1PANGERAN abu-dhabu ka sengko’ parkara sakabbinna oreng Isra’il se badha e Messer, iya reya e kottha Migdol, Tahpanhes, Memfis ban e dhaera bagiyan lao’.
2Reya’ pessenna PANGERAN Se Mahakobasa, Allahna Isra’il ka reng-oreng jareya, "Ba’na dibi’ la nangale’e balai se eteba’agi Sengko’ ka Yerusalim ban sakabbinna kottha laenna e Yehuda. Sampe’ sateya tha-kottha jareya gi’ ancor tadha’ orengnga,
3polana pandhudhu’na dusa, mapeggel Tang ate. Reng-oreng jareya ngeba kurban ban abakte ka ba-diba se sabellunna jareya ta’ tao esemba bi’ reng-oreng jareya, ta’ tao esemba bi’ ba’na otabana bi’ para bangatowana ba’na.
4Sengko’ ros-terrosan ngotos Tang di-abdi, iya reya Tang bi-nabbi, esoro malae ba’na sopaja ba’na ja’ sampe’ ngalakone kajahadan se ekabaji’i Sengko’ jareya.
5Tape ba’na ta’ endha’ ngedhingngagi. Ba’na ta’ endha’ ambu ngalakone kajahadan, iya reya ngeba kurban ka ba-diba.
6Lantaran jareya Sengko’ neba’agi peggella Tang ate jareya ka tha-kottha Yehuda ban rong-lorong e Yerusalim. Kabbi bi’ Sengko’ eobbar sampe’ daddi jur-gujuran se kajal akantha se etangale’e sateya reya.
7Ban sateya reya Sengko’, PANGERAN Se Mahakobasa, Allahna Isra’il, atanya arapa ba’na me’ ngalakone barang se madhateng calaka’ raja ka aba’na dibi’. Apa ba’na terro mateyana sakabbinna oreng — lalake’, babine’, na’-kana’ ban babaji’ — sampe’ bangsana ba’na tadha’ karena maske settonga?
8Arapa ba’na me’ ngalakone sabarang se mapeggel Sengko’? Ngalle ka Messer, nagara manca monggu ka ba’na, pas nyemba brahala ban ngeba kurban ka ba-dibana nagara jareya! Apa ba’na maancora aba’na dibi’ sopaja ba’na eya-seya bi’ sakabbinna bangsa e dunnya reya ban nyamana a’na eangguya daddi babaston?
9Apa ba’na la loppa ka sakabbinna kajahadan se elakone e tana Yehuda ban e rong-lorong e kottha Yerusalim bi’ para bangatowana ba’na, bi’ to-rato Yehuda sarta binena, bi’ ba’na sarta binena ba’na?
10Tape sampe’ are teya ba’na ta’ marendha. Ba’na ta’ ngormat ka Sengko’ ban e dhalem odhi’na ta’ atoro’ ka hokom se bi’ Sengko’ ebagi ka ba’na ban ka para bangatowana.
11Lantaran jareya, Sengko’, PANGERAN Se Mahakobasa, Allahna Isra’il, daddiya mosona ba’na ban ngancora saantero Yehuda.
12Dineng mon e antarana oreng Yehuda se gi’ odhi’ badha se paggun terro ngalleya ka Messer, kabbi bakal mateya. Raja kene’ bakal mateya kabbi e Messer e dhalem paperrangan otabana polana kalaparan. Oreng bakal arassa’a marenges nangale’e reng-oreng se mate jareya; reng-oreng jareya bakal eya’-seya’a ban nyamana bakal eangguya daddi babaston.
13Akantha Sengko’ se ngokom Yerusalim, bariya keya Sengko’ ngokoma reng-oreng se enneng e Messer. Reng-oreng jareya bakal mateya e dhalem paperrangan, polana kalaparan otabana polana wabah panyaket.
14Re-karena oreng Yehuda, iya reya se entar ngalle ka Messer, tadha’ settonga se lopoda se bisa’a odhi’. Tadha’ settonga se bisa’a abali ka Yehuda, maske atena ce’ terrona. Ongguwan, tadha’ sa bisa’a abali kajabana pan-barampan oreng se ngongse."
15Saellana jareya pas bannya’ oreng entar ka sengko’, lalake’an se tao ja’ binena ngeba kurban ka diba, ban babine’an se teppa’na padha manjeng e jadhiya, tamaso’ oreng Isra’il se badha e Patros, bagiyan lao’na Messer. Ca’na reng-oreng jareya ka sengko’,
16"Kaula ta’ ngedhingngagiya se edhabuwagi sampeyan ka kaula kalaban asmana PANGERAN.
17Sadaja se ampon ejanjiyagi bi’ kaula, badhi elakonana. Kaula teptep ngeba’a kurban ka Dinaju Rato Sowarga, sareng nyelena anggur menangka tor-ator ka salerana akadi se biyasana elakone e tha-kottha Yehuda sareng e rong-lorong Yerusalim sareng para bangatowana kaula sadaja, sareng to-rato, jugan sareng ja-pangrajana pamarenta sareng kaula dibi’. E bakto gapaneka kaula sadaja padha ta’ kakorangan teddha’an, odhi’ ma’mor, tadha’ kasossa’an pa-ponapa.
18Tape sajjegga kaula ambu ngatorragi kurban ka Dinaju Rato Sowarga, sareng ta’ nyelen anggur menangka tor-ator ka salerana, kaula kakorangan sadajana; reng-orengnga bangsa kaula padha mate e dhalem paperrangan otabana polana kalaparan."
19Saellana jareya babine’anna ngoca’, "Lake kaula ngedine kaula agabay roti se epabangon akantha Dinaju Rato Sowarga sareng ngobbar kurban sarta ngatorragi anggur ka diba kaula."
20Ka sakabbinna lalake’an ban babine’an se ngoca’ kantha jareya, sengko’ ngoca’,
21"Apa bi’ ba’na PANGERAN esanggu ta’ ngagali otabana esanggu la ta’ emot ka ban-kurban se eatorragi e tha-kottha Yehuda ban e rong-lorong e Yerusalim bi’ para bangatowana ba’na, bi’ to-rato ban ja-pangraja, bi’ ra’yat nagara reya sarta bi’ ba’na dibi’?
22PANGERAN ta’ kellar ngampet ngoladi ba’na ngeba kurban ka lah-illah laen. Lalakon jareya jahat ban raceng. Ba’na la dusa ka PANGERAN ban ta’ ta’at ka kon-papakonna. Daddi, sateya reya keya nagarana ba’na la ancor sampe’ ta’ bisa ekennengnge oreng pole, ban nyamana bi’ oreng eangguya daddi babaston. Oreng se nangale’e tanto arassa marenges."
23(44:22)
24Saellana jareya sengko’ abala ka sakabbinna oreng jareya, bi-lebbi ka babine’anna, ja’ PANGERAN Se Mahakobasa adhabu kantha reya ka reng-oreng Yehuda se badha e Messer, "Ba’na kabbi ban binena padha asompa ka Dinaju Rato Sowarga ja’ ba’na ngobbara kurban ban ngeba’a tor-ator anggur ka Dinaju Rato Sowarga jareya. Ba’na la neptebbi janjina jareya. Iya, mara! La lakone apa’a bai se ejanjiyagi ba’na jareya!
25(44:24)
26Tape sateya mara edhingngagi se ekoca’agiya Sengko’ ka ba’na reya, he oreng Isra’il e Messer: Sengko’, PANGERAN, asompa bit Tang nyama se agung ja’ ba’na bi’ Sengko’ ta’ eedine ngangguy Tang nyama mon ba’na aji-janjiya. Ba’na ta’ olle ngoca’, ‘Sengko’ asompa bit asmana Guste ALLAH Se Mahatenggi se odhi’!’
27Bi’ sengko’ ba’na epacalaka’a ban epata’sennengnga odhi’na, sampe’ ba’na kabbi padha mate e dhalem paperrangan otabana polana wabah panyaket.
28Pera’ badha pan-barampan oreng se salamedda ban abali dhari Messer ka Yehuda. Reng-oreng Yehuda se badha e Messer kabbi bakal taowa cacana ba’na dibi’ otabana Tang oca’ se bendher.
29Sengko’ madhatengnga calaka’ ka ba’na e kennengngan reya menangka bukte ja’ okoman se la ekasajja bi’ Sengko’ ka ba’na bakal ejalannagiya.
30Hofra rato Messer bi’ Sengko’ epassra’agiya ka so-mosona se terro mateyana rato jareya, akantha Sengko’ se massra’agi Zedekiya rato Yehuda ka Nebukadnezar rato Babil, mosona se terro mateyana aba’na."
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel