Alkitab Mobile SABDA
[VER] : [MADURA]     [PL]  [PB] 
 <<  Yeremia 7 >> 

1PANGERAN makon sengko’ entar ka Padalemmanna sarta manjeng e labang saketheng se elebadi oreng Yehuda se abakteya. PANGERAN makon sengko’ manapa’agi dhabuna reya ka reng-oreng jareya, "Mara oba kalakowanna ban cara odhi’na ba’na, sopaja Sengko’, PANGERAN Se Mahakobasa, Allah se esemba Isra’il, ngedinana ba’na teptep enneng e dhinna’.

2(7:1)

3(7:1)

4Ba’na ja’ parcaja ka tokang tepo se ngoca’, ‘Sengko’ ban ba’na aman, sabab reya Padalemman Socce. Ongguwan, reya Padalemman Socce!’

5Mara oba odhi’na ba’na ban tengka polana. Padha saleng paadil oreng se settong ka settonganna.

6Ja’ nendhes oreng manca pole, bariya keya dha-randha ban na’-kana’ jatim. Ja’ mate’e oreng se ta’ andhi’ sala e nagara reya. Ja’ nyemba lah-illah laenna, sabab hal jareya bakal mamateya ba’na.

7Mon ba’na ngoba cara odhi’na sarta kalakowanna sarta ambu ngalakone jareya kabbi, bi’ Sengko’ ba’na eedinana teptep enneng e nagara se bi’ Sengko’ la ebagi ka ba’na menangka tana sangkolan ka bangatowana ba’na.

8Tape, sanyatana parcoma ba’na parcaja ka ca’-oca’ se lecek.

9Ba’na co’-ngeco’, mate’e oreng, azina, daddi sakse palsu, ngeba kurban ka Ba’al, ban nyemba ka ba-diba, mangkana ba’na ta’ kennal ka ba-diba jareya.

10Saellana ba’na ajalannagi jareya kabbi, ba’na dhateng ngadhep ka Sengko’ e dhinna’ e Tang Padalemman dibi’, sambi ngoca’, ‘Sengko’ ban ba’na aman!’ Saellana jareya pas nerrossagi lalakonna ba’na se juba’ jareya.

11Apa bi’ ba’na Tang Padalemman reya eanggep rongkangnga bigal? Sengko’ nangale’e ka sakabbinna tengkana ba’na.

12Kassa’ entar ka Silo, kottha se lamba’ bi’ Sengko’ epele ekagabay kennengnganna oreng abakte ka Sengko’. Abassagi, epabaramma bi’ Sengko’ kennengngan jareya polana dusana Tang ommat Isra’il.

13Maske li-baliyan Sengko’ acaca ka ba’na, ba’na ta’ endha’ ngedhingngagi. Ba’na agabay dusa jareya kabbi, ban ta’ endha’ nyaot mon eolok bi’ Sengko’.

14Sateya, Tang Padalemman se eandellagi ba’na reya, kennengngan se bi’ Sengko’ ebagi ka bangatowana ba’na sarta ka ba’na kabbi, bi’ Sengko’ epapadha’a bi’ Silo lamba’.

15Ba’na bi’ Sengko’ eojuga dhari adha’na Tang mata akantha Sengko’ se ngojuk la-balana ba’na, ommat Isra’il."

16PANGERAN adhabu, "Yeremiya, ba’na ja’ adu’a'agi reng-oreng reya. Ba’na ta’ osa menta’agi tolong otaba adu’a'agi reng-oreng jareya; ja’ maksa ka Sengko’, sabab Sengko’ ta’ endha’ ngedhingngagi parnyo’onan jareya.

17Ba’na la nangale’e dibi’ apa se elakone reng-oreng jareya e tha-kottha Yehuda ban e lan-jalan e Yerusalim!

18Na’-kana’ makompol kaju, oreng lalake’an ngodhi’i apoy, oreng babine’an nyampor adun aola’a jajan se ebagiya ka dewi se bi’ reng-oreng jareya enyamae Ratona Sowarga. Ban kaangguy nyake’e Tang ate, reng-oreng jareya gi’ ngalakone barang se daraka laenna, iya reya ngeba tor-ator anggur ka lah-illah laenna.

19Tape sanyatana banne Sengko’ se esake’e bi’ reng-oreng jareya, tape aba’na dibi’ sampe’ aba’na malo.

20Sengko’, GUSTE Allah Se Mahatenggi, neba’agiya kapeggellanna Tang ate se nako’e bengko kennengnganna kabakteyan reya, ka manossa sarta ban-keban, bariya keya ka ka’-bungka’an ban hasel bume. Peggella Tang ate bakal bal-kobalana akantha apoy se ta’ ekenneng pate’e."

21PANGERAN adhabu, "He Tang ommat, ba’na tao ja’ kurban se eobbar e attassa mezba kodu eobbar sampe’ epatadha’, ban tor-ator laenna olle kakan. Tape Sengko’, PANGERAN, ngoca’, kakan kabbi!

22E bakto Sengko’ ngeba bangatowana ba’na kalowar dhari Messer, Sengko’ ta’ aberri’ atoran ka reng-oreng jareya parkara kurban obbaran otabana ban-kurban laenna.

23Sengko’ pera’ marenta’agi ka reng-oreng jareya sopaja ta’at ka Sengko’ me’ olle Sengko’ daddi Allahna, ban reng-oreng jareya daddi Tang ommat. Sengko’ nyoro reng-oreng jareya odhi’ noro’ sakabbinna Tang parenta sopaja senneng odhi’na.

24Tape reng-oreng jareya ta’ endha’ ngedhingngagi ban ta’ endha’ ngestowagi. La’-mala’ pera’ noro’ karebba atena dibi’ se kerras ban jahat. Reng-oreng jareya banne daddi bagus, tape la’-mala’ sajan atamba jahat.

25Sajjegga bangatowana ba’na kalowar dhari Messer sampe’ are sateya Sengko’ ros-terrosan ngotos Tang di-abdi, para nabbi, ka ba’na.

26Tape tadha’ e antarana ba’na se ngedhingngagi otabana se ngestowagi. La’-mala’ ba’na acengkalan ban ajahadan dhari bangatowana."

27Saellana jareya PANGERAN adhabu, "Daddi, he, Yeremiya, maske ba’na la ngabala jareya kabbi ka Tang ommat, ta’ kera reng-oreng jareya ngestowagi cacana ba’na. Maske ba’na ngolok reng-oreng jareya, ba’na ta’ kera esaodi.

28Daddi, koca’ ka reng-oreng jareya ja’ reng-oreng jareya tamaso’ settong bangsa se ta’ endha’ ta’at ka Sengko’, PANGERAN, Allahna reng-oreng jareya. Reng-oreng jareya ta’ endha’ ngala’ pangajaran dhari okoman se la tao erassa’agi. Kaestowanna ka Sengko’ la tadha’ karena, la’-mala’ la ta’ tao ekacaca pole."

29PANGERAN adhabu, "Reng-oreng Yerusalim, mara ba’na pasossa! Obu’na ketthok pas buwang! Mara anyanye nyanyeyan tangesan e co’-konco’na pagunongan, sabab Sengko’, PANGERAN, parappa’na ce’ peggella sarta nolak ba’na kabbi.

30Oreng Yehuda la alako jahat. La-brahalana se ekabaji’i Sengko’ bi’ reng-oreng jareya esaba’ e dhalem Tang Padalemman, manajjis kennengngan jareya.

31Reng-oreng jareya maddek mezba se enyamae Tofet neng e Cora Hinom se egabay kennengnganna pangobbaranna na’-ana’na se ekagabay kurban obbaran. Mangkana Sengko’ ta’ tao aberri’ parenta se cara jareya ka reng-oreng jareya, la’-mala’ Sengko’ ta’ tao andhi’ pekkeran parkara reya.

32Daddi, bakal napa’a baktona kennengngan jareya ta’ anyama’a Tofet otabana Cora Hinom pole, pas egante enyamae Cora Pajagalan. Tana jareya bakal daddiya tana koburan sabab tadha’ kennengngan laenna se egabaya kennengnganna abendhem na’-kana’ se ejagal jareya.

33Yit-mayyidda bakal daddiya kakanna mano’ ban burun alas se galak se bakal ngakana ta’ kalaban badha se ngagga.

34Nagara reya bakal daddiya tana kajal. Sowarana oreng anga-bunga ban sowarana pestana pangantan bi’ Sengko’ epatadha’a ban ta’ kera ekaedhing pole e tha-kottha Yehuda ban e lan-jalan e Yerusalim.



 <<  Yeremia 7 >> 


Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel Single Panel