1Ra-kera e bakto jareya Hizkiya songkan para’ seda’a. Nabbi Yesaya, pottrana Amos, nyabis laju mator, "PANGERAN adhabu sopaja junandalem malastare sadajana orosan, sabab junandalem ta’ kera sae. Ta’ abit pole junandalem badhi seda’a."
2Hizkiya atole addhep ka geddhung, laju adu’a,
3"GUSTE, kaemodi ja’ abdidalem ka’dhinto ampon ngabdi ka Junandalem kalaban ate se esto sareng ehlas. Abdidalem salanjangnga aehteyar norodi kasokanna Junandalem." Hizkiya pas molar ce’ mellassa.
4Saellana gubar, bi’ PANGERAN Yesaya epakon
5abali ka Hizkiya kaangguy manapa’ pessen reya, "Sengko’, PANGERAN, Allah se esemba Daud bangatowana ba’na, la ngedhing du’ana ba’na ban nangale’e aeng matana ba’na. Sengko’ namba’ana omorra ba’na lema bellas taon aggi’.
6Ba’na ban kottha Yerusalim bi’ Sengko’ epalopoda dhari rato Asyur. Kottha reya bi’ Sengko’ teptep eaobana." Yesaya laju makon oreng noto buwana ara pas esoro buliddagi ka babudunna Hizkiya me’ olle baras. Rato Hizkiya mareksane, "Ponapa tandhana ja’ PANGERAN mabarasa kaula ban ja’ kaula kengeng entar ka Padalemman Socce pole?"
7Yesaya nyaot, "Ka’dhinto tandha se eparengngagi PANGERAN ka junandalem ja’ Salerana neptebbi janjina.
8Jang-bajangan e petoduna ejjam badhiyanna Rato Ahas sareng PANGERAN bakal epanyoroda sapolo garis." Jang-bajangan jareya laju nyorot sapolo garis.
9Saellana baras, Hizkiya laju nyerrat lagu pojiyan reya:
10"Ca’na sengko’, sengko’ gi’ buru satengnga omor la kodu mangkat, ngahere karena omor e dunnyana oreng mate.
11Ca’na sengko’, sengko’ ta’ nangaleyana PANGERAN pole ban ta’ nangaleyana manossa e bume reya.
12Tang nyaba pegga’, la napa’ tang ajal, akantha kemahna oreng ngowan se epagujur; akantha kaen se eketthok dhari panennonan; ca’na sengko’ esanggu sengko’ epamateya bi’ Allah.
13Samalem benteng sengko’ atharat sake’an kabbi, tang tolang akantha se epa’-ceppa’ macan; ca’na sengko’ esanggu sengko’ epamateya bi’ Allah.
14Tang sowara sajan kene’ ban lere, akantha dara sengko’ aserrowan. Tang mata daga lesso se mandeng ka langnge’, GUSTE, angkessagi abdidalem dhari kasossa’an paneka.
15Dhu ngoca’a baramma pole sengko’ reya? Se alampa’agi areya PANGERAN; sengko’ ta’ bisa tedhung lantaran sossa.
16Adhu, Guste, paodhi’agi abdidalem dhari se edhabuwagi sareng se elampa’agi Junandalem, abdidalem odhi’a badhi Junandalem malolo.
17Kasossa’an abdidalem badhi aoba daddi kataremtemman, Junandalem masalamet abdidalem dhari babaja; sa-dusa abdidalem sareng Junandalem ampon esapora sadaja.
18E alam maot tadha’ se amolja’agi Junandalem, oreng mate ta’ kengeng ngarep kaestowanna Junandalem.
19Namong oreng odhi’ se amolja’agi Junandalem, akadi se ejalannagi abdidalem e are mangken. Oreng towa nyareta’agi ka na’-ana’na saponapa kaestowannepon Junandalem, GUSTE.
20GUSTE, Junandalem ampon mabaras abdidalem, daddi abdidalem sadaja anyanye lagu pojiyan ka’dhinto e Padalemmannepon Junandalem, sambi nabbuwa calempong saomorra."
21(38:6)
22(38:6)
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel