1E bakto sengko’ gi’ etahan e palataran, sengko’ narema pessenna PANGERAN
2se abadhi bume ban se pas nyaba’ bume jareya e kennengnganna. PANGERAN adhabu kantha reya,
3"Mara aserro ka Sengko’, Sengko’ nyaoda; bi’ Sengko’ ba’na ebala’ana sabarang se lebur ban makasambu’ ate se gi’ ta’ ekataowe bi’ ba’na.
4Karatonna rato Yehuda ban ko-bengko e kottha Yerusalim la ebungkar kaangguy makowat partahanan ngadhebbi kepponganna ban serranganna moso. Tape Sengko’ PANGERAN, Allahna Isra’il, ngoca’ ja’
5parcoma ba’na alaban ka oreng Babil, sabab se kantha jareya pera’ mossa’ana kottha reya ban mayyidda reng-oreng se bi’ Sengko’ epamate lantaran kapeggellanna Sengko’ ka reng-oreng jareya. Sengko’ ta’ soddi pole ngabas kottha reya, sabab reng-orengnga la ngalakone kajahadan.
6Tape pagi’ kabadha’anna kottha reya ban pandhudhu’na bi’ Sengko’ epabaliya akantha asalla; bangsa reya bakal kowada pole. Bi’ Sengko’ eberri’ana odhi’ se talebat raja ban aman.
7Yehuda ban Isra’il bi’ Sengko’ epajaja’a akantha lamba’ ban epajaga’a pole akantha asalla.
8Bi’ Sengko’ reng-oreng jareya epaberseya dhari sa-dusana ka Sengko’; sa-dusana ban kadaraka’anna bi’ Sengko’ esapora’a.
9Yerusalim daddiya Tang kagumbira’an, kahormadan ban Tang kabunga’an. Sakabbinna bangsa e dunnya reya bakal tako’a ban bakal kettera sarta hormada ka Sengko’ mon ngedhing sabarang se becce’ se elakone Sengko’ kaangguy pandhudhu’ Yerusalim, ban parkara kama’moran se epadhateng bi’ Sengko’ ka kottha jareya."
10PANGERAN adhabu, "Ca’na oreng kennengngan reya akantha ra-ara, ta’ ekennengnge oreng otaba keban. Jareya pajat bendher sabab tha-kottha Yehuda ban rong-lorong e Yerusalim la kosong kabbi; tadha’ oreng otaba keban se enneng e jadhiya.
11Tape e sakabbinna kennengngan jareya bakal ekaedhinga pole sowarana oreng se perak ban gumbira sarta sowarana jang-onjanganna pangantan. Bakal ekaedhinga keya sowarana nyanyeyanna reng-oreng se ngeba kurban sokkor ka Tang Padalemman. Reng-oreng jareya bakal ngoca’a, ‘Mara asokkor ka PANGERAN Se Mahakobasa, sabab Pangeran reya sae ban kataresna’anna tadha’ pegga’na.’ Nagara reya bi’ Sengko’ epama’mora akantha se asal. Sengko’, PANGERAN, la ngoca’."
12PANGERAN Se Mahakobasa adhabu, "Nagara ban tha-kotthana se akantha ra-ara reya ta’ ekennengnge manossa otabana keban. Maske kantha jareya, e budhi are bakal badha’a pole lon-talon kennengnganna reng-oreng ngowan ba-dumbana.
13E tha-kottha e dhaera pagunongan, e babana gunong, dhaera Yehuda lao’, ban e dhaerana Benyamin sarta e sa-disa e sabingkerra Yerusalim, ban e tha-kottha Yehuda, reng-oreng ngowan bakal ngetonga ba-dumbana pole. Sengko’, PANGERAN, la ngoca’."
14PANGERAN adhabu, "Bakal dhapa’a baktona Sengko’ neptebbana Tang janji ka Isra’il ban Yehuda.
15E bakto jareya settong oreng se adil dhari toronanna Daud bi’ Sengko’ epeleya epadaddiya rato. Rato jareya bakal ajalannagiya sabarang se adil ban bendher e sanagarana.
16Oreng Yehuda ban oreng Yerusalim bakal epasalamedda ban bakal amana odhi’na. Kottha Yerusalim bakal enyama’ana ‘PANGERAN Panyalamedda Sengko’ ban ba’na’.
17Sengko’, PANGERAN, ajanji ja’ salanjangnga bakal badha’a settong dhari toronanna Daud se daddiya rato Isra’il;
18salanjangnga bakal terrosa badha mam-imam dhari suku Lewi se aladine Sengko’ ban ngatorragi kurban keban, gandum ban tor-ator obbaran."
19PANGERAN adhabu ka sengko’,
20"Sengko’ la mabadha parjanjiyan bi’ seyang ban malem, sopaja seyang ban malem terrosa dhateng teppa baktona; parjanjiyan jareya ta’ ekenneng pabattal.
21Bariya keya Sengko’ la mabadha parjanjiyan ban Daud Tang abdi, ja’ dhari toronanna bakal terrosa badha settong se daddi rato; Sengko’ mabadha keya parjanjiyan ban mam-imam toronanna Lewi ja’ mam-imam Lewi jareya bakal terrosa aladine Sengko’. Parjanjiyan jareya kabbi ta’ ekenneng paburung.
22Toronanna Daud Tang abdi ban toronanna mam-iman suku Lewi bi’ Sengko’ epatamba’a terros bannya’na, sampe’ ta’ ekenneng bitong akantha bannya’na bintang e langnge’ ban beddhi e penggir sereng."
23PANGERAN adhabu ka sengko’,
24"Apa ba’na ngedhingngagi cacana oreng parkara Isra’il ban Yehuda? Ca’na reng-oreng jareya Sengko’ la mowang bangsa Tang peleyan se dhadhuwa’ rowa. Daddi reng-oreng jareya nganggep Tang ommat tadha’ ajina, Tang ommat ta’ eanggep menangka settong bangsa pole.
25Tape Sengko’, PANGERAN, la mabadha parjanjiyan bi’ seyang ban malem, ban agabay hokom se ngator langnge’ ban bume,
26bariya keya Sengko’ teptep neggu’i Tang parjanjiyan bi’ toronanna Yakub sarta ban Daud Tang abdi. Settong dhari toronanna Daud bi’ Sengko’ epeleya epamarenta’a toronanna Ibrahim, Ishak ban Yakub. Sengko’ bellasa ka Tang ommat; bi’ Sengko’ Tang ommat epama’mora pole."
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel