1PANGERAN bakal bellasa ka Isra’il ommadda; bangsa jareya epeleya pole epadaddiya kaagunganna, epabaliya pole ka kennengnganna e nagarana dibi’. Oreng manca bakal dhatengnga akompola ban bangsa jareya.
2Bannya’ bangsa se nolonga Isra’il kaangguy abali ka nagara se eparengngagi PANGERAN ka bangsa jareya, ban e jadhiya sa-bangsa jareya bakal daddiya dunorra bangsa Isra’il. Isra’il bakal nawana reng-oreng se tao nawan aba’na ban marenta’a reng-oreng se tao nyek-ngenyek aba’na.
3PANGERAN mabebasa bangsa Isra’il dhari sake’ ban kasangsara’anna, dhari lako berra’ se epaksa’agi ka aba’na.
4Mon jareya la elampa’agi bi’ PANGERAN, bangsa jareya bakal co-ngocowa rato Babil kantha reya, "Rato se kejjem la ta’ andhi’ kakobasa’an pole! La ta’ bisa nyek-ngenyek oreng pole.
5PANGERAN la maambu pamarenta’anna reng-oreng jahat se neggu’ kakobasa’an
6se sambi peggel nyek-ngenyek sarta ros-terrosan nganeyaja sa-bangsa.
7Dhi-budhina dunnya aman ban taremtem, reng-oreng padha anyanye kaperagen.
8Ka-bungkana eru ban comara Libanon anga-bunga polana rato se kejjem la ta’andhi’ kakobasa’an pole, ban saellana rato jareya ondur, tadha’ se nyoro moger ka’-bungka’an jareya.
9Dunnyana oreng mate anyo-ronyo ngamba’ rato Babil jareya. Arwahna reng-oreng se lamba’ neggu’ kakobasa’an e bume padha jaga, ban arwahna to-rato padha ngadek dhari kalenggiyanna.
10Kabbi padha aera’ ka rato Babil jareya, "He, sateya ba’na la padha ban sengko’, padha ta’ andhi’ kakowadan ban ta’ bisa apa-rapa!
11Lamba’ ba’na ehormadi bi’ mosik calempong, tape sateya ba’na la badha e dunnyana oreng mate se seppe. Ola’ daddi lama’na katedhunganna ba’na ban caceng daddi sapo’na.’
12He rato Babil, lamba’ ba’na bintang temor se tera’ mancorong, sateya ba’na la gaggar dhari langnge’! Lamba’ ba’na makala sa-bangsa, tape sateya ba’na epelpallagi ka tana.
13Ba’na atekat ongga’a ka langnge’, nyaba’a korse karaja’anna e attassa bintang se paleng tenggi! Ca’na pekkerra ba’na tanto bisa toju’ daddi rato e attassa gunong bagiyan dhaja, kennengnganna ba-diba akompol.
14Ba’na ngoca’ ja’ ba’na ongga’a ka konco’na ondhem ban daddiya padha ban Se Mahakobasa.
15Mangkana ba’na sateya edilbussagi ka bagiyan se paleng dhalem dhari dunnyana oreng mate.
16Reng-oreng mate se badha e jadhiya bakal mandengnga ka ba’na, sambi atanya, ‘Areya ya, oreng se magundhek bume ban mengetter sakabbinna karaja’an?
17Areya oreng se ngancor tha-kottha ban ngoba dunnya epadaddi sagara beddhi? Areya oreng se ta’ tao ngocol tawananna otaba mamole tawananna ka bengkona?
18Sakabbinna bekkas ratona sa-bangsa ekoburragi kalaban cara se agung e makamma bang-sebang,
19tape ba’na ta’ andhi’ makam; mayyidda ba’na ebuwang akantha barang se bucco’, ececce’e mayyidda para parjurit se tebas e dhalem perrang, epelpallagi epabareng ban mayyidda reng-oreng jareya ka lobang e to-bato, akantha babathang se enyek-enyek.
20Ba’na la mate’e nagarana ban bangsana dibi’. Daddi ba’na ta’ kera ekoburragi akantha to-rato laenna. Tadha’ settonga dhari balana ba’na se jahat jareya se salamedda.
21La-balana ba’na bakal mola’ana ejagal! Na’-ana’na ba’na bakal mateya lantaran dusana bangatowana. Tadha’ settonga dhari na’-ana’na ba’na jareya se marenta’a e bume otabana se maddegga tha-kottha."
22PANGERAN Se Mahakobasa adhabu, "Sengko’ nyerranga ban mamosna’a Babil. Tadha’ settonga se epasalamedda bi’ Sengko’, maske na’-kana’ tadha’ se epaodhi’a. Sengko’, PANGERAN, la ngoca’.
23Bi’ Sengko’ Babil epadaddiya ba-raba se ekennengnge mano’ wek-kowek. Bi’ Sengko’ Babil esapowana epaberseya. Sengko’, PANGERAN Se Mahakobasa, la ngoca’."
24PANGERAN Se Mahakobasa asompa, "Sabarang se ekakarep Sengko’ tanto kalakon.
25Oreng Asyur e Isra’il Tang nagara bi’ Sengko’ epatompessa, se badha e nong-gunong enyek-enyegga. Sengko’ mabebasa Tang bangsa se enyek-enyek ban dhari kasossa’an se etanggungngagi bi’ oreng Asyur.
26Jareya Tang karep ka dunnya reya; Sengko’ ngangka’ Tang lengngen ngokoma sa-bangsa."
27PANGERAN Se Mahakobasa la motossagi kantha jareya. Lengngenna eangka’ ngokoma, tadha’ oreng settonga se bisa’a lang-ngalange.
28Areya’ pessen se eomommagi e dhalem taon bakto Rato Ahas seda.
29He bangsa Filistin, thong-penthong se epamokol ba’na la potong, tape ba’na ja’ duli perak. Sabab mon olar se jahat mate, bakal dhatengnga olar se ajahadan se aganteya, ban tellorra olar se nettes bakal kalowara naga se akalembang.
30Ba’na bakal nyandhanga kalaparan se talebat berra’na, ban karena oreng se gi’ odhi’ bakal epateyana kabbi. Sabaligga, oreng se paleng mesken dhari ommadda PANGERAN bakal olleya kakan, ban oreng se paleng ta’ bisa apa-rapa e dhalem odhi’na bakal odhi’a aman tor rajja.
31Mara nanges, aera’ menta tolong, tha-kottha Filistin! Mara ba’na kabbi padha pabaridhu katako’en! Ondhem abu dhateng dhari dhaja nandha’agi dhatengnga pasukanna moso; moso jareya tadha’ se ekatako’e.
32Apa se esaoddagiya sengko’ ban ba’na ka reng-oreng se daddi otosanna bangsa Filistin? Ba’na ban sengko’ kodu ngoca’ ja’ PANGERAN la maddek Siyon, ban ommadda se nanggung sangsara bakal olleya pangaoban e jadhiya.
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel