Alkitab Mobile SABDA
[VER] : [MADURA]     [PL]  [PB] 
 <<  Yeremia 34 >> 

1E bakto Nebukadnezar rato Babil ban angkadan perrangnga se ebanto bi’ kan-pasukan dhari sakabbinna bangsa ban nagara se atellok ka salerana entar nyerrang Yerusalim ban tha-kottha e sabingkerra, PANGERAN adhabu ka sengko’.

2Sengko’ epakon nyabis ka Zedekiya rato Yehuda, epakon mator kantha reya, "Sengko’, PANGERAN Allahna Isra’il, massra’agiya kottha reya ka rato Babil; bi’ rato Babil kottha reya bakal eobbara.

3Ba’na ta’ kera ngenneng lolos; ba’na bakal epega’a ban epassra’agiya ka rato Babil jareya. Ba’na bakal tatemmowa ban acaca’a dibi’ bi’ rato Babil, saellana jareya ba’na bakal entara ka Babil.

4Tape edhingngagi Tang caca parkara ba’na reya, Zedekiya. Ba’na ta’ kera mate e dhalem paperrangan;

5ba’na bakal mateya kalaban taremtem. Mon ba’na mate bi’ ra’yat bakal eobbarana mennyan, akantha e baktona ra’yat ngoburragi bangatowana ba’na se marenta sabellunna ba’na. Ra’yat bakal noduwagiya kasossa’anna sambi ngoca’, ‘Adhu! Tang rato la seda!’ Sengko’, PANGERAN, la ngoca’."

6Daddi sengko’ pas manapa’ dhabuna PANGERAN jareya ka Rato Zedekiya e Yerusalim,

7e bakto pasukanna rato Babil teppa’na nyerrang kottha jareya. Pasukan jareya nyerrang kottha Lakhis ban Aseka keya, iya reya kottha dhadhuwa’ se ngangguy binteng se gi’ teptep badha e Yehuda.

8Rato Zedekiya ban pandhudhu’ Yerusalim mabadha parjanjiyan mabebasa

9nor-dunorra se tamaso’ oreng Ibrani, se lalake’ ban se babine’ sopaja tadha’a oreng Isra’il se adunor bangsana dibi’.

10Ra’yat ban ja-pangrajana pamarenta se mabadha parjanjiyan jareya padha saroju’ mabebasa nor-dunorra jareya ban ajanji ta’ ekadunora pole, ajalannagi parjanjiyan jareya, nor-dunor Ibranina epabebas.

11Tape saellana jareya pekkeranna reng-oreng jareya laju aoba, nor-dunorra ekala’ pole, pas epaksa ekadunor pole.

12Daddi PANGERAN, Allahna Isra’il laju makon sengko’ ngoca’ kantha reya ka reng-oreng Isra’il jareya, "E bakto Sengko’ ngeba para bangatowana ba’na kalowar dhari Messer ban mabebas reng-oreng jareya dhari odhi’na se ekadunor, Sengko’ la mabadha parjanjiyan bi’ reng-oreng jareya.

13(34:12)

14Sengko’ ngoca’ ja’ sakabbinna dunor Ibrani se la aladine lorana nem taon abidda, kodu epabebas e aherra taon se kapeng petto’. Tape bangatowana ba’na ta’ endha’ ngestowagi apa se la ekoca’agi Sengko’ jareya.

15Gi’ buruwan reya ba’na ngoba kalakowanna sarta masenneng Tang ate. Ba’na kabbi padha saroju’ mabebasa nor-dunor sabangsana dibi’, ban mabadha parjanjiyan ban Sengko’ e Tang Padalemman.

16Ja-pangrajana pamarenta Yehuda ban Yerusalim abareng ban ba-ponggaba karaton, mam-imam ban sakabbinna pangawassa tanana ba’na la ngessa’agi parjanjiyan jareya kalaban cara nyambelli sape, sape jareya etogel dhuwa’; ba’na kabbi padha ajalan e antarana sape se dhu togel jareya. Tape saellana jareya pekkeranna ba’na aoba ban ya-nyeya Sengko’. Nor-dunor se bi’ ba’na la epabebas menorot pangaterrona, bi’ ba’na ekala’ pole, pas epaksa daddi dunor pole. Daddi Sengko’, PANGERAN, sateya ngoca’a ja’ ba’na ta’ atoro’ ka Tang parenta, ta’ neptebbi rat-saradda, sabab ba’na ta’ mabebas sasama bangsana ba’na Isra’il. Sateya, Sengko’ aberri’a kabebasan ka ba’na; pele dibi’: mate e dhalem paperrangan otabana mate lantaran wabah panyaket otabana kalaparan. Bi’ Sengko’ ba’na epakantha’a sape se bi’ ba’na esambelli rowa. Sakabbinna bangsa e dunnya bi’ Sengko’ epamarengesa nangale’e pa-apa se eteba’agi Sengko’ ka ba’na.

17(34:16)

18(34:16)

19(34:16)

20Bi’ Sengko’ ba’na epassra’agiya ka moso se terro mateyana ba’na. Mayyidda ba’na bakal ekakana mano’ ban burun alas.

21Zedekiya rato Yehuda ban para pangrajana pamarentana bi’ Sengko’ epassra’agiya ka reng-oreng se terro mateyana rato ban para pangrajana jareya. Bi’ Sengko’ epassra’agiya ka tantara Babil, se sateya la ondur dhari dhinna’ adina’agi ba’na.

22Sengko’ aberri’a tandha parenta sopaja reng-oreng jareya abaliya ka kottha reya, terros nyerrang, arebbu’ ban ngobbar kottha reya. Tha-kottha Yehuda bi’ Sengko’ epadaddiya akantha ra-ara beddhi se ta’ ekennengnge oreng. Sengko’, PANGERAN, la ngoca’."



 <<  Yeremia 34 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel