Alkitab Mobile SABDA
[VER] : [MADURA]     [PL]  [PB] 
 <<  Yeremia 1 >> 

1Ketab reya aesse pa-apa se edhabuwagi Yeremiya pottrana Hilkiya, sala settong e antarana mam-imam dhari kottha Anatot e dhaerana Benyamin.

2PANGERAN abu-dhabu ka Yeremiya e taon se kapeng tello bellas pamarenta’anna Yosiya pottrana Amon rato Yehuda.

3Saellana jareya PANGERAN abu-dhabu pole ka salerana sampe’ li-baliyan, molae dhari jaman pamarenta’anna Yoyakim pottrana Yosiya sampe’ taon se kapeng sabellas pamarenta’anna Zedekiya pottrana Yosiya. E bulan se kapeng lema’ taon jareya keya reng-oreng Yerusalim eangko’ ka pambuwangan.

4PANGERAN adhabu ka sengko’,

5"Sabellunna Sengko’ madaddi ba’na e gandhu’anna ebuna, ban sabellunna ba’na lahir, bi’ Sengko’ ba’na la epele epadaddi nabbi kaangguy sa-bangsa."

6Sengko’ mator, "Adhu, GUSTE Allah Se Mahatenggi, abdidalem ta’ penter acaca, sabab abdidalem gi’ ngodha dhimen."

7Tape PANGERAN adhabu, "Ba’na ja’ ngoca’ gi’ ngodha gallu. Mon Sengko’ ngotos ba’na ka sapa’a bai, ba’na kodu mangkat, ban apa se esorowagi Sengko’ sopaja ekoca’agi bi’ ba’na, kodu panapa’ ka reng-oreng jareya.

8Ta’ osa tako’ ka reng-oreng jareya, sabab Sengko’ abarengngana ba’na kaangguy alindhunge ba’na. Sengko’, PANGERAN, la ngoca’!"

9Saellana jareya PANGERAN ajuluwagi astana, nyedding tang colo’, pas adhabu, "Edhingngagi pas kabala pabalattra pa-apa se ekoca’agi Sengko’ reya.

10Are teya Sengko’ aberri’ ka ba’na kobasa ka sa-bangsa ban karaja’an-karaja’an — kobasa kaangguy marobbu ban magujur, kaangguy magulu’ ban mate’e, kaangguy maddek ban namen."

11PANGERAN mareksane ka sengko’, "Apa se etangale’e ba’na, Yeremiya?" Sengko’ nyaot, "Cangkaepon bungkana badam, Guste."

12"Teppa’," dhabuna PANGERAN, "Sengko’ ajaga sopaja kabbi se ekoca’agi Sengko’ daddiya kanyata’an."

13PANGERAN mareksane pole ka sengko’, "Apa pole se etangale’e ba’na?" Sengko’ nyaot, "E dhaja abdidalem nengale badha polo’ se essena ngalkal, sareng para’ nongngebba ka ka’dhinto."

14PANGERAN adhabu, "Dhari dhaja bakal ngalowa’a balai se bakal ngennenga ka pandhudhu’na nagara reya.

15Sengko’ nyorowa sakabbinna bangsa e dhaja dhateng ngobasa’ana Yerusalim. Dhung-geddhung e sakalenglengnga kottha reya ban bang-labang sakethengnga sarta sakabbinna kottha e Yehuda bakal erebbu’a sa-bangsa jareya.

16Sengko’ ngokoma Tang ommat, sabab ommat jareya agabay dusa ban mongkore Sengko’. Reng-oreng jareya ngeba kurban ka la’-alla’an, ban agabay ca-arca se pas esemba.

17Mara aya-sadhiya, Yeremiya! Kassa’ entar ka reng-oreng jareya, kabala sabarang se eparenta’agi Sengko’ ka ba’na reya. Ta’ osa tako’ ka reng-oreng jareya, me’ olle bi’ Sengko’ ba’na ta’ sajan epatako’ mon dhep-adhebban ban reng-oreng jareya.

18Edhingngagi! Ba’na bakal elabana bi’ pandhudhu’na nagara reya, iya reya to-rato Yehuda, para pangrajana pamarenta, para imam ban ra’yat. Tape are teya bi’ Sengko’ ba’na eberri’ana kakowadan kaangguy alaban reng-oreng jareya. Ba’na bakal daddiya akantha kottha se ngangguy binteng, padha ban cangga besse sarta geddhung dimbaga. Reng-oreng jareya ta’ kera bisa makala ba’na, sabab Sengko’ abarengngana ban alindhungana ba’na. Sengko’, PANGERAN, la ngoca’."

19(1:18)



 <<  Yeremia 1 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel