1E tanggal dhubellas bulan sapolo, e taon se kapeng sapolo e bakto sengko’ ban tang bangsa badha e pambuwangan, PANGERAN adhabu ka sengko’,
2"He, manossa se ta’ langgeng, ca’-koca’e rato Messer. Kabala ja’ rato jareya ban ra’yadda kabbi bakal eokoma."
3Kabala apa se ekoca’agi sengko’, GUSTE Allah Se Mahatenggi, ka rato Messer reya, "Sengko’ reya mosona ba’na, he, baja raja se dhung-tedhungan e songay. Ba’na asebbal ja’ Songay Nil rowa andhi’na ba’na, ban ba’na se agabay.
4Gusena ba’na bi’ Sengko’ epasangana e’-kae’, ban ko’-juko’ se badha e songay kennengnganna ba’na jareya bi’ Sengko’ epacekka’a ka sesse’na ba’na. Saellana jareya ba’na bi’ Sengko’ pas e taja’a epakalowara dhari Songay Nil epabarengnga ban ko’-juko’ se cekka’ ka sesse’na ba’na jareya.
5Saellana jareya ba’na ban ko’-juko’ jareya bi’ Sengko’ eontallagiya ka sagara beddhi. Badanna ba’na bakal gaggara ka tana, edina e jadhiya, tadha’ se abendhemmagi. Bi’ Sengko’ badanna ba’na jareya ebagiya ka no’-mano’ sarta ban-keban laenna me’ olle ekakan.
6Ra’yat Messer tanto pas tao kabbi ja’ Sengko’ reya PANGERAN." PANGERAN adhabu, "He, bangsa Messer! Oreng Isra’il ngarep bantowanna ba’na, tape nyatana ba’na pera’ akantha tongket roman.
7E bakto bangsa Isra’il nyandhar ka ba’na, ba’na potong, nyoco’ ka kalemonganna reng-oreng jareya, sampe’ balikadda tasaleyo.
8Lantaran jareya, Sengko’, GUSTE Allah Se Mahatenggi, ngoca’a ka ba’na, ja’ Sengko’ ngeremmagiya tantara se bakal nyerranga ba’na bi’ peddhang, sarta mateyana pandhudhu’na ba’na ban ebinna.
9Messer bakal daddiya tana se seppe. Daddi ba’na tao ja’ Sengko’ PANGERAN." Pangeran adhabu, "He, rato Messer! Sarrena ba’na ngoca’ ja’ Songay Nil reya andhi’na ba’na ban gabayanna ba’na,
10daddi Sengko’ daddiya mosona ba’na, ban mosona Songay Nilla ba’na jareya. Messer bi’ Sengko’ epadaddiya tana se seppe kabbi molae dhari kottha Migdol e bagiyan dhaja sampe’ ka kottha Aswan e lao’, sampe’ ka batessa Sudan.
11Tadha’ manossa otabana keban se lebada e jadhiya. Pa’ polo taon abidda bakal ta’ ekennengngana oreng.
12Bi’ Sengko’ Messer epaseppeya sampe’ e antarana ra-nagara se seppe laenna, Messer se paleng seppe. Pa’ polo taon abidda tha-kottha e Messer bakal aropa’a jur-gujuran se asara’an dhari jur-gujuran e kottha se kemma’a bai. Bangsa Messer bi’ Sengko’ epadaddiya reng-oreng se ngongse, se bakal epabalessadana e sakabbinna nagara ban apolong ban sa-bangsa laenna."
13GUSTE Allah Se Mahatenggi adhabu, "He, bangsa Messer, saellana pa’ polo taon jareya bi’ Sengko’ ba’na egiba’a abali dhari ra-nagara kennengnganna ba’na abalessadan jareya.
14Bi’ Sengko’ ba’na epabaliya epakantha’a asalla ban esorowa enneng e tana asalla e Messer bagiyan lao’. E jadhiya ba’na bakal maddegga karaja’an se ta’ koko,
15se paleng ta’ andhi’ kakowadan e dunnya. Bi’ Sengko’ ba’na epata’andhi’a kakowadan parana sampe’ ba’na ta’ bisa marenta sa-bangsa laen otabana nyombongngagi aba’ ka sa-bangsa jareya.
16Isra’il ta’ kera menta bantowan pole ka ba’na. Nasibba ba’na, he, bangsa Messer, bakal daddiya parengeddan ka Isra’il saapa kalerona aba’na polana la ngandellagi bantowanna Messer. Daddi Isra’il pas tao ja’ Sengko’ reya GUSTE Allah Se Mahatenggi."
17E tanggal settong bulan settong e taon se kapeng petto lekor bakto sengko’ ban reng-oreng Isra’il laenna badha e pambuwangan, PANGERAN adhabu ka sengko’,
18"He, manossa se ta’ langgeng, Rato Nebukadnezar dhari Babil nyerrang Tirus. Rit-parjuridda esoro mekol ban-giban se ce’ berra’na, sampe’ cethagga buthak ban bauna kalonynyen, tape rato ban tantara jareya tadha’ ollena pa-apa, pera’ kare lessona.
19Daddi Sengko’, GUSTE Allah Se Mahatenggi ngoca’: Tana Messer bi’ Sengko’ ebagiya ka Rato Nebukadnezar. Rato Nebukadnezar jareya bakal arampoga ban arampasa sarta ngangko’a sakabbinna dhi’-andhi’na Messer menangka opana tantarana.
20Tana Messer bi’ Sengko’ ebagiya ka Nebukadnezar jareya menangka opana sa-jasana, sabab tantarana alako kaangguy Sengko’. Sengko’, GUSTE Allah Se Mahatenggi la ngoca’.
21Mon jareya la kalakon, Isra’il bi’ Sengko’ epadaddiya bangsa se kowat; bi’ Sengko’ ba’na, Yehezkiel, epabebasa acaca sampe’ oreng padha ngedhing kabbi cacana ba’na. Reng-oreng jareya pas tao ja’ Sengko’ reya PANGERAN."
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel