Alkitab Mobile SABDA
[VER] : [MADURA]     [PL]  [PB] 
 <<  Yeremia 49 >> 

1Reya’ se edhabuwagi PANGERAN parkara Amon, "Arapa tanana suku Gad me’ erebbu’ ban ekennengnge reng-oreng se nyemba Diba Milkom? Apa la tadha’ oreng Isra’il se bisa abilla dhaera jareya?

2Tape bakal napa’a baktona pandhudhu’ Raba, ibu kotthana nagara Amon jareya, bi’ Sengko’ epangedhinga reng-cerrengnga paperrangan. Kottha jareya bakal daddiya jur-gujuran ban sa-disa e sabingkerra bakal katonona sampe’ tadha’ karena. Saellana jareya Isra’il bakal ngala’a pole tanana dhari reng-oreng se arebbu’ tana jareya lamba’.

3He oreng Hesybon, mara nanges sabab kottha Ai la ancor! He babine’an kottha Raba, mara nanges pakaja! Angguy kalambi karong menangka tandha sossa. Berka’ pabingong ka bara’ ka temor. Milkom, dibana ba’na eangko’a ka pambuwangan epabarengnga ban mam-imam sarta para pangrajana pamarentana ba’na!

4He oreng se ta’ esto! Arapa ba’na me’ ngandellagi ra-corana se landhu? Arapa ba’na me’ ngandellagi dhi’andhi’na? Baramma’a me’ bisa ngoca’ ja’ tadha’ oreng se bangala nyerrang ba’na?

5Ba’na bakal nanggunga kakejjemman se bi’ Sengko’ epadhatengnga dhari man-dhimman. Ba’na bakal buruwa nyare salamedda bang-sebang, ban tadha’ se makompola ba’na pole.

6Tape e budhi are kabadha’anna bangsa Amon bi’ Sengko’ epabaliya akantha asalla pole. Sengko’, PANGERAN, la ngoca’."

7Reya’ se dhabuwagi PANGERAN Se Mahakobasa parkara Edom, "Apa oreng Edom la ta’ bisa apekker se bicaksana pole? Apa para panasehadda la ta’ aberri’ babala’an pole? Apa kabicaksana’anna la mosna?

8He pandhudhu’ Dedan, kassa’ abalik pas buru! Kassa’ ngetek! Sengko’ ngancora toronanna Esau, sabab reng-oreng jareya la napa’ baktona eokom bi’ Sengko’.

9Mon oreng molong anggur, masthe gi’ badha se edina e bungkana, ban mon maleng dhateng e baja malem, tanto pera’ ngala’ barang se ekaterro.

10Tape Sengko’ la nyapowe dhi’-andhi’na toronanna Esau epaberse, pangetegganna ebukka’; sateya la ta’ ngenneng ngetek pole. Oreng Edom ban tan-taretanna ban ga-tatanggana kabbi la epatompes, tadha’ settong se lopoda.

11He Edom! Dina na’-ana’ jatimma ka Sengko’, bi’ Sengko’ epeyara’a. Dina para randhana ba’na me’ parcaja ka Sengko’.

12Oreng se ta’ patot eokom gi’ ekenneng okoman keya, masa’ ba’na enja’? Ba’na tanto kodu eokom!

13Sengko’ asompa bit Tang nyama dibi’ ja’ kottha Bozra epadaddiya kennengngan se nako’e se eonduri oreng. Bi’ oreng bakal ekala’-gella’a ban nyamana bakal eangguya daddi babaston. Sa-disa e sabingkerra bakal daddiya jur-gujuran kabbi salanjangnga. Sengko’, PANGERAN, la ngoca’."

14Sengko’, Yeremiya, ngoca’, "He Edom, sengko’ la narema berta dhari PANGERAN. PANGERAN la ngerem otosan ka sa-bangsa se epakon makompol tantarana ban aya-sadhiya kaangguy nyerrang ba’na.

15Bi’ PANGERAN ba’na epata’andhi’a kakowadan ban eya-seya oreng.

16Ba’na ekenneng tepo kaangkowanna. Tadha’ se tako’ ka ba’na akantha se daddi parsangka’anna ba’na. Ba’na enneng e ke’-lekke’na bato e konco’na gunong. Tape, maske bengkona ba’na epaddegga e kennengngan se ce’ tenggina akantha tenggina kennengnganna mano’ rajabali, bi’ PANGERAN ba’na epatorona dhari jadhiya. PANGERAN se adhabuwagi reya kabbi."

17PANGERAN adhabu, "Balai se teba’a ka Edom bakal talebat berra’na sampe’ saneyap oreng se lebat e jadhiya bakal takerjada ban arassa tako’.

18Akantha Sodom ban Gomora se epamosna ban sa-disa e sabingkerra, bariya keya Edom. Tadha’ settonga oreng se ennengnga e jadhiya pole. Sengko’, PANGERAN, la ngoca’.

19Akantha macan se mo’dul dhari alas raja e seddi’na Songay Yordan ban entar ka talon kennengnganna ba-dumba amba, bariya keya Sengko’ dhatengnga se andaddiyagiya oreng Edom padha buru daksakala dhari nagarana. Sengko’ pas meleya settong pamimpin se epamarenta’a bangsa jareya. Sapa se ekenneng papadha ban Sengko’? Sapa se bangal aparkara ban Sengko’? Apa badha pamimpin se bisa ngadhebbi Sengko’?

20Daddi mara edhingngagi apa se la ekasajja Sengko’ ka oreng Edom ban apa se eteba’agiya bi’ Sengko’ ka pandhudhu’ kottha T’eman. La’-mala’ na’-ana’na eereda egiba’a keya, sampe’ oreng padha katako’an kabbi.

21Mon Edom la gaggar, oreng bakal ngedhinga sowara se talebat baridhu sampe’ sadunnya agundhek kabbi; cerrengnga pandhudhu’na bakal ekaedhinga sampe’ ka Tase’ Galagas.

22Moso bakal dhatengnga nyerrang Bozra akantha mano’ rajabali se nyaop bi’ kalembangnga se mekkar. E bakto jareya Edom bakal katako’ana akantha babine’ se sake’ tabu’ rembi’a."

23Reya’ dhabuna PANGERAN parkara Damsyik, "Pandhudhu’na kottha Hamat ban Arpad kobater ban ngalengsang polana ngedhing kabar ta’ nyaman. Atena sompek ban bingong ta’ kala ka omba’na tase’.

24Pandhudhu’ Damsyik kaelangan kakowadanna, pas buru katako’an. Reng-oreng jareya arassa sake’ ban nyandhang sangsara akantha babine’ se sake’ tabu’ rembi’a.

25Kottha se kasohor ban gumbira jareya sateya seppe tadha’ orengnga.

26E are jareya ngangodhadanna bakal mateya e rong-lorong ban tantarana bakal ancora kabbi.

27Dhung-geddhungnga Damsyik bi’ Sengko’ eobbara, ban ton-karatonna Rato Benhadad epakatonona. Sengko’, PANGERAN Se Mahakobasa, la ngoca’."

28Reya’ se edhabuwagi PANGERAN parkara ku-suku Kedar ban ra-dhaera kakobasa’anna Hazor se la erebbu’ bi’ Nebukadnezar rato Babil, "He Nebukadnezar, serrang suku Kedar, pate’e reng-oreng se badha e bagiyan temor!

29Rampas ebin dumbana, ontana ban mah-kemahna ban saessena, sambi aera’ ka reng-oreng jareya, ‘Ba’na ekalenglenge terror!’

30He oreng Hazor! Sengko’, PANGERAN, maenga’a ba’na: Duli ngongse, pas ngetek. Nebukadnezar rato Babil la asajja nyerranga ba’na. Ca’na Nebukadnezar jareya,

31‘Mara maju! Mara nyerrang reng-oreng se arassa aman ban taremtem rowa. Kotthana ta’ abukka’ sabab tadha’ labang sakethengnga ban tadha’ palangnga.’"

32PANGERAN adhabu pole ka Nebukadnezar, "Rampas kabbi onta ban ebinna reng-oreng jareya! Reng-oreng se obu’na eketthok epapandha’ jareya bi’ Sengko’ epabalessadana san-kassannagi. Sengko’ madhatengnga balai ka reng-oreng jareya dhari man-dhimman.

33Hazor bakal ta’ taorosa salanjangnga ban daddiya pangetegganna pate’ alas. Tadha’ oreng settonga se ennengnga e jadhiya pole. Sengko’, PANGERAN, la ngoca’."

34Ta’ abit saellana Zedekiya jumenneng rato Yehuda, PANGERAN Se Mahakobasa adhabu ka sengko’ parkara nagara Elam.

35Dhabuna PANGERAN, "Reng-oreng ahli ngocol pana se makowat nagara Elam bi’ Sengko’ epateyana kabbi.

36Sengko’ madhatengnga angen ka Elam dhari man-dhimman, pandhudhu’na epabalessadana san-kassannagi sampe’ tadha’ nagara settonga se ta’ eentare reng-oreng se ngongse dhari Elam.

37Oreng Elam bi’ Sengko’ epatako’a ka mosona se terro mateyana aba’na. Sengko’ ce’ peggella ka oreng Elam jareya, daddi bi’ Sengko’ epaancora. Sengko ngerema tantara epamerrangana Elam jareya sampe’ kabbi tadha’ karena.

38To-ratona ban ja-pangrajana bi’ Sengko’ epaancora, ban e nagarana reng-oreng jareya Sengko’ maddegga Tang tahta.

39Tape e budhi are, kabadha’anna Elam bi’ Sengko’ epabaliya ka asalla. Sengko’, PANGERAN, la ngoca’."



 <<  Yeremia 49 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel