1GUSTE Allah Se Mahatenggi adhabu, "Labang saketheng temor se ka taneyan dhalem kodu terros etotop saabidda are kerja se nem are abidda. Labang jareya coma olle ebukka’ e are Sabat ban paraya’an Bulan Anyar.
2E dhalem nem are jareya pangobasa kodu maso’ dhari taneyan lowar lebat kamar se raja pas manjeng e erenganna canggana labang saketheng, sabatara para imam ngatorragi kurban obbaran ban kurban salameddan dhari pangobasa. E labang saketheng jareya pangobasa buru kodu asojud nyemba ka Pangeran, pas nyengla pole. Saellana jareya, sampe’ malem labang jareya ta’ olle kanceng.
3E adha’na labang saketheng jareya keya, ra’yat kodu asojud kabbi nyemba ka PANGERAN sabban are Sabat ban paraya’an Bulan Anyar.
4E are Sabat pangobasa kodu ngatorragi ka PANGERAN kurban obbaran se aropa budhu’na dumba nem-ennem ban dumba lake’ settong, kabbi padha ta’ olle badha calena.
5Dumba lake’ jareya kodu etoro’e kurban gandum petto bellas liter satengnga, ban sabban budhu’na dumbana kodu etoro’e kurban gandum sakarebba bannya’na. Sabban kurban gandum kodu etoro’e mennya’ jaitun tello liter.
6E bakto paraya’an Bulan Anyar tor-ator jareya kodu aropa sape lake’ settong, budhu’na dumba nem-ennem ban dumba lake’ settong; kabbi ta’ olle badha calena.
7Sabban settong sape lake’ ban embi’ lake’ kodu etoro’e gandum petto bellas liter satengnga, dineng sabban settong budhu’na dumba kodu etoro’e barampa’a bai menorot kakowadanna. Sabban kurban gandum kodu etoro’e mennya’ jaitun tello liter.
8Mon pangobasa jareya abakteya e Tang Padalemman, kodu maso’ lebat e kamar se raja, ban pamolena lebat e jadhiya keya.
9Sabaligga, mon e re-are raja ra’yat dhateng entara abakte ka PANGERAN, pamaso’na kodu lebat e labang saketheng dhaja, pamolena kodu lebat e labang saketheng lao’ mon la mare abakte. Se maso’ lebat labang saketheng lao’, pamolena kodu lebat labang saketheng dhaja. Reng-oreng elarang mole lebat jalan se elebadi pamaso’na; pamolena kodu lebat e labang se badha e jujuganna labang se elebadi pamaso’na.
10Pangobasa kodu maso’ ka Padalemman Socce abareng ban ra’yat, ban pamolena kodu abareng keya.
11E re-are pesta ban paraya’an, sabban sape lake’ ban sabban dumba lake’ kodu etoro’e tor-ator gandum petto bellas liter satengnga, dineng sabban budhu’na dumba kodu etoro’e barampa’a bai menorot karebba se ngalakone kabakteyan. Sabban kurban gandum kodu etoro’e tor-ator mennya’ jaitun tello liter.
12Mon pangobasa ngeba’a tor-ator sokalella ka PANGERAN, se aropa kurban obbaran otabana kurban salameddan, labang saketheng temor se ka taneyan dhalem kodu ebukka’ egabay palebadanna pangobasa jareya. Kurban jareya kodu eatorragi menorot cara se padha ban se ejalannagi e are Sabat, tape mon pangobasa jareya la mole, labang saketheng jareya kodu duli etotop pole."
13PANGERAN adhabu, "Sabban gi’ laggu ba’na kodu ngatorragi kurban obbaran ka PANGERAN aropa settong budhu’na dumba se aomor sataon se tadha’ calena.
14Laen dhari jareya, sabban gi’ laggu ba’na kodu ngatorragi keya kurban gandum dhu kilo ban mennya’ jaitun saliter se ecamporragi ka gandumma. Jareya kurban gandum se kodu eatorragi ka PANGERAN sabban are; atoran reya kaangguy salanjangnga.
15Sabban gi’ laggu ba’na kodu ngatorragi ka PANGERAN: budhu’na dumba settong, kurban gandum ban mennya’ jaitun."
16GUSTE Allah Se Mahatenggi apareng parenta, dhabuna, "Mon pangobasa se marenta aberri’ sabagiyan dhari tana sangkolanna ka sala settonga ana’na, tana jareya daddi andhi’na ana’na menangka dhi’-andhi’na kalowargana.
17Tape mon pangobasa jareya aberri’ sabagiyan dhari tana sangkolanna ka sala settong dhari dunorra, tana jareya abali daddi andhi’na pangobasa jareya pole e Taon Pabaliyan. Tana jareya andhi’na, ban pera’ pangobasa jareya ban na’-ana’na se bisa ngaandhi’ tana jareya saterrossa.
18Pangobasa jareya ta’ olle ngala’ arta sangkolanna ra’yadda maske sakone’a. Pera’ tanana dibi’ se olle ebagi ka na’-ana’na sopaja tadha’ settonga dhari Tang ommat se ekala’ dhi’-andhi’na."
19Saellana jareya bi’ lalake’ jareya sengko’ ebakta lebat e labang e erenganna labang saketheng, ka mar-kamar socce se addhep ka dhaja. Mar-kamar jareya esadhiya’agi kaangguy para imam. Lalake’ jareya aduding ka kamar e konco’ bara’,
20pas adhabu, "E kennengngan reya para imam kodu ngella kurban palebbaranna dusa ban kurban tebbusanna kasala’an sarta manggang kurban gandum, sopaja kurban se socce jareya maske sakone’a tadha’ se egiba ka taneyan lowar, me’ olle ta’ macalaka’ Tang ra’yat."
21Saellana jareya sengko’ laju ebakta ka taneyan lowar; ka sengko’ eduduwagi ja’ e padduna se pa’-empa’ badha taneyanna bang-sebang se akene’an, lanjangnga dhu polo meter ban lebarra lema bellas meter.
22(46:21)
23Sabban taneyan jareya ekalenglenge geddhung bato, ban e geddhung jareya badha mang-tomangnga.
24Ca’na lalake’ jareya ka sengko’, "Reya’ por-dhapor kennengnganna para pangladinna Padalemman Socce ngella ban-kurban tor-atorra ra’yat."
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel