1Palang kottha Yerusalim se esebbut mezbana Allah! Palang kottha kennengnganna Daud akemah! Dina taon se settong ban settongnga me’ saleng sosol ban ta-pestana,
2tape Allah madhatengnga balai ka kottha jareya, sampe’ reng-oreng padha aserrowan. Saantero kottha katon padha ban mezba se buddhak dhara.
3Kottha jareya bakal eserranga bi’ Allah ban ekepponga dhari man-dhimman.
4Yerusalim akantha din-dadin se aehteyar makalowara sowarana dhari dhalem tana sopaja ekaedhinga oreng, sowara se ta’ terrang dhari dhalem abu.
5Tape reng-oreng manca se kejjem jareya bakal elanga akantha abu otabana sekkem se eabber angen. O-tao ban ta’ eka-sangka
6PANGERAN Se Mahakobasa bakal mabebasa kottha jareya ngangguy kaleng busbus ban lendhu se nako’e. Pangeran bakal madhatengnga kaleng busbus ban apoy se ngamok.
7Pasukan manca se nyerrang Yerusalim, kotthana mezbana Allah, kabbi se ngeppong ban se agempur kottha jareya, bakal elanga akantha mempe e baja malem.
8Sa-bangsa se akompol nyerranga Yerusalim bakal padha’a ban oreng se kalaparan se amempe teppa’na ngakan, pas jaga tape tabu’na tadha’ essena, otabana akantha oreng se kapelka’en se amempe teppa’na ngenom, pas jaga kalaban gerrungan se kerreng.
9Paterros ba’na se getton ban meddem akantha oreng buta! Bu’-mabu’, tape banne polana ngenom anggur. Padhing-tabarindhing pajalanna, maske ta’ ngenom arak.
10Bi’ PANGERAN ba’na epangantok ban epangeddha. Matana para nabbi etotobi ban mowana reng-oreng se ngabas ekodhunge.
11Artena saneyap pangatonan bakal ta’ etangaleyana bi’ ba’na, akantha buku se esegel. Mon buku jareya egiba ka oreng se bisa maca sopaja ebaca’agiya ka ba’na, oreng jareya bakal ngoca’a ta’ bisa, sabab buku jareya esegel.
12Mon egiba ka oreng se buta horop, oreng jareya bakal nyaoda ta’ bisa maca.
13Dhabuna Pangeran, "Reng-oreng jareya nyemba Sengko’ pera’ cacana malolo, tape atena jau dhari Sengko’. Agamana pera’ atoranna manossa se ehapallagi.
14Lantaran jareya reng-oreng jareya bi’ Sengko’ epangejjida ngangguy pokolan se li-baliyan. Oreng se bicaksana bakal budhuwa, kapenterranna bakal ta’ aguna’a."
15Palang oreng se aehteyar ngalengana rancanana dhari PANGERAN! Apa se elakone ta’ asa’-kasa’, pangrasana tadha’ oreng se nangale’e otaba se tao apa se elakone aba’na.
16Sabarang elik-balik. Se kemma se lebbi penting, tokang agabay polo’ otaba lempong? Ba’ bisa’a barang se ekagabay ngoca’ ka se agabay, "Banne ba’na se agabay sengko’"? Otabana ba’ bisa’a barang jareya ngoca’, "Ba’na ta’ tao pa-apa"?
17Badha ca’-oca’an se monyena kantha reya, "Ta’ abit pole alas bakal daddiya tana partaneyan, ban tana partaneyan abaliya daddi alas."
18E bakto jareya oreng kopok bakal bisa’a ngedhing ca’-oca’ se ebaca’agi dhari buku, ban oreng buta se dha’-adha’na odhi’ e dhalem pettengnga bakal bisa’a nangale.
19Reng-oreng mesken ban nespa bakal ngarassa’agiya pole kasennengngan paparengnga Allahna Isra’il se socce.
20Jareya dhi-budhina oreng se nyek-ngenyek oreng laen ban se ya-nyeya Allah. Allah bakal matompessa sakabbinna oreng se nyandhang dusa,
21oreng se dujan metenna, oreng se lang-ngalange sopaja oreng jahat ta’ eokom, ban oreng se mabalattra ta-careta lecek sopaja oreng se jujur ta’ narema’a kaadilan.
22Daddi PANGERAN, Allahna Isra’il se mabebas Ibrahim, sateya adhabu, "Tang bangsa, ba’na ta’ kera eya-seya pole, ban mowana ba’na ta’ kera pocet pole lantaran malo.
23Sabab mon ba’na nangale’e na’-ana’na ba’na baberri’na Sengko’, ba’na tanto ngakone ja’ Sengko’ reya Allah se socce se esemba Isra’il. Ba’na tanto pas hormat ban tako’ ka Sengko’.
24Oreng budhu bakal ajara sopaja ngarteya ban oreng se salanjangnga ango’ngo’an bakal sennengnga eajari."
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel