1Saellana jareya, bi’ lalake’ gella’ sengko’ laju ebakta ka labang saketheng se addhep ka temor,
2e jadhiya sengko’ nangale’e badha sonar se agalirap dhari temor se nandha’agi kahadiranna Allahna Isra’il. Sowarana Allah ekaedhing akantha garudhu’na tase’ raja, ban bume agalirap polana sonarra kahadiranna Allah.
3Pangatonan jareya padha ban se etangale’e sengko’ e bakto Allah rabu maancora Yerusalim, ban akantha se etangale’e sengko’ e Songay Kebar. Sengko’ pas asojud.
4Sonar se agalirap jareya ajalan lebat labang saketheng temor pas maso’ ka dhalem Padalemman Socce.
5Sengko’ eangka’ bi’ Errohna PANGERAN ebakta ka taneyan dhalem; e jadhiya sengko’ nangale’e Padalemman Socce katotoban sonar kahadiranna Pangeran.
6E bakto lalake’ jareya gi’ ngadek e erenganna sengko’, sengko’ ngedhing PANGERAN adhabu ka sengko’ dhari dhalemma Padalemman Socce, dhabuna,
7"He, manossa se ta’ langgeng, reya’ Tang tahta. Sengko’ ennengnga e dhinna’ e nga’-tengnga’anna ommat Isra’il ban marenta’a ommat jareya salanjangnga. Ommat Isra’il, bariya keya to-ratona, ta’ kera macemmer Tang nyama se socce pole kalaban nyemba brahala otabana ngoburragi jinazana to-ratona e kennengngan reya.
8Lamba’ to-rato Isra’il agabay bang-labangnga ban ger-ogerra labangnga karatonna e erenganna bang-labang ban ger-ogerra labangnga Tang Padalemman, daddi pera’ tapesa ban geddhung settong. To-rato jareya macemmer Tang nyama se socce kalaban tengkana se majitjit, daddi bi’ Sengko’ laju padha epatompes e bakto Tang ate ce’ peggella.
9Tape molae sateya reng-oreng jareya kodu ambu se nyemba brahala ban se ngalle jinazana to-ratona. Saellana jareya Sengko’ ennengnga e nga’-tengnga’anna ommat Isra’il jareya salanjangnga."
10PANGERAN laju adhabu pole, "He, manossa se ta’ langgeng, kabala ka ommat Isra’il parkara Tang Padalemman reya, soro pekker pateppa’ parkara rancanganna. Balai sopaja ommat jareya todhusa polana sa-dusana.
11Saellana reng-oreng jareya arassa todhus polana sa-dusana, pas terrangngagi rancanganna Tang Padalemman reya: modella, bang-labang maso’na ban bang-labang kalowarra, sosonanna bangonanna, sakabbinna atoran ban kom-hokomma. Tolessagi jareya kabbi me’ olle reng-oreng jareya bisa ngabas ban mekker carana ngator sakabbinna, sarta atoro’ ka sakabbinna atoranna.
12Reya’ kabadha’an se pera’ badha e Padalemman Socce malolo: Saantero dhaera e sabingkerra e konco’na gunong talebat soccena."
13Reya’ okoranna mezba menorot okoran se eangguy ngokor Padalemman Socce. E sakalenglengnga sokona mezba jareya badha soksogga, dhalemma satengnga meter ban lebarra satengnga meter keya, penggir lowarra epobuwi penggiran se tenggina saparapat meter.
14Dhari sellogan sampe’ ka bagiyanna mezba se ba-baba kadibi’ tenggina sameter. Bagiyan tengngana tenggina dhu meter, ban acope’an satengnga meter dhari kalenglengnga sokona mezba. Bagiyan se kapeng tello’, iya reya konco’na mezba, acope’an satengnga meter keya dhari kalenglengnga bagiyan tengngana.
15Bagiyan se kapeng tello’ reya kennengnganna ngobbar kurban; tenggina dhu meter. E padduna se pa’-empa’ badha bagiyanna se ngajul kalowar akantha tandhu’.
16Konco’ attassa mezba jareya masagi empa’, okoranna penggirra padha nem meter.
17Bagiyan tengngana masagi empa’ keya, okoranna penggirra se pa’-empa’ padha pettong meterran, penggir lowarra epasange penggiran se tenggina saparapat meter. (Lebarra soksogga satengnga meter.) E penggir temorra badha andhana ka bagiyan konco’ attassa mezba.
18GUSTE Allah Se Mahatenggi adhabu ka sengko’, "He, manossa se ta’ langgeng, edhingngagi apa se ekoca’agiya Sengko’ ka ba’na reya. Mon mezba jareya la mare, bi’ ba’na kodu esocceyagi. Carana iya reya ba’na kodu ngobbar kurban e mezba jareya sarta ngetessagi dharana kurban ka mezba jareya.
19Coma para imam toronanna Zadok dhari suku Lewi malolo se olle entar ka adha’na Sengko’ kaangguy mabadha kabakteyan. Sengko’, GUSTE Allah Se Mahatenggi se marenta’agi parkara jareya. Ba’na kodu ngeba sape lake’ se gi’ ngodha ka mam-imam jareya kaangguy kurban pangamponanna dusa.
20Kala’ dharana sakone’, buliddagi ka dhu’-tandhu’ e paddu se pa’-empa’ e mezba bagiyan attas jareya, bariya keya e du-paddu bagiyan tengngana sarta e sakalenglengnga penggiranna mezba jareya. Kalaban cara se kantha jareya mezba jareya bi’ ba’na esocce’e sarta eteptebbagi malolo kaangguy Sengko’.
21Saellana jareya kala’ sape lake’ kaangguy palebbaranna dusa jareya, pas obbar e kennengngan se la etantowagi, iya reya e lowaranna Padalemman Socce.
22Kalagguwanna ba’na kodu ngatorragi embi’ lake’ se tadha’ calena kaangguy kurban palebbaranna dusa. Socce’e mezba jareya bi’ dharana embi’ jareya, papadha ban sape lake’ se gi’ ngodha gella’.
23Mon la mare, pas ngala’ sape lake’ se gi’ ngodha ban embi’ lake’ se gi’ ngodha, padha se tadha’ calena,
24sape ban embi’ jareya giba ka Sengko’. Para imam kodu naburragi buja ka attassa keban se dhadhuwa’ jareya, sarta pas ngobbar sape ban embi’ jareya menangka kurban ka Sengko’.
25Sabban are sampe’ pettong are abidda, ba’na kodu ngorbannagi embi’, sape lake’ se gi’ ngodha ban embi’ lake’ menangka kurban pangamponanna dusa. Ban-keban jareya ta’ olle badha calena.
26Pettong are abidda para imam kodu mabadha opacara nyocce’e mezba jareya sarta nyadhiya’agi sopaja mezba jareya bisa’a eangguy.
27Saellana lebat pettong are, para imam kodu ngatorragi e mezba jareya kurban obbaran ban kurban salameddan kaangguy ommat. Sengko’ tanto pas senneng ka ba’na kabbi. Sengko’, GUSTE Allah Se Mahatenggi, la ngoca’."
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel