1Tope tarompet, pamonye tandha babaja e gumo’ Siyon se socce, kalenggiyanna Allah. Mara pangetter ba’na, pandhudhu’ Yehuda! Sabab Are PANGERAN la para’ napa’a.
2Are jareya petteng calemodan, possa’ ban bun-arbun se orem. Tantarana balang dhateng bal-ambalan padha ban ondhem se malang e attassa pagunongan. Molae lamba’ gi’ ta’ tao badha kadaddiyan kantha jareya, ban ta’ kera taolang pole salanjangnga.
3Padha ban apoy se ngello’ ban makatononan lang-balang jareya maobus men-tamennan. Sabellunna, nagara reya padha ban Eden, bun-kebbunanna Pangeran, samarena, padha ban sagara beddhi se kerreng ngaraksak. Sabarang padha tadha’ karena, tadha’ se lopoda dhari serranganna.
4Robana padha ban jaran; paberka’na padha ban jaran e paperrangan.
5Lang-balang jareya ca’-lonca’an e konco’na pagunongan, monyena padha ban karethe’na kareta paperrangan padha ban karetebba apoy se ngello’ darameyan se kerreng. Lang-balang jareya abaris padha ban pasukan se parjuga, se la sadhiya majuwa ka paperrangan.
6E bakto lang-balang jareya nyerrang, oreng kabbi padha katako’an, mowana padha pocet tadha’ dharana.
7Lang-balang jareya nyerrang padha ban pahlawan, sarta nalar e geddhung padha ban pejuwang. Kabbi padha abaris loros ka adha’, ta’ abiluk otaba aoba tojjuwan.
8Se maju ta’ lek-selleggan, kabbi padha ajalan e jalanna bang-sebang. Kabbi areng-bareng arosak partahanan, tadha’ se bisa maambu barisanna.
9Lang-balang dhateng nyerrang ka dhalem kottha, sarta berka’ e attassa dhung-geddhungnga. Padha nalar ka dhalem ko-bengko, akantha maleng maso’ lebat candhela.
10Parappa’na lang-balang jareya maju, bume agundhek, ban langnge’ agedder. Are ban bulan pas padha petteng, sonarra tang-bintang padha orem ta’ etangale.
11Sowarana PANGERAN padha ban galudhuk, apareng ba-aba, ka angkadan perrangnga. Bannya’ onggu laskarra! Kowat onggu tantara se ajalannagi papakonna! Nako’e onggu Are PANGERAN! Tadha’ oreng settonga se kellar nanggung are jareya.
12PANGERAN adhabu, "Tape sateya reya, mara ba’na abali ka Sengko’ pagu-onggu, sambi apowasa, nanges ban pagili aeng matana.
13Sebbit atena ba’na, banne kalambina." Mara ba’na addhep ka PANGERAN, Allahna. Salerana sabbar ban neserran, lamba’ ban talebat bellas asena. Lebur nyapora ban ta’ kasokan alampa’agi okoman.
14Pola GUSTE Allahna ba’na me’ aoba panggaliyanna, ban apareng berkat ce’ bannya’na ka ba’na. Sampe’ ba’na bisa ngatorragi gandum ban anggur menangka kurban ka PANGERAN, Allahna.
15Mara nope tarompet e Siyon, gunongnga Allah, balai oreng, kabbi soro apowasa, badha’agi kompolan raja.
16Pakompol sakabbinna ra’yat, padhateng kompolanna ommat. Olok reng-oreng se la towa, bariya keya na’-kana’ ban ji’-babaji’na. La’-mala’ pangantan anyar soro dhateng keya. Soro kalowar dhari kamarra.
17Soro mam-imam se aladine PANGERAN nanges e antarana amper adha’ ban mezba, sambi mator, "Kaneserre ommattepon Junandalem, GUSTE; ja’ kantos kaagungannepon Junandalem ka’dhinto juba’ nyama," kantos sa-bangsa laen padha asemmonan sareng ngoca’, "Kemma Allahna reng-oreng rowa?"
18PANGERAN pas meyara tanana sarta neser ka ommadda.
19Salerana apareng jawaban kantha reya, "Sateya bi’ Sengko’ ba’na eberri’ana: gandum, anggur ban mennya’ jaitun se ekakana ba’na sopaja ba’na kennyang. Bi’ Sengko’ ba’na ta’ epannengnga eya-seya otaba ekala’-gella’ bi’ sa-bangsa laenna.
20Pasukanna balang dhari dhaja bi’ Sengko’ eagga’a, se sabagiyan eagga’a ka sagara beddhi. Barisan bagiyan adha’na bi’ Sengko’ esellegga ka Sagara Mate, barisan bagiyan budhina esothoga ka Sagara Tengnga. Babathangnga bakal bacengnga. Bi’ Sengko’ epateyana polana la nyeksa ba’na.
21Ba’na ja’ tako’, he, teggal, pasenneng atena; kaenga’e lalakon raja se la elampa’agi PANGERAN kaangguy ba’na!
22He, ban-keban, ba’na ta’ osa rentek atena. Lon-talon sateya la padha biru. Ka’-bungka’an lebba’ buwana, buwana anggur ban ara talebat bannya’na.
23He, ra’yat Siyon, mara pagumbira! Mara pasenneng ban asorak! Sabab sakabbinna kabecce’an dhari GUSTE Allahna ba’na. E mosem ronto ba’na eparenge ojan sacokobba. E mosem cellep Salerana matoron ojan sabannya’na, bariya keya e mosem selbi’ akantha ba’-lamba’na.
24Daddi pagebba’an bakal aesseya gandum pole; anggur ban mennya’ jaitun bakal ngalowa’a dhari kennengnganna pamerressan.
25Sakabbinna karogiyanna ba’na polana hasella tanana se ekakan balang sampe’ ataonan abidda, bi’ Sengko’ eganteyana. Sabab Sengko’ se madhateng balang jareya ka ba’na.
26Ba’na bakal ta’ kakorangana kakan ban bakal kennyanga. Ba’na bakal amolja’agiya GUSTE Allahna, sabab Salerana la alampa’agi kaajiban sabannya’na kaangguy kaparlowanna ba’na. Tang ommat ta’ kera ebi-cebbi oreng pole!
27Daddi ba’na bakal taowa, Isra’il, ja’ Sengko’ badha e nga’-tengnga’anna ba’na, ban ja’ Sengko’ reya, PANGERAN, Allahna ba’na. Kajabana Sengko’, tadha’ Allah laen. Tang ommat ta’ kera epamalo pole."
28"Saellana jareya pagi’ bi’ Sengko’ sakabbinna oreng epatoronana Tang Erroh. Na’-ana’na ba’na lalake’ ban babine’ bakal manapa’a Tang sen-pessen; oreng se la wa-towa e antarana ba’na bakal olleya mempe, dineng ton-pangatonan bakal ekaolle kaom ngangodhadan lalake’ ban babine’.
29E bakto jareya Tang Erroh epatorona keya ka la-kabula lalake’ ban babine’.
30E langnge’ ban e bume Sengko’ mabadha’a kaajiban sabannya’na. Bakal badha’a dhara ngalocor, apoy rabbang bar-galabaran ban okos apel-kempel.
31Are bakal pettengnga ban bulan bakal daddiya mera akantha dhara. Jareya kabbi bakal kadaddiyana sabellunna Arena PANGERAN napa’ ka baktona, iya reya are se talebat nako’e rowa.
32Tape pa’-sapa’a se nyo’on partolonganna PANGERAN, bakal epasalamedda. PANGERAN adhabu, ‘E Yerusalim reng-oreng Tang peleyan bakal salamedda.’"
Bahan Renungan: SH - RH - ROC
Download
Alkitab ANDROID
Kamus Alkitab
Kamus Bahasa
Kidung Jemaat
Nyanyikanlah Kidung Baru
Pelengkap Kidung Jemaat
Alkitab.mobi
Copyright
Alkitab.SABDA.org
Android.SABDA.org
SABDA.APP
BaDeNo
Bantuan
Single Panel