1PANGERAN Allahna Isra’il adhabu, "Palang ba’na, he para pamimpin se mamate ban mabalessadan Tang ommat! Ba’na masthena meyara Tang ommat, tape jareya bi’ ba’na ta’ ejalannagi; Tang ommat bi’ ba’na epanneng abalessadan buru san-kassannagi. Sateya Sengko’ ngokoma ba’na polana kajahadanna ba’na jareya.
2(23:1)
3Tape karena Tang ommat bi’ Sengko’ epakompola dhari ra-nagara’ kennengnganna Sengko’ mowang reng-oreng jareya. Reng-oreng jareya bi’ Sengko’ egiba’a abali pole ka tana asalla ban toronanna reng-oreng jareya sajan atamba’a bannya’.
4Sengko’ meleya oreng se epadaddiya pamimpin se meyara’a reng-oreng jareya. Tang ommat ta’ kera tako’ ban ta’ kera ketter pole; ta’ kera badha tang ommat se elanga maske pera’ kasorang. Sengko’, PANGERAN, la ngoca’."
5PANGERAN adhabu, "Bakal napa’a baktona Sengko’ ngangkada rato se adil dhari toronanna Daud. Rato jareya bakal marenta’a kalaban bicaksana, sarta ajalannagiya barang se adil ban teppa’ e saantero nagara.
6Mon rato jareya marenta, oreng Yehuda bakal salamedda, ban oreng Isra’il bakal amana odhi’na. Rato jareya bakal esebbuda ‘PANGERAN Kasalameddanna Sengko’ ban Ba’na’.
7Bakal napa’a baktona, oreng ta’ kera asompa bit nyamana Sengko’ pole, bit nyamana ALLAH se odhi’, se ngeba ommat Isra’il kalowar dhari Messer,
8tape bit nyamana Sengko’, ALLAH se odhi’, se ngeba ommat Isra’il kalowar dhari settong nagara e bagiyan dhaja, ban dhari sakabbinna nagara laen kennengnganna reng-oreng jareya epabalessadan bi’ Sengko’. Reng-oreng jareya bakal ennengnga e tana asalla dibi’."
9Reya’ tang pessen parkara bi-nabbi: Tang ate ancor ban sengko’ ketter. PANGERAN ban dhabuna se socce andaddiyagi sengko’ padha ban oreng se mabu’ polana kabannya’an ngenom anggur.
10Nagara reya possa’ ban oreng se ta’ esto ka PANGERAN. Odhi’na jahat sarta sala e dhalem aguna’agi kakobasa’anna. Polana babastonna PANGERAN, rebba e teggal daddi kerreng ban saantero nagara padha sossa.
11PANGERAN adhabu, "Nabi ban imam ta’ endha’ ta’at ka Sengko’. La’-mala’ neng e Tang Pedalemman Sengko’ nemmone reng-oreng jareya alako jahat.
12Daddi, jalan se elebadi reng-oreng jareya bakal lecena ban bakal pettengnga, sampe’ reng-oreng jareya tatandhung ban labu. Reng-oreng jareya bi’ Sengko’ epacalaka’a, mon la napa’ baktona kaangguy ngokom reng-oreng jareya. Sengko’, PANGERAN, la ngoca’.
13Sengko’ la nangale’e sa-dusana bi-nabbi Samaria. Reng-oreng jareya acaca bit nyamana Ba’al, sarta ngeba Tang ommat, Isra’il ka jalan se sala.
14Tape e Yerusalim Sengko’ nangale’e bi-nabbi atengka ajuba’an pole dhari jareya. Bi-nabbi jareya acaca lecek tor azina, sarta abanto oreng se alako jahat, sampe’ tadha’ oreng settonga se endha’ atobat. Monggu ka Sengko’ reng-oreng jareya jahat kabbi, padha bi’ oreng Sodom ban Gomora."
15PANGERAN Se Mahakobasa adhabu, "Bi-nabbi e Yerusalim jareya bi’ Sengko’ padha eberri’ana tamennan se pae’ menangka kakanna ban racon menangka nom-enomanna, sabab reng-oreng jareya daddi lantaranna reng-oreng e saantero nagara ta’ ngargai Sengko’."
16Ka reng-oreng Yerusalim PANGERAN Se Mahakobasa adhabu, "Ja’ edhingngagi cacana bi-nabbi se pera’ aberri’ pangarebban se kosong jareya. Bi-nabbi jareya pera’ manapa’ caca gabayanna dibi’ ban banne Tang pessen.
17Ka reng-oreng se ta’ endha’ ngedhingngagi Tang oca’, bi-nabbi jareya ros-terrosan ngoca’ kantha reya, ‘Ba’na bakal salamedda.’ Ban ka reng-oreng se cengkal, bi-nabbi jareya ngoca’, ‘Ba’na ta’ kera nemmo calaka’.’"
18Sengko’ ngoca’, "Para nabbi jareya maske settonga tadha’ se taowa apa se badha e dhalem panggaliyanna PANGERAN. Tadha’ bi-nabbi jareya se tao ngedhing ban se ngarte pa-apa se daddi kasokanna PANGERAN; bariya keya tadha’ se ngestowagi dhabuna.
19Dukana PANGERAN padha ban kaleng busbus se ngamok ngenneng ka reng-oreng se jahat.
20Dukana ta’ kera mare sabellunna pa-apa se daddi kasokanna kalakon kabbi. E budhi are ommadda PANGERAN bakal ngarteya parkara jareya sajarna’na."
21PANGERAN adhabu, "Ce’ bajengnga bi-nabbi jareya, mangkana ta’ esoro Sengko’. Bi-nabbi jareya manapa’ kabar ngangguy Tang nyama, mangkana Sengko’ ta’ asen-pessen pa-apa ka reng-oreng jareya.
22Saompamana reng-oreng jareya tao apa se badha e dhalem Tang pekkeran, tanto reng-oreng jareya manapa’ ka Tang ommat pa-apa se la ekoca’agi Sengko’. Daddi Tang ommat tanto pas atobat dhari sa-dusana ban lalakonna se jahat.
23Sengko’ reya Allah se badha e man-dhimman, banne neng e settong kennengngan malolo.
24Tadha’ oreng se ngenneng ngetek sopaja ta’ etangaleyana Sengko’, sabab Sengko’ badha e dhimma’a bai: e sowarga ban e bume.
25Pa-apa se ekoca’agi bi-nabbi jareya Sengko’ la tao. Reng-oreng jareya acaca lecek kalaban ngangguy Tang nyama, ngoca’ ja’ narema Tang pessen e dhalem mempe.
26Sampe’ bila bi-nabbi jareya maposanga Tang ommat bi’ kabar gabayanna dibi’?
27Reng-oreng jareya ngera kalaban pe-mempena se ecareta’agi jareya, Tang ommat ekenneng paloppa ka Sengko’ padha ban bangatowana se loppa ka Sengko’ sarta nyemba ka Ba’al.
28Nabbi se amempe koduna ngoca’, ‘Reya coma mempe.’ Tape nabbi se narema pessen dhari Sengko’ kodu manapa’ pessen jareya kalaban sabendherra. Gandum ta’ ekenneng papadha ban darameyan.
29Tang oca’ padha ban apoy, ban padha ban tokol se maancor bato.
30Sengko’ se alabana bi-nabbi se saleng manapa’ cacana ca-kancana sarta ngoca’agi ja’ jareya Tang pessen.
31Bariya keya Sengko’ se alabana bi-nabbi se manapa’ ca’-oca’na dibi’ sarta ngoca’agi ja’ jareya dhari Sengko’.
32Sengko’, PANGERAN, se alabana bi-nabbi jareya se manapa’ pe-mempena se lecegan kabbi. Bi-nabbi jareya ngeba Tang ommat ka jalan se sala kalaban cacana se lecek gabayanna dibi’. Sengko’ ta’ nyoro bi-nabbi jareya. Bi-nabbi jareya ta’ aguna ka Tang ommat. Sengko’, PANGERAN, la ngoca’."
33PANGERAN adhabu, "Yeremiya, mon badha sala settong dhari Tang ommat, otabana sala settong dhari nabbi otabana imam atanya ka ba’na, ‘Apa dhabuna PANGERAN?’ Ba’na kodu nyaot, ‘Ba’na se maberra’ PANGERAN; daddi ba’na bakal ebuwanga.’
34Mon sala settong dhari Tang ommat otaba nabbi otaba imam gi’ acaca parkara ’se maberra’ PANGERAN’, oreng jareya sabala bi’ Sengko’ eokoma.
35Sabaligga, saneyap oreng koduna atanya ka kancana ban ka balana, ‘Apa jawabanna PANGERAN?’ otabana ‘Apa se edhabuwagi PANGERAN?’
36Reng-oreng jareya ta’ olle pole ngangguy oca’ ’se maberra’ PANGERAN’. Mon badha se gi’ ngangguy oca’ jareya, Tang sen-pessen bi’ Sengko’ epamaberra’a oreng jareya ongguwan. Oreng se ngoca’agi ’se maberra’ Pangeran’ pera’ alik-balik cacana Sengko’, Allahna reng-oreng jareya, Allah se odhi’, PANGERAN Se Mahakobasa.
37Reng-oreng jareya pera’ olle ngoca’ kantha reya ka bi-nabbi, ‘Kadi ponapa jawabanna PANGERAN ka sampeyan? Ponapa se edhabuwagi PANGERAN?’
38Mon badha se ta’ atoro’ ka Tang parenta jareya, ban gi’ ngangguy oca’ ’se maberra’ PANGERAN’,
39bi Sengko’ reng-oreng jareya ejumbu’a, pas epelpallagiya epajauwa, banne pera’ orengnga, tape bariya keya kotthana se bi’ Sengko’ la ebagi ka bangatowana.
40Reng-oreng jareya bi’ Sengko’ epatodhusa ban epanespa’a salanjangnga ban nasibba reng-oreng jareya ta’ kera ekaloppae oreng."
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel