1Reya’ se edhabuwagi PANGERAN Se Mahakobasa, parkara Mo’ab, "Palang pandhudhu’ Nebo, kotthana la gujur! Kiryata’im erebbu’ moso, bintengnga se koko epaancor, sampe’ pandhudhu’na daddi malo;
2la tadha’ se eandellagi Mo’ab. Moso la arebbu’ Hesybon ban e jadhiya moso jareya andhi’ sajja matompessa sakabbinna bangsa Mo’ab. Ra-sowara e kottha Madmen bakal serebba, sabab kottha jareya eserbuwa tantara.
3Edhingngagi! Pandhudhu’ Horona’im aera’, ‘Mate sengko’! Ancor sengko’!’
4Mo’ab la mosna! Cerrengnga na’-kana’ kene’ ekaedhing sampe’ ka Zowar.
5Edhingngagi sowarana tangessa e ga’-ongga’an ka Luhit, ban sowarana tangessa e ron-toronan ka Horona’im.
6Oca’na, ‘Duliyan! Pasalamet odhi’na ba’na! Buru pakantha hemar alas e ra-ara!’
7Mo’ab ba’na ngandellagi kakowadan ban kasogiyanna. Tape sateya ba’na dibi’ epakala’a. Kamos, dibana ba’na, ban para imam sarta para pangrajana ba’na eangko’a ka pambuwangan.
8Tha-kottha bakal ancora kabbi, tadha’ settonga se lopoda. Cora ban tana mandhap bakal mosna’a kabbi. Sengko’, PANGERAN, la ngoca’.
9Pasang paesan kaangguy Mo’ab, sabab sakejja’aggi’ nagara jareya epamosna’a epatadha’a karena. Tha-kotthana bakal gujura ban tadha’ oreng settonga se ennengnga e jadhiya."
10Palang oreng se ta’ ajalannagi kawajiban dhari PANGERAN kalaban gu-onggu! Palang oreng se ta’ ngonos peddhangnga ban ta’ mate’e oreng.
11PANGERAN adhabu, "Molae lamba’ Mo’ab odhi’ aman. Ta’ tao eangko’ ka pambuwangan. Mo’ab reya akantha aengnga anggur se epaeddet ban ta’ tao esalen ka baddhana anggur laenna. Anggurra gi’ ro’om ban nyaman.
12Tape bakal dhapa’a baktona Sengko’ nyorowa Mo’ab etotta’ epakantha anggur, ban dha-baddhana epakosong ban epabella.
13Mo’ab bakal astaba’a polana Kamos, dibana, padha ban oreng Isra’il se astaba polana Betel se eandellagi rowa.
14Baramma lalake’an Mo’ab me’ bangal ngoca’, ‘Sengko’ pahlawan, parjurit parjuga se la eoji e dhalem paperrangan?’
15Mo’ab ban tha-kotthana la epaancor, ngangodhadanna se paleng becce’ la epate’e. Sengko’ la ngoca’. Sengko’ rato, PANGERAN Se Mahakobasa.
16Balai se teba’a ka Mo’ab la badha e adha’na labang, sakejja’ aggi’ Mo’ab ancor.
17He ra-nagara tatanggana Mo’ab se la tao ka kasohoranna, mara ba’na pasossa polona Mo’ab jareya! Mara ngoca’, ‘Mo’ab la ta’ andhi’ kobasa pole, kakasohoranna ban kakowadanna la mosna!’
18He pandhudhu’ Dibon, mara toron dhari kennengnganna ba’na se molja; toju’ e tana e attas abu. Sabab se marosaga Mo’ab nagarana ba’na la dhateng, ban maancora sakabbinna bintengnga.
19Ba’na se enneng e Aroër, mara manjeng e penggir lorong sambi abassagi! Tanya’agi ka reng-oreng se ngenneng buru jareya, ban salamet, ‘Badha apa kowa?’
20Reng-oreng jareya bakal nyaoda, ‘Mo’ab la gaggar ban tadha’ ajina; daddi mara tangese. Berta’agi e salanjangnga Songay Arnon ja’ Mo’ab la ancor.’"
21"Okoman la eteba’agi ka tha-kottha e dhaera tana tenggi: ka Holon, Yahas, Mefa’at, Dibon, Nebo, Bet-Diblatayim,
22Kiryata’im, Bet-Gamul, Bet-Meyon,
23(48:22)
24Keriyot ban Bozra. Sakabbinna kotthana Mo’ab, jau ban semma’, la eokom.
25Kakowadanna Mo’ab la epotel, ban kakobasa’anna la epaancor. Sengko’, PANGERAN, la ngoca’."
26PANGERAN adhabu, "Pamabu’ Mo’ab jareya, polana nyombongngagi aba’na e adha’na Sengko’. Mo’ab bakal alu’-gulu’a gubang e dhalem otana dibi’, ekala’-gella’ oreng.
27Lamba’ gu ta’ oreng Isra’il se ekala’-gella’ bi’ Mo’ab, ekacaca akantha bangsa Isra’il reya se ekenneng pega’ abareng ban leng-maleng, ta’ iya?
28Pandhudhu’ Mo’ab, onduri tha-kotthana ba’na, pas enneng e gumo’ bato akantha dara se agabay lebunna e penggir jurang.
29Ba’na ce’ angkona! Sengko’ la ngedhing saapa sombongnga ba’na, tenggi atena, gathak ban angga’!
30Sengko’, PANGERAN, la tao ka kaangkowanna ba’na. Cacana kosong, lalakonna tadha’ artena.
31Daddi Sengko’ nangesana ba’na epakaja’a, ban nangesana reng-oreng e Kir-Heres, ibu kotthana ba’na.
32Bi-lebbi Sengko’ nangesana pandhudhu’ Sibma alebbiyan dhari pandhudhu’ Yaezer. Kottha Sibma reya akantha tamennan anggur se rang-carangnga nalar sampe’ gan Yaezer e dhajana Tang’ Mate. Tape sateya wa’-buwa’an mosem panassa ban buwana anggurra la epamosna.
33Tadha’ sowarana oreng raksoragan pole e tana Mo’ab se landhu. Aengnga anggurra bi’ Sengko’ epaambu ta’ epagili pole dhari pamerressanna anggurra. La tadha’ pole oreng se agabay anggur ban se asorak kaperagan.
34Oreng e Hesybon ban Eleyale nanges, tangessa ekaedhing sampe’ ka Yahas, ban ekaedhing keya bi’ reng-oreng dhari Zowar sampe’ ka Horona’im ban Eglat-Selisia. Reng-oreng jareya nanges polana aeng e cangkana Songay Nimrim la kerreng.
35Sengko’ maambuwa bangsa Mo’ab ngobbar kurban e ngan-kennengnganna pamojja’anna ban epaambuwa ngeba kurban ka ba-dibana. Sengko’, PANGERAN, la ngoca’.
36Dhi’-andhi’na Kir-Heres ban saantero Mo’ab la mosna. Sengko’ ce’ ngennessa nangale’e kabadha’anna se kantha jareya, Sengko’ akantha oreng se nope soleng, mamonye lagu se ngennes.
37Reng-oreng jareya kabbi padha nyokor obu’na ban janggu’na, lengngenna elokae, sarta ngangguy kalambi karong menangka tandha sossa.
38E attassa ata’na ko-bengko ban e lon-alon se ekaedhing tadha’ laen kajabana sowarana oreng nanges. Sabab bi’ Sengko’ Mo’ab la epabella epakantha pennay se ta’ ekendha’i oreng.
39Mo’ab la ancor! Todhussa Mo’ab! Mo’ab nanges polana eya-seya ban ekala’gella’ sa-bangsa e sakalenglengnga. Sengko’, PANGERAN, la ngoca’."
40PANGERAN adhabu, "Akantha mano’ rajabali se nyaop ban menthang kalembangnga, kantha jareya keya bakal dhatengnga settong bangsa nyaoba Mo’ab.
41Tha-kotthana ban teng-bintengnga bakal erebbu’a ban tantarana bakal katako’ana akantha babine’ se rembi’a.
42Mo’ab bakal ancora ban ta’ daddi bangsa pole, sabab ga’-maangga’ e adha’na Sengko’.
43Bangsa Mo’ab ngadhebbi terror, bang-lobang ban jira’.
44Oreng se buru dhari terror bakal tabalusoga ka lobang, oreng se kalowar dhari lobang bakal tajira’a. Jareya kabbi bakal kalakona e bakto se bi’ Sengko’ la etantowagi kaangguy maancor Mo’ab.
45Reng-oreng ngongse se ta’ bisa apa-rapa nyare pangaoban e Hesybon, tape kottha jareya teppa’na katonon, ban karatonna Rato Sihon teppa’na katonon keya. Apoy matompes dhaera bagiyan bates ban pagunongan Mo’ab, nagarana reng-oreng se dujan aperrang jareya sampe’ tadha’ karena.
46Palang Mo’ab! Pandhudhu’na se nyemba Diba Kamos la epatompes, na’-ana’na eangko’ egabay tawanan.
47Tape e budhi are kabadha’anna nagara Mo’ab jareya bi’ Sengko’ epabaliya akantha asalla. Sengko’, PANGERAN, la ngoca’!" Jareya se elampa’agiya PANGERAN ka Mo’ab.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel