1PANGERAN adhabu pole ka sengko’, dhabuna,
2"Ja’ abine ban andhi’ ana’ e kennengngan reya.
3Bi’ Sengko’ ba’na ebala’ana apa se bakal kadaddiyana ka na’-kana’ se lahir e dhinna’ ban ka oreng towana.
4Kabbi bakal mateya ekenneng panyaket se ngeba pate, ban bakal mateya e dhalem paperrangan otaba polana kalaparan. Ta’ kera badha oreng se nangese otabana se ngoburragi reng-oreng jareya. Mayyidda bakal ajalamperrana akantha tombuganna buthok e tana, daddi pakanna mano’ ban burun alas.
5Ba’na ja’ entar ka bengkona oreng se kasossa’an, Yeremiya. Ja’ noro’ sossa polana sapa’a bai. Tang ommat reya bi’ Sengko’ la ta’ eberkadana pole kalaban eberri’i kataremtemman, bariya keya ta’ ekaneserrana ban ta’ ekabellasana.
6Oreng sogi ban oreng mesken e nagara reya bakal mateya, ban ta’ ebendhem oreng. Tadha’ oreng settonga se nyeksa aba’na otabana agundhul cethagga menangka tandha sossa polana matena reng-oreng jareya.
7Bariya keya tadha’ oreng se endha’ asalameddan kaangguy alepor oreng se kasossa’an. Tadha’ oreng noro’ sossa maske ka oreng se kapateyan eppa’ otaba ebuna sakale.
8Ja’ maso’ ka bengkona oreng se teppa’na apesta. Ja’ noro’ ngakan ban ngenom bi’ reng-oreng jareya.
9Edhingngagi se ekoca’agiya ka ba’na bi’ Sengko’, PANGERAN Se Mahakobasa, Allahna Isra’il. Sowarana oreng se anga-bunga ban rammena jang-onjanganna pangantan bi’ Sengko’ epaambuwa kabbi. Jareya bakal ekataowana bi’ reng-oreng se odhi’ e jamanna ba’na reya.
10Mon ba’na ngabala jareya kabbi ka reng-oreng jareya, olle daddi reng-oreng jareya atanya arapa Sengko’ me’ ngokom reng-oreng jareya ce’ kerrassa. Reng-oreng jareya tantona atanya apa salana ban dusana ka Sengko’, GUSTE Allahna.
11Kabala ka reng-oreng jareya ja’ Sengko’ ngoca’ kantha reya, ‘Bangatowana ba’na nyenglae Sengko’ polana nyemba’a ban abakteya ka lah-illah laen. Sengko’ ta’ eparduli ban Tang atoran kabbi ta’ etoro’.
12Tape se elakone ba’na jang jahadda pole. Ba’na cengkal ban pera’ norodi karebba dibi’ se jahat. Ba’na ta’ endha’ atoro’ ka Sengko’.
13Daddi bi’ Sengko’ ba’na eojuga dhari nagara reya ban ebuwanga ka nagara laen; ba’na ban para bangatowana ta’ tao ngedhing otaba nangale’e nagara jareya. E jadhiya ba’na seyang malem bakal nyemba’a ka lah-illah laen, ban ta’ ekaneserrana bi’ Sengko’.’"
14PANGERAN adhabu, "Bakal dhapa’a baktona oreng ta’ asompa’a bit nyamana Sengko’, Allah se odhi’, se makalowar ommat Isra’il dhari Messer,
15tape bit nyamana Sengko’, Allah se odhi’, se makalowar ommat Isra’il dhari nagara se badha e dhaja ban dhari nagara laen kennengnganna reng-oreng jareya epabalessadan bi’ Sengko’. Reng-oreng jareya bi’ Sengko’ epabaliya ka tana asalla, nagara se bi’ Sengko’ la ebagi ka bangatowana."
16PANGERAN adhabu, "Sengko’ ngologa oreng majang sabannya’na epamega’a reng-oreng reya. Saellana jareya Sengko’ ngologa panganjur sabannya’na esorowa aburu reng-oreng jareya e saneyap gunong ban gumo’, e wa-guwa ban e mo’-gumo’ bato.
17Sengko’ nangale’e sabarang tengka polana reng-oreng jareya. Tadha’ barang se ekenneng errep dhari Sengko’; sa-dusana etangale’e keya bi’ Sengko’.
18Dusa ban kajahadanna bi’ Sengko’ ebalessa tekel dhuwa’na, sabab reng-oreng jareya la manajjis Tang nagara ban la-brahala sabannya’na. La-brahala se ta’ anyaba akantha mayyit."
19GUSTE, Junandalem se ngaobi abdidalem sareng se apareng kakowadan ka abdidalem; Junandalem se nolong abdidalem e bakto kasossa’an. Sa-bangsa dhari konco’na bume badhi nyanderra ka Junandalem sareng mator, "Bangatowa abdidalem namong gadhuwan illah se palsu se tadha’ gunana sakale.
20Kadi ponapa manossa se kengenga abadhi illahna dibi’? Tanto saos ta’ kera oneng! Se ebadhi sareng tanangnga dibi’ tanto banne Allah."
21"Mangkana," dhabuna PANGERAN, "sateya reya bi’ Sengko’ sa-bangsa epataowa ka Tang kakobasa’an ban Tang kakowadan sopaja sa-bangsa jareya salanjangnga tao ja’ Sengko’ reya PANGERAN."
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel