1Saellana jareya sengko’ ngedhing Allah adhabu, "Mara dha’ enna’ ba’na, reng-oreng se ajalannagiya Tang okoman ka kottha reya. Giba ta-sanjatana."
2Pas badha oreng kaennem kalowar abareng dhari lowaranna labang saketheng bagiyan Dhajana Padalemman Socce, padha ngeba sanjata bang-sebang. Badha oreng akalambi linen se ngeba pakakas toles abareng ban reng-oreng jareya. Reng-oreng jareya kabbi maso’, laju manjeng e seddi’anna mezba paronggu.
3Pas badha sonar agalirap se nandha’agi kahadiranna Allahna Isra’il hadir e jadhiya. Sonar jareya kalowar dhari rub-kerub, se pas ngalle dhari kennengngan se asal jareya ka labang se elebadi oreng mon maso’a ka Padalemman Socce. PANGERAN laju nembali oreng se akalambi linen jareya, dhabuna,
4"Kassa’ entar ka sabalattrana kottha, berri’i tandha dhaina saneyap oreng se sossa polana sakabbinna tengka se majitjit se elakone oreng e kottha reya."
5Sengko’ ngedhing Allah adhabu ka reng-oreng laenna, "Toro’ oreng jareya ka sabalattrana kottha. Pate’e sakabbinna oreng, ja’ sampe’ badha se talopot.
6Pate’e sakabbinna lalake’an ban babine’an, towa ngodha, oreng towa ban na’-kana’. Tape ja’ sedding oreng se badha tandhana e dhaina. Molae dhari dhinna’, dhari Tang Padalemman reya." Daddi reng-oreng jareya laju molae ajalannagi papakon jareya kalaban mate’e para pamimpin Isra’il se teppa’na manjeng e Padalemman Socce.
7Allah adhabu ka reng-oreng jareya, "Pacemmer Tang Padalemman reya! Possa’e sakabbinna taneyanna bi’ yit-mayyit. Mara molae!" Daddi reng-oreng jareya molae mate’e reng-oreng se badha e dhalem kottha.
8Saabidda reng-oreng jareya ajagal reng-oreng Isra’il, sengko’ badha e jadhiya kadibi’an. Sengko’ asojud sambi aera’, "Guste ALLAH Se Mahatenggi, ponapa Junandalem ce’ dukana ka Yerusalim kantos sadaja oreng se gi’ badha e Isra’il ka’dhinto padha epateyana?"
9Saodda Allah, "Reng-oreng Isra’il ban Yehuda la agabay dusa se talebat rajana. Mate’e oreng e man-dhimman, ban Yerusalim ekotore ban kajahadan. Reng-oreng jareya ngoca’ ja’ Sengko’ la nyengla dhari nagara reya daddi ta’ bisa nangale’e tengkana reng-oreng jareya.
10Sengko’ ta’ neserra ka reng-oreng jareya. Bi’ Sengko’ reng-oreng jareya eokoma epakantha’a se elakone reng-oreng jareya ka reng-oreng laenna."
11Saellana jareya oreng se akalambi linen rowa abali laju areppot ka PANGERAN, atorra, "Sadajana papakonnepon Junandalem ampon lastare elakone."
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel