’na la busen ka se-kakasena, tape bi’ Sengko’ reng-oreng jareya enas-panasana me’ olle peggel ka ba’na, me’ olle ba’na ekeppong.
23Sengko’ makompola sakabbinna se-kakasena ba’na dhari Babil, Pekod, Sowa, Kowa, Asyur, sarta reng-oreng Kaldeya, kabbi egiba’a ka ba’na. Sengko’ madhatengnga ngangodhadan se bagus robana, se tenggi pangkadda, reng-oreng agung, pangraja se penting ban ra-parwirana pasukan jaran.
24Reng-oreng jareya bakal nyerranga ba’na dhari dhaja ban tantara se raja, ban ta-kareta perrang sarta ta-kareta se ngeba sango. Tantara jareya bakal ngepponga ba’na, ngangguy tameng ban songko’ baja. Bi’ Sengko’ epannengnga reng-oreng jareya ahakime ba’na menorot kom-hokomma dibi’.
25Sengko’ peggel ka ba’na, daddi bi’ Sengko’ reng-oreng jareya epannengnga alako kejjem ka ba’na. Bi’ reng-oreng jareya elong ban kopengnga ba’na bakal eketthoga, na’-ana’na ba’na bakal ekala’a ban eobbara dhi’-odhi’.
26Ba’na bakal ebangkangana, ban pareyasanna ba’na bakal erampasa.
27Kantha jareya carana Sengko’ maambuwa baraina ba’na ban sakabbinna zina se elakone ba’na molae ba’na gi’ badha e Messer. Ba’na bakal ta’ ngarebba pole partolonganna brahala se kemma’a bai, ban bakal ta’ enga’a pole ka Messer."
28GUSTE Allah Se Mahatenggi adhabu, "Bi’ Sengko’ ba’na epassra’agiya ka reng-oreng se talebat ekabaji’i ba’na.
29Sarrena reng-oreng jareya baji’ ka ba’na, sakabbinna hasella lakona ba’na bakal erampasa. Ba’na bakal edina’agiya e dhalem kabadha’an abangkang losneng, daddi tatenggunna oreng bannya’. Napso barai ban napso kotorra ba’na
30se madhateng nasib juba’ jareya ka ba’na. Ba’na daddi sondella sa-bangsa ban manajjis aba’na dibi’ bi’ la-brahalana sa-bangsa jareya.
31Ba’na nero embugga, daddi bi’ Sengko’ ba’na eberri’ana okoman se padha."
32GUSTE Allah Se Mahatenggi adhabu, "Ba’na kodu ngalodhu’ essena cangkerra embugga. Cangker jareya dhalem ban raja. possa’ aesse bi-cebbi se kodu etanggung ba’na dhari oreng sabannya’na.
33Cangkerra embugga ba’na Samaria, aesse katako’an ban kaancoran. Saellana bi’ ba’na eenom essena ba’na bakal mabu’a ban nanggung sangsara. Ban ba’na bakal bit-nyebbida dhadhana ngangguy la’-bella’anna cangker jareya. Sengko’, GUSTE Allah Se Mahatenggi la ngoca’."
34(23:33)
35GUSTE Allah Se Mahatenggi adhabu, "Sarrena ba’na loppa ka Sengko’ ban mongkore Sengko’, ba’na bakal nanggunga sossa polana napso baraina ban napso sondella."
36PANGERAN adhabu ka sengko’, "He, manossa se ta’ langgeng, apa ba’na la asadhiya se ahakimana Ohola ban Oholiba? Parengeddi se kadhuwa jareya parkara kajuba’anna tengkana.
37Se kadhuwa jareya la alako zina ban mate’e oreng; azina ban la-brahala ban mate’e Tang na’-ana’ se lahir dhari se kadhuwa jareya. Tang na’-ana’ bi’ se kadhuwa jareya ekurbannagi ka la-brahalana.
38Ban banne pera’ jareya malolo. Se kadhuwa jareya manajjis Tang Padalemman sarta are Sabat se bi’ Sengko’ la eteptebbagi rowa.
39E are baktona Tang na’-ana’ epate’e ban ekurbannagi ka la-brahalana, kaka’ ale’ se kadhuwa jareya entar ka Tang Padalemman ban manajjis kennengngan jareya.
40Se kadhuwa jareya la’-mala’ ngonjang lalake’an dhari ra-nagara se jau, ban lalake’an jareya dhateng onggu. Kaangguy nemmone moy-tamoy jareya, kaka’ ale’ se kadhuwa jareya mandhi, acella’ ban ngangguy pareyasanna.
41Saellana jareya laju toju’ e katedhungan se bagus. E adha’na katedhungan jareya badha mejana se possa’ ban ka’-angka’, tamaso’ dupa ban mennya’ jaitun Tang baberri’ ka se kadhuwa jareya.
42Dhari lowar badha sowarana oreng sabannya’na se padha neng-sennengngan, iya reya reng-oreng se eonjang dhari sagara beddhi. Reng-oreng jareya masang lang-gellang ka lengngenna kaka’ ale’ buru, sarta masang mang-jamang se bagus e cethagga.
43Sengko’ pas apekker, ‘Ba’ gi’ endha’a reng-oreng rowa abur-leburan ban del-sondel se la elop polana seggut azina rowa?’
44Reng-oreng ate-gante entar ka Ohola ban Oholiba, del-sondel se bejjat se kadhuwa jareya.
45Tape reng-oreng alem bakal ngadilana kaka’ ale’ jareya polana azina ban mate’e oreng, sabab se kadhuwa jareya pajat sala."
46GUSTE Allah Se Mahatenggi adhabu, "Kassa’ ngolok oreng sagarombolan, soro nyeksa ban arampok sondel se kadhuwa jareya.
47Dina me’ olle egarujuk bi’ bato sarta eserrang bi’ peddhang. Dina na’-ana’na me’ olle ejagal ban ko-bengkona me’ olle eobbar.
48Kabejjadan se kantha jareya bi’ Sengko’ epatadha’a e saantero nagara reya. Jareya menangka parengeddan ka saneyap babine’ sopaja ta’ sampe’a azina akantha kaka’ ale’ se kadhuwa jareya.
49He, Ohola ban Oholiba, bi’ Sengko’ ba’na eokoma polana ba’na azina ban nyemba brahala. Daddi ba’na tao ja’ Sengko’ reya GUSTE Allah Se Mahatenggi."
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel