1PANGERAN adhabu, "Mon oreng babine’ etellak bi’ lakena, sarta pas ekabine oreng laen, babine’ jareya ta’ olle ekabine pole bi’ lakena se asal, sabab jareya bakal marosaga nagara reya. Tape ba’na, Isra’il, ba’na ce’ bannya’na kakasena, ban sateya ba’na abaliya ka Sengko’!
2Kodda’ abas ka attas, ka co’-konco’na gumo’! Se kemma se bi’ ba’na gi’ ta’ tao eentare kaangguy nyondel? Akantha oreng Arab e ra-ara beddhi, bariya keya ba’na toju’ e penggir lorong anante’ oreng se eajaga nyondel. Ba’na manajjis nagara reya ban lalakon zina sarta kajahadanna.
3Jareya sababba arapa aeng me’ ta’ gaggar dhari langnge’, ban ojan e mosem semme ta’ endha’ dhateng. Ba’na merep sondel, ban tadha’ malona.
4E dhalem kasossa’an reya ba’na ngoca’ ja’ Sengko’ ramana ba’na, ja’ Sengko’ bellas ase ka ba’na molae ba’na gi’ kene’.
5Ba’na ngoca’ keya ja’ Sengko’ ta’ kera ros-terrosan peggel ka ba’na. Jareya se ekoca’agi ba’na, Isra’il, tape ba’na gi’ terros bai ngalakone samacemma kajahadan se gi’ ekenneng lakone bi’ ba’na."
6E jaman pamarenta’anna Rato Yosiya, PANGERAN adhabu kantha reya ka sengko’, "Apa ba’na la nangale’e apa se elakone Isra’il, babine’ se ta’ esto rowa? Isra’il la mongkore Sengko’ ban nyondel e saneyap gumo’ se tenggi sarta e babana saneyap kajuwan se rampa’.
7Ca’na Sengko’, saellana atengka kantha jareya pas abaliya pole ka Sengko’. Tape Isra’il ta’ abali, la’-mala’ laju nyondel. Daddi bi’ Sengko’ etellak sarta laju eojuk. Yehuda, taretanna Isra’il se ta’ esto jareya, nangale’e jareya kabbi, tape ta’ tako’. La’-mala’ noro’ nyondel keya,
8(3:7)
9ta’ tao malo sakale. Yehuda azina polana nyemba bato ban kajuwan, sampe’ nagara reya daddi najjis.
10Saellana ngalakone jareya kabbi, Yehuda se ta’ esto jareya abali ka Sengko’, tape pera’ tha-kantha, sabab atena ta’ ehlas. Sengko’, PANGERAN, la ngoca’."
11Saellana jareya PANGERAN marenge oneng ka sengko’ ja’ sanajjan Isra’il mongkore Salerana, tape Isra’il nyatana gi’ abecce’an dhari Yehuda se ta’ esto rowa.
12PANGERAN ngotos sengko’ entar abala parkara reya ka Isra’il, "He, Isra’il se ta’ esto, mara abali ka Sengko’! Sengko’ reya bellas ase ban ta’ salanjangnga peggel ka ba’na!
13Akone bai ja’ ba’na la sala ban aberonta’ ka PANGERAN, Allahna. Akone ja’ e babana saneyap kajuwan se rampa’ ba’na ngettokkagi kataresna’anna ka lah-illahna bangsa laen, ban ta’ atoro’ ka Tang ta-parenta. Sengko’, PANGERAN la ngoca’."
14PANGERAN adhabu, "He ommat se ta’ esto, mara abali ka Sengko’! Ba’na reya Tang andhi’. Bi’ Sengko’ ba’na ekala’a, dhari saneyap kottha ekala’a kasorang, dhari saneyap kaom ekala’a kadhuwa; bi’ Sengko’ egiba’a abali ka Gumo’ Siyon.
15Bi’ Sengko’ ba’na eberri’ana pin-pamimpin se ta’at ka Sengko’, se mimpina ba’na kalaban bicaksana ban pangarteyan se dhalem.
16Saellana jareya, mon ba’na la atamba bannya’ e nagara jareya, oreng ta’ kera acaca parkara Tang Petthe Parjanjiyan pole. Petthe jareya ta’ kera epekker pole otaba ekaenga’e pole, la’-mala’ ta’ ekaparlo pole, ban reng-oreng jareya la’-mala’ ta’ kera agabay Petthe Parjanjiyan laen pole.
17E bakto jareya Yerusalim bakal esebbuda ‘Tahtana PANGERAN’, ban sa-bangsa bakal akompola kabbi e kottha jareya nyemba’a Sengko’. Reng-oreng jareya bakal ta’ norodana pole karebba atena se cengkal ban jahat.
18Isra’il bakal apolonga ban Yehuda, ban bakal dhatengnga areng-bareng dhari nagara pambuwangan e bagiyan dhaja. Isra’il ban Yehuda bakal abaliya ka nagara se bi’ Sengko’ la ebagi menangka tana sangkolan ka bangatowana ba’na."
19PANGERAN adhabu, "Isra’il, Sengko’ terro narema’a ba’na menangka Tang ana’, ban aberri’ana ba’na nagara se masenneng ate, nagara se paleng bagus e dunnya. Sengko’ terro sopaja ba’na ngologa Rama ka Sengko’, ban ta’ nyengla pole dhari Sengko’.
20Tape akantha bine se ta’ esto, bariya keya ba’na ta’ esto ka Sengko’. Sengko’, PANGERAN, la ngoca’."
21E co’-konco’na nong-gunong badha sowara ramme; jareya sowarana ommat Isra’il se nanges ban on-nyo’on, polana andhi’ dusa ban ta’ enga’ ka GUSTE Allahna.
22E, reng-oreng se padha mongkore PANGERAN, mara padha abali! PANGERAN tanto mabaras ba’na ban ngoba ba’na epadaddi esto. Ba’na ngoca’, "Enggi, samangken kaula nyander ka PANGERAN, sabab PANGERAN paneka Allah kaula.
23Parcoma kaula areng-sareng nyemba brahala e co’-konco’na gunong! Partolongan kaangguy Isra’il asalla namong dhari PANGERAN, Allah kaula.
24Lantaran nyemba ka Ba’al, brahala se mamalowan ka’issa’, andaddiyagi kaula padha kaelangan ana’ sarta sape sareng dumba, enggi paneka sadajana se eusaha’agi para bangatowa kaula dhari jaman dhimen.
25Daddi dinggal kaula nanggunga malo, sareng diggal kaula me’ olle nespa. Sabab kaula sareng bangatowa kaula ros-terrosan agabay dusa ka PANGERAN, Allah kaula, sareng ta’ oneng atoro’ ka papakonna."
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel