1E tanggal settong bulan tello’ e taon se kapeng sabellas bakto sengko’ ban reng-oreng Isra’il laenna badha e pambuwangan, PANGERAN adhabu ka sengko’,
2"He, manossa se ta’ langgeng, kabala Tang pessen reya ka rato Messer ban ka ra’yadda kabbi. Ba’na reya rato raja onggu! Tadha’ se bisa nandhinge!
3Ba’na akantha comara Libanon se soga’, bannya’ cangkana se gumbus dhaunna ban lebur abasanna. Bungkana tenggi loros parana sampe’ ka ondhem konco’na.
4Comara jareya tombu polana cokop aengnga. Songay e baba’anna tana se aberri’ kakanna, se nyerame mo’-ramo’na ban mabacca ka’-bungka’an laenna.
5Sarrena aengnga ta’ tao korang, tombuna dhuluk, cangkana raja ban lanjang. Dhari ju-kajuwan se badha e las-alas, comara Libanon jareya se paleng tenggi bungkana.
6Mano’ acem-macem alebun e ca’-ranca’na. Burun alas abudhu’ e baba’anna. Sa-bangsa se raja saantero dunnya padha toju’ ngaop e baba’anna.
7Kajuwan jareya lebur abasanna, bungkana loros, lanjang cangkana. Ramo’na nyorek sampe’ ka baba napa’ ka somberra aeng e dhalem tana.
8Ka-bungkana comara e Eden, bun-kebbunanna Allah ta’ ekenneng bandhingngagi bi’ comara Libanon jareya. Tadha’ comara laen se nandhinge, tadha’ kajuwan laen se lanjang cangkana akantha bungkana comara Libanon jareya. Onggu, e bun-kebbunanna Allah tadha’ kajuwan se bagussa akantha jareya.
9Sengko’ se mabagus robana bi’ ka-cangka se lanjang ban rampa’. Ju-kajuwan e bun-kebbunanna Allah padha tamburuwan ka comara Libanon jareya.
10Daddi Sengko’, GUSTE Allah Se Mahatenggi, mala’ana ba’na apa se kadaddiyana ka kajuwan se konco’na sampe’ ka ondhem jareya. Sabab sajan tenggi, sajan sombong kajuwan jareya.
11Daddi kajuwan jareya bi’ Sengko’ etolak ban epassra’agiya ka pangobasa dhari nagara manca se ngokoma kajuwan jareya satembang ban kajahadanna.
12Bi’ tantara manca se ta’ andhi’ ate bellas kajuwan jareya bakal epogerra sarta pas edina. Ranca’na se potong bakal ngalotora e nong-gunong ban e cora e nagara jareya. Sa-bangsa se neng e baba’anna bakal ondura dhari jadhiya.
13No’-mano’ bakal dhatengnga, nengga’ e kajuwan se robbu jareya, dineng run-burun alas bakal nyek-ngenyegga ka-cangkana.
14Jareya kabbi kalakon sopaja molae sateya tadha’ pole kajuwan se tombu sampe’ tenggina kantha jareya; tadha’ pole konco’na kajuwan se napa’ ka langnge’ maske olle aeng se ta’ sakera-kera. Kabbi kodu mate akantha manossa se ta’ langgeng, ban akompol bi’ reng-oreng se la toron ka dunnyana oreng mate."
15Kantha reya dhabuna GUSTE Allah Se Mahatenggi, "Mon kajuwan jareya toron ka dunnyana oreng mate, Sengko’ nyorowa aeng e babana tana sopaja ngambang notobi kajuwan jareya menangka tandha sossa. Sengko’ nebbengnga gilina aeng ban nyompedda ka-cangkana songay. Sarrena kajuwan jareya la mate, nong-gunong Libanon bi’ Sengko’ epapettengnga calemodan ban ka’-bungka’an e alas epaeloba kabbi.
16E bakto kajuwan jareya bi’ Sengko’ epatoron ka dunnyana oreng mate, monyena parobbuna bakal mangetterra sa-bangsa. Sakabbinna kajuwan e Eden ban ju-kajuwan peleyan e Libanon se olle aeng se ta’ sakera-kera, ban se la toron ka bume se paleng baba bakal sennengnga polana kajuwan jareya robbu.
17Kabbi bakal noro’a bunte’ kajuwan jareya toron ka dunnyana oreng mate sarta akompola ban ju-kajuwan laenna se robbu sabellunna. Kabbi se lamba’ toju’ e babana kajuwan jareya bakal epabalessadana e antarana sa-bangsa.
18Kajuwan jareya parbandhinganna rato Messer ban bangsana. Tadha’ kajuwan e Eden se tenggi ban molja akantha jareya. Tape sateya, akantha ju-kajuwan e Eden, kajuwan jareya bakal torona ka dunnyana oreng mate keya, akompola ban reng-oreng se ta’ kennal ka Allah ban se mate e paperrangan. Sengko’, GUSTE Allah Se Mahatenggi la ngoca’."
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel