1E tanggal settong bulan dhubellas e taon se kapeng dhubellas bakto sengko’ ban reng-oreng Isra’il laenna badha e pambuwangan, PANGERAN adhabu ka sengko’,
2"He, manossa se ta’ langgeng, berri’ parengeddan kerras ka rato Messer. Kabala Tang pessen reya ka rato Messer jareya, ‘Ba’na atengka akantha macan se gi’ ngodha e antarana sa-bangsa, tape ba’na lebbi merep baja se acebbung e dhalem aeng. Sokona ba’na malekko ban magedda’ sakabbinna songay.
3E bakto sa-bangsa akompol, bi’ Sengko’ ba’na epega’a bi’ jala, me’ olle eeret ka tenggangan bi’ sa-bangsa.
4Bi’ Sengko’ ba’na eonjebbagiya ka tana, ban Sengko’ madhatengnga no’-mano’ sarta ban-keban sadunnya me’ olle padha ngakan ba’na.
5Saellana jareya nong-gunong ban ra-cora bi’ Sengko’ epossa’ana ban babathangnga ba’na se bucco’ jareya.
6Dharana ba’na bi’ Sengko’ epagiliya sampe’ mabacca nong-gunong ban mossa’e ngay-songay.
7E bakto Sengko’ mate’e ba’na jareya, bi’ Sengko’ langnge’ ebuko’ana ban tang-bintang epaoremma. Are bi’ Sengko’ epangetegga e budhina ondhem ban bulan bakal ta’ nyonara.
8Onggu, sakabbinna tera’ ban sonar e langnge’ bi’ Sengko’ epapettengnga, ban bume bi’ Sengko’ epacalemodana. Sengko’, GUSTE Allah Se Mahatenggi, la ngoca’.
9E bakto Sengko’ mabalattra ngabarragi parkara ancorra ba’na e ra-nagara se gi’ ta’ ekataowe bi’ ba’na, bannya’ bangsa se bakal arassa’a ketter.
10Onggu, Sengko’ natta’agiya Tang peddhang makala’a ba’na. To-rato ban sa-bangsa bakal nangaleyana okoman se eteba’agi Sengko’ ka ba’na. E bakto jareya to-rato ban sa-bangsa jareya bakal ngetterra katako’an sarta gumegil polana tako’ mate.’"
11GUSTE Allah Se Mahatenggi adhabu ka rato Messer, "Peddhangnga rato Babil bakal eacongngagiya ka ba’na.
12Rit-parjuridda sa-bangsa se kejjem bi’ Sengko’ esorowa ngonos peddhangnga, esorowa ajagal ra’yadda ba’na. Ra’yadda ba’na ban sabarang se eedirragi ba’na bakal ancora.
13Ebinna ba’na bi’ Sengko’ ejagala e penggirra ngay-songay kennengnganna ngenom. Manossa otaba keban ta’ kera malekko aengnga songay jareya pole.
14Daddi ngay-songay e nagarana ba’na bi’ Sengko’ epajennenga ban epalereya gilina. Sengko’ GUSTE Allah Se Mahatenggi la ngoca’.
15Mon bi’ Sengko’ Messer la epadaddi ra-ara se seppe, sarta se badha e jadhiya la epamate kabbi, reng-oreng jareya tao ja’ Sengko’ reya PANGERAN.
16Parengeddan reya bakal daddiya kejung kasossa’an. Babine’anna sa-bangsa bakal ngejungngagiya jareya menangka tandha sossa polana Messer ban ra’yadda mate kabbi. Sengko’, GUSTE Allah Se Mahatenggi la ngoca’."
17E tanggal lema bellas bulan settong e taon se kapeng dhubellas bakto sengko’ ban reng-oreng Isra’il laenna badha e pambuwangan, PANGERAN adhabu ka sengko’,
18"He, manossa se ta’ langgeng, mara duduwagi kasossa’an polana ra’yat Messer. Pagulu’ bangsa jareya ka dunnyana oreng mate pabareng ban sa-bangsa se kowat laenna.
19Koca’ kantha reya, ‘Ba’na apangrasa se paleng raddin, ya? Ba’na bakal torona ka dunnyana oreng mate, epatedhung epapolong ban reng-oreng se ta’ kennal ka Allah.’
20Bangsa Messer bakal mateya ban reng-oreng se tebas e paperrangan. Badha peddhang se la esadhiya’agi epamateyana reng-oreng jareya kabbi.
21Wan-pahlawan se soga’ ban bangalan sarta reng-oreng se aperrang nolonge Messer padha perak ngamba’ dhatengnga reng-oreng Messer ka dunnyana oreng mate. Reng-oreng jareya asorak kantha reya, ‘Reng-oreng se ta’ kennal ka Allah rowa la tebas e paperrangan. Sateya la dhateng dha’ enna’ sarta la matedhung e dhinna’!’
22Asyur tedhung e dhissa’, ekalenglenge koburanna rit-parjuridda. Kabbi padha tebas e paperrangan. Koburanna reng-oreng jareya badha e bagiyan se paleng dhalem e dunnyana oreng mate. Gi’ odhi’na reng-oreng jareya matako’ reng-oreng sadunnya.
23(32:22)
24Elam badha e dhissa’ ekalenglenge koburanna parjuridda. Reng-oreng jareya ta’ esonnat, mate e dhalem paperrangan, pas toron ka dunnyana oreng mate. E bakto odhi’na reng-oreng jareya matako’an oreng, tape sateya la mate ban kodu nanggung malo abareng ban reng-oreng se la tebas e paperrangan.
25(32:24)
26Mesekh ban Tubal badha e jadhiya, ekalenglenge koburanna rit-parjuridda. Reng-oreng jareya ta’ esonnat, mate e dhalem paperrangan. E bakto gi’ odhi’na reng-oreng jareya matako’ reng-oreng e dunnya.
27Reng-oreng jareya ta’ ekoburragi sacara hormat akantha pahlawan jaman lamba’ se toron ka dunnyana oreng mate asanjata genna’. Wan-pahlawan jareya ekoburragi etoro’e peddhang se esaba’ e babana cethagga ban tameng se esaba’ e attassa dhadhana. E bakto odhi’na pahlawan jareya kabbi padha kowat sampe’ matako’ sakabbinna oreng.
28Daddi reng-oreng Messer ekoburragiya ban epatedhunga e nga’-tengnga’anna reng-oreng se ta’ kennal ka Allah ban se tebas e paperrangan.
29Edom badha e jadhiya ban sakabbinna rato sarta para pangobasa. Lamba’ reng-oreng jareya rit-parjurit se kowat, tape sateya padha tedhung e dunnyana oreng mate akompol ban reng-oreng mate laenna se ta’ kennal ka Allah.
30Sakabbinna ana’na rato dhari dhaja badha e jadhiya, bariya keya reng-oreng Sidon. Lamba’ kakobasa’anna reng-oreng jareya matako’an oreng, tape sateya reng-oreng jareya epatodhus, ta’ asonnat, epatoron ka dunnyana oreng mate epabareng ban reng-oreng se mate e paperrangan. E jadhiya reng-oreng jareya padha nanggung malo ban reng-oreng se toron ka dunnyana oreng mate.
31Mon rato Messer ban tantarana napa’ ka dunnyana oreng mate ban nangale’e sakabbinna oreng jareya se la tebas e paperrangan, atena bakal talepora. Sengko’ GUSTE Allah Se Mahatenggi la ngoca’.
32Sengko’ se matako’ reng-oreng se odhi’ ka rato Messer, tape rato jareya ban tantarana bakal tebasa ban epatedhunga epapolong ban reng-oreng se ta’ kennal ka Allah ban se ngalotor e paperrangan. Sengko’ GUSTE Allah Se Mahatenggi la ngoca’."
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel